2 Corintios 9 - Tz'utujil (Ja Cꞌacꞌa Chominem)

¹ Como anin wachꞌalal, bien wotak chi ma rjawaxic ta nbij chewe chi neyaꞌ jun ayuda chique ja kachꞌalal ja re xin Dios.

² Queriꞌ nbij chewe como wotak chi cꞌol egana neyaꞌ in rmalariꞌ tok nintajini nyaꞌ ekꞌij chiquewach ja kachꞌalal ja recꞌo waweꞌ chipan ja departamento Macedonia como anin nbij chique chi ixix ja rixcꞌo chilaꞌ chipan ja departamento Acaya ix listo chic junabir chi neyaꞌ ja rayuda. In jun chic, como ixix congana egana neyaꞌ xa rmalariꞌ tok congana e qꞌuiy xuyaꞌ gana chique chi nqueyaꞌ ejeꞌeꞌ chakajaꞌ.

³ Pro ecꞌoli ja kachꞌalal ja nenutakel ewqꞌuin utzcꞌa chi bien nechomij pon ja moloj ayuda como nbin chic chique ja kachꞌalal chi ix listo chic chi neyaꞌ. Como anin nyaꞌon chic ekꞌij chiquewach ja kachꞌalal pro congana lawuloꞌ ariꞌ ja wi mta noc wiꞌ ja xinyabej ekꞌij chiquewach.

⁴ Ja cꞌa tok xquinekaj anin ewqꞌuin, ja wi ecꞌo juleꞌ kachꞌalal aj Macedonia etran chwij congana lawuloꞌ ariꞌ ja wi majaꞌn techomij ewiꞌ triꞌ chi rmolic ruchiꞌ ja rayuda. Ja queriꞌ congana qꞌuixbal chake ajoj in chewe ixix chakajaꞌ como kayaꞌon chic ekꞌij chiquewach chi ix listo chic chi neyaꞌ ja rayuda.

⁵ Rmalcꞌariꞌ ja tok xinchꞌob chi rjawaxic nenuban animar ja kachꞌalal chi ejeꞌeꞌ nebe ewqꞌuin nabey utzcꞌa chi nquichomij pon ewqꞌuin nak neban tre ja rayuda ja retzujun chi neqꞌuis rmolic utzcꞌa chi molon pon chic ruchiꞌ nojelal ja tok xquinekaj anin. Pro nojel ta ecꞌuꞌx nojel ta ewanma neyaꞌ, maxta chaka ix puersa.

⁶ Pro bien cꞌa tewasaj enaꞌoj trij ja rejemplo ja nyaꞌ chewach riꞌ. Ja tok natbe pa ticoj tijcoꞌm wi xa naxuyaj ja rijaꞌtz natic xcꞌa ma nim ta cosecha nuyaꞌ ariꞌ. Ja cꞌa wi mataxuyaj jariꞌ congana cosecha nuyaꞌ.

⁷ Ja neyaꞌ chejujunal xa ni xarwariꞌ ja nalax pa tak ewanma chi neyaꞌ. Maxta tebisoj ja neyaꞌ, maxta chaka ix puersa. Queriꞌ nbij chewe como ja Dios arjaꞌ nerajoꞌ ja winak ja nequicoti nqueyaꞌ ja rayuda.

⁸ Ja cꞌa Dios arjaꞌ bien ncowini nuyaꞌ chewe nojel rwach ja mebaꞌil ja neꞌetobej ja cꞌo rjawaxic chique. Más na nocꞌo rwiꞌ ja ncowini nuyaꞌ chewe utzcꞌa chi ni cꞌo wiꞌ ewqꞌuin xa nak ta ja ncꞌatzin chewe utzcꞌa chakajaꞌ chi sobre ja cꞌol ewqꞌuin ja neꞌetobej ja winak xa nak ta ncꞌatzin chique.

⁹ Caniꞌ tzꞌibtal can chipan ja rtzobal Dios tre jun utzlaj achi, quewaꞌ nbij riꞌ: —Congana ayuda ryaꞌon, ertoꞌon ja tak mebaꞌiꞌ. Ja rutzil nuban jariꞌ ni mta wiꞌ qꞌuisic trij. Queriꞌ ja tzꞌibtal can.

¹⁰ Ja Dios arjaꞌ nyowi ja rijaꞌtz chique ja re ticol tak tijcoꞌm, arjaꞌ nyowi kaway. Ja mismo Dios arjaꞌ xtiyoꞌ chewe ja mebaꞌil ja neꞌetobej ja cꞌo rjawaxic chique in nqꞌuiyirsaj na más chewach. Arjaꞌ nsamaj na chipan ja rutzil ja neban ixix in tok xtiqꞌuiswani más chi na nwachini ja rutzil rmal.

¹¹ Ja Dios arjaꞌ mta nak ta ja maquita xtuyaꞌ chewe, nixoc na ix caniꞌ biyomaꞌ rmal utzcꞌa chi ni cꞌo wiꞌ ewqꞌuin ja neꞌetobej ja kachꞌalal. Ja cꞌa kachꞌalal tok xtekajachaꞌ ja rayuda pa quekꞌaꞌ janila xtiquimaltioxij tre ja Dios emwal.

¹² Queriꞌ nbij chewe como ja rayuda neyaꞌ ma jun ta rsamaj. Ma ruyon ta nerutoꞌ ja kachꞌalal chipan ja cꞌo rjawaxic chique pro janila chi maltioxinem nya̱ꞌ tre ja Dios rmal chakajaꞌ.

¹³ Ja cꞌa tok xteyaꞌ chique ja rayuda jariꞌ nucꞌut chiquewach janiꞌ enaꞌoj in nqueyaꞌ na rukꞌij ja Dios emwal. Nqueyaꞌ na rukꞌij ja tok xtiquetzꞌat chi ni katzij wiꞌ ja nebij chi eniman ja utzlaj tzij xin Cristo in nqueyaꞌ na rukꞌij chakajaꞌ ja tok xtiquetzꞌat chi nim ja rayuda ja neyaꞌ chique ejeꞌeꞌ in chique canojelal.

¹⁴ Ja cꞌa rejeꞌeꞌ nqueban na orar pan ecuenta in congana lokꞌ nixquenaꞌ como nquetzꞌat na chi ja rutzil ja recochin tre ja Dios más kꞌaxnak chi na nsamaji ja pa tak ewanma.

¹⁵ Congana nmaltioxij tre ja Dios como arjaꞌ cꞌo jun sipanem kacochin tre ja ni maticanoy wiꞌ tzij kumal chi rbixic como janila nim rukꞌij.