2 Corintios 5 - Tz'utujil (Ja Cꞌacꞌa Chominem)

¹ Ja cꞌa kacuerpo jariꞌ ocnak caniꞌ rochoch ja kanma waweꞌ chwachꞌulew in wi xa nyojtaji jariꞌ bien kotak chi cꞌo chi na jun rochoch ja kanma chilaꞌ chicaj ja nyataj chi na chake rmal ja Dios pro jun jay ja ma winak ta ebanyon in ni mta wiꞌ qꞌuisic trij.

² Como ja cuerpo ja kucꞌan waweꞌ chwachꞌulew janila noktiꞌon rmal in congana kas tzꞌel pon kawach trij ja jun chic rochoch ja kanma ja xin chilaꞌ chicaj chi nyataj chake.

³ Ja cꞌa tok xtiyataj ariꞌ chake jariꞌ caniꞌ jun tziak ja xticoj tre ja kanma utzcꞌa chi ma chꞌanal ta ja kanma triꞌ.

⁴ Ja cꞌa cuerpo ja kucꞌan waweꞌ chwachꞌulew jariꞌ ni noktiꞌon wiꞌ rmal, congana lawuloꞌ nkaban rmal pro ajoj ma ja ta nkajoꞌ ja ni ta majun cuerpo kucꞌan pro ja kas kagana ajoj chi nyataj chake ja jun chic cuerpo ja xin chilaꞌ chicaj utzcꞌa chi ja cuerpo ja kucꞌan camic ja xa cꞌo camíc trij jariꞌ nqꞌuisi in nyataj chic chake ja jun chic ja ni mta wiꞌ camíc trij.

⁵ Pro jariꞌ Dios nbanowi, arjaꞌ chomarsyon kaxin utzcꞌa chi nuyaꞌ na chake ja jun chic cuerpo ja ni mta wiꞌ camíc trij in cꞌo jun seguro ryaꞌon chake chi ni nuban wiꞌ cumplir ja wariꞌ como ja rEspíritu Santo ja rtakonto pa tak kanma jariꞌ ocnak kaseguro.

⁶ Rmalcꞌariꞌ ja tok ni yukul wiꞌ kacꞌuꞌx ruqꞌuin ja Dios chi arjaꞌ nuyaꞌ na chake ja jun chic cuerpo ja xin chilaꞌ chicaj. Jaruꞌ pa tiempo xkoqꞌuejeꞌ chipan ja cuerpo ja kucꞌan waweꞌ chwachꞌulew jariꞌ ni matutzꞌat wiꞌ riꞌ kawach ruqꞌuin ja kajaw Jesucristo rmal.

⁷ Queriꞌ rbanic como ja chipan ja kacꞌaslemal waweꞌ chwachꞌulew ja yukulbal kacꞌuꞌx ruqꞌuin ja Dios jariꞌ nucꞌan kaxin, ma ja ta nucꞌan kaxin ja nkatzꞌat ruqꞌuin kawach.

⁸ Pro ni yukul wiꞌ kacꞌuꞌx ruqꞌuin ja Dios in como kotak chi matutzꞌat riꞌ kawach ruqꞌuin ja kajaw Jesucristo chipan awaꞌ jun cuerpo ja kucꞌan camic xa chewiꞌ tok más na kagana ja nkayaꞌ can awaꞌ jun cuerpo ja kucꞌan riꞌ in nokbe ruqꞌuin ja kajaw Jesucristo ja bar cꞌo wiꞌ ja mero kochoch.

⁹ Queriꞌ rbanic, wi nokqꞌuejeꞌ na waweꞌ owi nokbe ruqꞌuin xarwariꞌ chijutij kamajon rtijic kakꞌij chi rbanic ja rvoluntad utzcꞌa chi nquicot chakij.

¹⁰ Queriꞌ nbij chewe como rjawaxic chi nokekaj na chwach ja kꞌetbaltzij rxin ja Cristo kanojelal utzcꞌa chi triꞌ nokkꞌalajin wiꞌ nak ja kabanon chipan ja cuerpo ja kucꞌan waweꞌ chwachꞌulew utzcꞌa chi nyataj chake chikajujunal ja rtojbalil ja kabanon wi utzil ja kabanon owi xa itzelal.

* * * * * * * * * *

¹¹ Rmalcꞌariꞌ nbij chewe, como ajoj nkaxbej kiꞌ chwach ja kajaw Jesucristo chewiꞌ tok nekacoj ja winak pa chꞌaꞌoj chi nquixbej quiꞌ chwach chakajaꞌ pro ja Dios arjaꞌ bien kꞌalaj chwach nak rbanic ja samaj ja noktajini nkaban in cꞌo nseguro chi bien kꞌalaj chewach ixix chakajaꞌ.

¹² Maxta techꞌob chic jutij chakij chi xa kamajon rbanic recomendar kiꞌ chewe kayon. Mni, ma queriꞌ ta, pro nojel awaꞌ ja nmajon rbixic chewe riꞌ utzcꞌa chi nixquicot trij ja samaj xin Dios ja noktajini nkaban utzcꞌa chi cꞌoli nechꞌaꞌ chique ja winak ja congana nquikꞌalasaj quiꞌ chi e ajsamajelaꞌ xin Dios pro jariꞌ xa chiquij cꞌo wiꞌ, ma ocnak ta pa tak canma.

¹³ Ja cꞌa rajoj wi okchꞌujarnak noktzꞌati owi ma okchꞌujarnak ta pro xarwariꞌ nkaban ja samaj utzcꞌa chi cꞌo ta yaꞌbal rukꞌij ja Dios rcꞌamonto utzcꞌa chi cꞌo ta rcꞌamonto chewe ixix chakajaꞌ.

¹⁴ Queriꞌ nkaban como ja rajoben riꞌil xin Cristo jariꞌ nbano mandar kaxin. Como bien kotak chi ja Cristo cam pa kacuenta kanojelal tibij cꞌa tzij ariꞌ chi ajoj jun xokcam ruqꞌuin kanojelal.

¹⁵ Queriꞌ cꞌa xuban, cam pa kacuenta kanojelal utzcꞌa chi ja rokcꞌastajnak chic chipan jun cꞌacꞌa cꞌaslemal ma ja chi ta nkaban ja xa kavoluntad kaj ajoj kayon pro nkamajel chic rbanic ja rvoluntad arjaꞌ como cam pa kacuenta in kumal chakajaꞌ tok cꞌastaji chiquicojol ja camnakiꞌ.

¹⁶ Rmalcꞌariꞌ nbij chewe, ja camic chic tok nkamaj rchꞌobic janiꞌ rcꞌaslemal jun winak, xa nak ta chi winakil, ma queriꞌ chi ta nkachꞌob trij ja caniꞌ nquechꞌob ja winak ja cꞌa eꞌucꞌan na rmal ja tzabuklaj tak naꞌoj xin rwachꞌulew. Masqui queriꞌ kachꞌob trij ja Cristo nabey ja caniꞌ nquechꞌob ja winak ja reꞌucꞌan rmal ja tzabuklaj tak naꞌoj pro ma queriꞌ chi ta nkachꞌob ajoj trij camic.

¹⁷ Queriꞌ cꞌa rbanic, ja wi xa jun abanon ruqꞌuin ja Cristo jariꞌ at cꞌacꞌa winak chic, ja tzabuklaj tak naꞌoj awcꞌan nabey jariꞌ kꞌaxnak can chic, cꞌacꞌa chic nojelal.

¹⁸ Nojel awaꞌ ja cꞌa xinbij kaj chewe riꞌ ruqꞌuin Dios penak wiꞌ in camic ja Dios arjaꞌ ryaꞌon chake chi okchomtajnak chic ruqꞌuin rmal ja Cristo in cꞌo jun samaj ryaꞌon chi kakul ajoj jariꞌ chi nkachꞌob chiquewach ja winak nak rbanic ja tok nechomtaj ruqꞌuin.

¹⁹ Queriꞌ cꞌa rbanic, ja Dios arjaꞌ xa jun quibanon ruqꞌuin ja Cristo, xa jun quibanon ruqꞌuin chwach cruz rmalariꞌ tok nokchomtaj ruqꞌuin ja rok winak in rmalariꞌ chakajaꞌ tok ncuyi ja kil kamac in camic chi kakul ajoj ryaꞌon wiꞌ chi nkayaꞌ rbixic nak rbanic ja tok natchomtaj ruqꞌuin.

²⁰ Ja cꞌa rajoj camic oktakonel rmal ja Cristo chi pa rubiꞌ arjaꞌ nkaban ja samaj como ja Dios arjaꞌ nucoj kachiꞌ chi rbixic chique ja winak nak ja nrajoꞌ chique chi nqueban. Pa rubiꞌ cꞌa ja Cristo congana nkaban recomendar chewe chi quixchomtaj jutzꞌit ruqꞌuin ja Dios.

²¹ Quirtariꞌ neban jutzꞌit como ja Dios arjaꞌ trij ja Cristo xuyaꞌ wiꞌ ja kil kamac ja rok winak pro kumal ajoj tok xuban queriꞌ tre como ja Cristo ni majun ril rumac arjaꞌ. Queriꞌ xuban utzcꞌa tok xa jun kabanon ruqꞌuin ja Cristo jariꞌ utz chic nokrutzꞌat in nuban chic chake caniꞌ mta kil kamac kabanon.