2 Corintios 8 - Tz'utujil (Ja Cꞌacꞌa Chominem)

¹ Ja cꞌa camic wachꞌalal, nkajoꞌ nkachꞌob chewach nak rbanic ja rutzil xin Dios ja samajnak pa tak canma ja riglesia jeꞌe ja recꞌo waweꞌ chipan ja departamento Macedonia.

² Como ejeꞌeꞌ cꞌo jun nimlaj ayuda quemol ja nquetakel cuqꞌuin ja kachꞌalal ja cꞌo rjawaxic chique. Quemol ja rayuda masqui cꞌo jun nimlaj rpokonal cꞌo jun nimlaj prueba netajini nekꞌax chipan. Pro como cꞌo jun nimlaj quicotemal xin Dios pa tak canma in como congana e tak mebaꞌiꞌ in bien cotak nquipokonaj quewach ja winak ja cꞌo rjawaxic chique chewiꞌ tok congana jun ayuda quemol.

³ Como ejeꞌeꞌ congana jun lucha queban, queyaꞌ janiꞌ ja necowini nqueyaꞌ. Anin in testigo chiquij chi queriꞌ queban. Cꞌo nariꞌ xuban jeꞌe falta chique rumac ja más na xocꞌo rwiꞌ queyaꞌ. Pro jariꞌ ma xekabochiꞌij ta, quigana queyaꞌ.

⁴ Congana xokquecoj pa chꞌaꞌoj, quewaꞌ quibij chake riꞌ: —Tebanaꞌ jun utzil, teyaꞌaꞌ chake ja privilegio chi ajoj jun nkatakel jun ayuda chique ja kachꞌalal ja re xin Dios, xecheꞌ chake.

⁵ Más chi na queyaꞌ chwach ja caniꞌ kachꞌobon chiquij chi nqueyaꞌ como ja queban, nabey queyaꞌ quiꞌ pa rukꞌaꞌ ja kajaw Dios chi rbanic xa nak ta ja najoꞌx chique rmal chi nqueban in queyaꞌ quiꞌ pa kakꞌaꞌ ajoj chakajaꞌ in xa rmal ja rvoluntad Dios ja tok queban queriꞌ.

⁶ Queriꞌ quibanon ja kachꞌalal in rmalariꞌ congana kaban animar ja Tito chi arjaꞌ nbe chic jutij ewqꞌuin. Como ja Tito cꞌo jun moloj ayuda xumaj checojol chewiꞌ tok kabijel tre chi nbe chic jutij ewqꞌuin chi nerqꞌuisaꞌ rmolic como ja rayuda neyaꞌ jariꞌ ncꞌutuwi ja rutzil xin Dios ja nsamaji pa tak ewanma.

⁷ Ixix congana benak pa nim nojel rwach ja rutzil xin Dios ja yatajnak chewe. Caniꞌ tre ja yukulbal ecꞌuꞌx ruqꞌuin ja Jesucristo congana nim. In jun chic, congana neyaꞌ rbixic ja rtzobal Dios in bien nchꞌobtaj emwal chakajaꞌ. In jun chic, congana netij ekꞌij chi rbanic ja rvoluntad Dios. In jun chic, congana nokewajoꞌ. Ja cꞌa camic nbij chewe, como congana benak pa nim checojol nojel awaꞌ ja rutzil xin Dios ja cꞌa xinbij kaj chewe riꞌ tibe cꞌa pa nim checojol chakajaꞌ ja rutzil xin Dios tre ja moloj ayuda.

⁸ Pro maquixnuban mandar wachꞌalal. Ja kas nwajoꞌ chewe chi queriꞌ neban tre ja moloj ayuda ja caniꞌ queban ja juleꞌ chic kachꞌalal utzcꞌa chi triꞌ ntzꞌa̱t wiꞌ chi ni katzij wiꞌ chi nsamaji ja rajoben riꞌil xin Dios pa tak ewanma.

⁹ Como ixix bien ewotak chi ja kajaw Jesucristo congana samaji ja rutzil xin Dios pa ranma. Como arjaꞌ masqui congana biyom nabey pro ma xpokonaj ta xuyaꞌ can ja rbiyomal, ma xpokonaj ta xoc mebaꞌ pro emwal ixix tok xuban queriꞌ. Arjaꞌ xoc mebaꞌ utzcꞌa chi xa rmal ja rpobreꞌil tok nyataj ixix chewe ja biyomal xin Dios.

^10-11 In camic nwajoꞌ nyaꞌ jun paxbanem chewe tre ja rayuda como ja xtinbij chewe riꞌ cꞌoli rcꞌamonto chewe. Teqꞌuisaꞌ rmolic ja rayuda ja xetij rmolic junabir. Como ixix xemaj rmolic in ma ruyon tariꞌ pro nojel ecꞌuꞌx nojel ewanma xeban. Ja cꞌa camic nbij chewe, como congana egana nabey tok xechꞌob chi nemol ja rayuda queriꞌ ta cꞌa neban camic chakajaꞌ chi rqꞌuisic xarwariꞌ janiꞌ nixcowini neyaꞌ xa xarariꞌ ja neyaꞌ.

¹² Queriꞌ nbij chewe como ja Dios tok nojel acꞌuꞌx nojel awanma nayaꞌ jun ayuda arjaꞌ utz nutzꞌat in nucꞌam chawe in janiꞌ natcowini nayaꞌ jariꞌ ncꞌutuj chawe, ma ja ta ncꞌutuj chawe ja macatcowini nayaꞌ.

¹³ Como anin ma ja ta nbij chewe chi xqueꞌetoꞌ ta juleꞌ chic chipan ja quipobreꞌil in xquixoc can chi ta cꞌa ix pobre ixix rmal.

¹⁴ Ja kas ngana anin xta junan nkaban nkatoꞌ ta kiꞌ chibil tak kiꞌ. Caniꞌ chewe ixix camic como cꞌoli sobre ja cꞌol ewqꞌuin xcꞌa chewiꞌ tok congana buena wi neꞌetoꞌ ja kachꞌalal chipan ja quipobreꞌil utzcꞌa chi ejeꞌeꞌ chic netoꞌo ewxin chwak cabij ja tok cꞌo chic rjawaxic chewe ixix in tok cꞌo chic sobre cuqꞌuin ejeꞌeꞌ triꞌ ja nixquitobej. Queriꞌ rubey utzcꞌa chi xa junan nkaban nkatoꞌ kiꞌ chibil tak kiꞌ.

¹⁵ Caniꞌ tzꞌibtal can ojer chipan ja rtzobal Dios tre ja maná ja takto chilaꞌ chicaj cuqꞌuin ja raj Israel chi nquetij, quewaꞌ nbij riꞌ: —Ja winak ja qꞌuiy maná quemol mta quetoꞌ. Ja cꞌa winak ja xa ti ma nim ta quemol xeruban. Queriꞌ ja tzꞌibtal can.

* * * * * * * * * *

¹⁶ Pro anin congana nmaltioxij tre ja Dios como arjaꞌ ryaꞌon pa ranma ja Tito chi congana noclaꞌ il chi rbanic cuenta ewxin, ni queriꞌ nuban ja Tito chi echajixic ja caniꞌ nintajini nban anin.

¹⁷ Queriꞌ nbij chewe como arjaꞌ tok kabij tre chi nbe chic jutij ewqꞌuin ma xnimar ta pro congana rgana nbe, ni rvoluntad wiꞌ chi nbe chic jutij ewqꞌuin.

¹⁸ Cꞌo chic jun kachꞌalal nkatakel trij chi nrachbilajel. Jariꞌ kachꞌalal ja congana utz rtzijoxic nba̱n cumal canojel ja juleꞌ chic kachꞌalal xa nak ta iglesia ecꞌo wiꞌ como arjaꞌ congana jun samaj rbanon chi rbixic ja utzlaj tzij xin Jesucristo.

¹⁹ In jun chic, arjaꞌ chaꞌon cumal ja kachꞌalal ja recꞌo pa tak iglesia jeꞌe chi nkachbilaj tre ja moloj ayuda ja noktajini kamajon rmolic camic. Ajoj kamajon rmolic ja rayuda utzcꞌa chi jariꞌ noc yaꞌbal rukꞌij ja kajaw Jesucristo utzcꞌa chakajaꞌ chi bien nkꞌalajin na chi ixix cꞌol egana neꞌetoꞌ ja kachꞌalal ja cꞌo rjawaxic chique.

²⁰ Pro bien kabanon cuenta ja wariꞌ utzcꞌa chi majun tzij npi chakij rmal ja nimlaj ayuda ja kamajon rmolic.

²¹ Congana kabanon cuenta ja samaj ja nkaban jeꞌe utzcꞌa chi bien kꞌalaj chiquewach ja winak chakajaꞌ chi majun engaño nkaban in ma ruyon ta chwach ja Dios.

²² Cꞌo chi na jun kachꞌalal ja nkatakel chiquij ja Tito, jun kachꞌalal ja qꞌuiylaj mul katzꞌaton chi congana nutij rukꞌij chi rbanic ja samaj jeꞌe xin Dios in pior cꞌa camic congana rgana nbe ewqꞌuin como congana rconfianza ewqꞌuin.

²³ Ja cꞌa Tito kacꞌamon kiꞌ ruqꞌuin chi noksamaj pan ecuenta, arjaꞌ wach ajsamajel xin Dios. Ja cꞌa re caꞌiꞌ chic kachꞌalal ejeꞌeꞌ echaꞌonel cumal ja juleꞌ chic kachꞌalal ja recꞌo pa tak iglesia jeꞌe in ja quicꞌaslemal jariꞌ ocnak yaꞌbal rukꞌij ja Cristo.

²⁴ Rmalcꞌariꞌ nbij chewe, ja tok xqueꞌekaj ewqꞌuin kas ta quiꞌil quicꞌulic neban utzcꞌa chi ejeꞌeꞌ e cachbil ja juleꞌ chic kachꞌalal ja recꞌo pa tak iglesia bien nkꞌalajin na chiquewach chi ixix ni katzij wiꞌ chi cꞌoli ja rajoben riꞌil xin Dios pa tak ecꞌaslemal utzcꞌa chakajaꞌ chi bien nquetzꞌat chi ni katzij wiꞌ nojel ja kabin chique ja kachꞌalal ja kayaben ekꞌij.