2 Juan 1 - Tz'utujil (Ja Cꞌacꞌa Chominem)

¹ Wachꞌalal ja ratchaꞌon rmal ja Dios, anin ja rin anciano ntakel ja carta chawe riꞌ in ntakel chique ja rawal chakajaꞌ. Anin congana nixwajoꞌ pro jun ajoben riꞌil cꞌo chake ewqꞌuin ja ni katzij wiꞌ chi ruqꞌuin ja Jesucristo penak wiꞌ. Pro ma nuyon ta anin ja nixwajoꞌ pro nixcajoꞌ chakajaꞌ canojel ja nchꞌobtaj cumal nak rbanic ja utzlaj tijonem xin Jesucristo.

² Rumac ja utzlaj tijonem ja rcꞌamonto ja Jesucristo chewiꞌ tok nixwajoꞌ, jariꞌ tijonem cꞌo chic pa tak kanma in mta ariꞌ ja maquita xtiqꞌuejeꞌ kuqꞌuin.

³ Ja rutzil ja nsipaj ja Dios chake ja tariꞌ xtiyataj chewe rmal ja Dios ja Tatixel in rmal ja kajaw Jesucristo ja Ralcꞌwal katataꞌ Dios, ejeꞌeꞌ ta xtiquipokonaj ewach in xtiqueyaꞌ ta chewe ja quicotemal xin Dios. Jariꞌ nkacochij tre ja Dios ja tok nqꞌuejeꞌe ja utzlaj tijonem xin Jesucristo pa tak kanma in tok nkajoꞌ kiꞌ chakajaꞌ.

* * * * * * * * * *

⁴ Ecꞌoli ja rawal kacꞌulun kiꞌ cuqꞌuin in congana ninquicot chiquij como ejeꞌeꞌ ni quimajon wiꞌ rnimaxic ja utzlaj tijonem xin Jesucristo. Niquirwariꞌ quimajon rbanic ja caniꞌ banon mandar chake rmal ja Tatixel chi nkaban.

⁵ Camic wachꞌalal, congana nban recomendar chawe chi ni nkajoꞌ wiꞌ kiꞌ. Pro jariꞌ jun mandamiento ma cꞌa ta winakari pro ni bitajnakto wiꞌ chake nabey chi rjawaxic chi nkajoꞌ kiꞌ.

⁶ Ja cꞌa rajoben riꞌil xin Dios quewaꞌ rbanic riꞌ, jariꞌ ja naban cumplir ja mandamiento ja yaꞌon jeꞌe chake rmal ja Dios. Ja cꞌa mandamiento xin Dios jariꞌ ja nij ecꞌwaxanto wiꞌ nabey in quewaꞌ nbij riꞌ: —Tewajoꞌ ewiꞌ, neꞌe.

⁷ Queriꞌ nbij chawe como e qꞌuiy ja banol tak engaño ja reꞌelnak chic, ebenak cuqꞌuin ja winak ja xa ruqꞌuin rwachꞌulew yukul wiꞌ quecꞌuꞌx, ejeꞌeꞌ nquipokonaj nquibij chi xoc kach winak ja Jesucristo ja tok peti waweꞌ chwachꞌulew. Xa nak ta ja nbano queriꞌ arjaꞌ banol engaño in xa rcꞌulel ja Cristo.

⁸ Kas tebanaꞌ jutzꞌit cuenta ewiꞌ, maxta quixban engañar, maquita xtetzꞌilaꞌ ja rtojbalil ja samaj ebanon pro ja kas nwajoꞌ chewe, xtiyataj ta na chewe ja rtojbalil pro ni nojelal.

⁹ Ja tijonem xin Cristo ja wi cꞌo jun xa ncꞌotsaj rwiꞌ in wi xa nuyaꞌ can jariꞌ mta Dios pa ranma. Ja cꞌa wi ni matayaꞌ can wiꞌ ja tijonem xin Cristo jariꞌ cꞌoli ja Tatixel chipan ja rawanma rachbil ja Ralcꞌwalaxel.

¹⁰ Xa nak ta ja nekaj ewqꞌuin wi cꞌo jun tijonem rcꞌamonto ja junwiꞌ na chwach ja tijonem xin Cristo maxta tecꞌul chipan ja rewochoch chi neyaꞌ rposada in nixtacꞌa xtebij ta tre: —Dios ta xcatbano bendecir, maxta quixcheꞌ tre.

¹¹ Queriꞌ nbij chewe como wi cꞌo jun nbij tre: —Dios ta xcatbano bendecir, wi neꞌ tre, arjaꞌ jun nijkalen ruqꞌuin ja ritzel tijonem nuyaꞌ.

* * * * * * * * * *

¹² Cꞌa cꞌo na más ja nwajoꞌ nbij chewe pro matintzꞌibaj chipan ja carta como ja nchꞌobon anin chi ninbe na ewqꞌuin. Ja cꞌa tok xquinekaji nutzꞌat riꞌ kawach ewqꞌuin, cꞌa tokoriꞌ noktzijoni utzcꞌa chi nqꞌuiyi in nwachini ja quicotemal xin Dios pa tak kanma.

¹³ Ja ral ja rawachꞌalal ja chaꞌon rmal ja Dios ejeꞌeꞌ nquetakel rutzil awach. Amén.