2 Corintios 4 - Tz'utujil (Ja Cꞌacꞌa Chominem)

¹ Rmalcꞌariꞌ nbij chewe, jawaꞌ samaj ja kamajon rbanic riꞌ, como jun cochinem xin Dios chewiꞌ tok ni maticapuj wiꞌ kacꞌuꞌx chi rbanic.

² Pro ja kabanon ni kachꞌaꞌon wiꞌ chique ja juleꞌ chic winak ja nqueban tre ja quisamaj como cꞌo jeꞌe nqueban ja xa pan awatali ja xa qꞌuixbal rbanic pro ajoj ni mta wiꞌ jun engaño nkaban in tok nkayaꞌ rbixic ja rtzobal Dios ni majun nak ta nkaxol ta ruqꞌuin. Pro ja nkaban, nkakꞌalasaj chi utz ja rtzobal Dios chiquewach ja winak, ja nkajoꞌ cꞌa pa tak canma nekaj wiꞌ canojelal utzcꞌa chi ncotakij chi ni katzij wiꞌ ja nkabij in bien kotak chi Dios rotak nojel ja nkaban.

³ Pro ja utzlaj tzij xin Cristo ja nkayaꞌ rbixic wi ecꞌoli winak ja matichꞌobtaj cumal xa ni queyon wariꞌ ja netajini nebe chipan ja nimlaj rpokonal.

⁴ Matichꞌobtaj cumal como ja diablo ja rcojon riꞌ como dios waweꞌ chwachꞌulew arjaꞌ rmoyirsan ja quewiꞌ canma. Queriꞌ nuban ja diablo chique ja winak ja matiyukeꞌ quecꞌuꞌx ruqꞌuin ja Jesucristo utzcꞌa ja luz xin Dios matekaji pa tak canma. Jariꞌ luz jariꞌ ja utzlaj tzij xin Dios ja ncꞌutuwi chi janila nim rukꞌij ja Cristo. Ja cꞌa Cristo arjaꞌ ni junan quinaꞌoj ruqꞌuin ja Dios.

⁵ Como ni ja wiꞌ ja Jesucristo nkanataj tok nkayaꞌ rbixic ja utzlaj tzij, arjaꞌ Rajaw nojelal, nokcheꞌ tre, ma ajoj ta nkanataj kaj ta kiꞌ kayon. Ja cꞌa rajoj ok ilinelaꞌ ewxin pro rumac ja Jesús ja tok kabanon queriꞌ.

⁶ Queriꞌ kabanon como ja Dios arjaꞌ cꞌo jun luz rtakonto pa tak kanma ja caniꞌ xuban ojer tok xbij chi: —Tiwinakari ja luz, neꞌe, in winakari ja luz chipan ja kꞌekumal. Queriꞌ rbanon chake utzcꞌa chi nchꞌaꞌani ja luz xin Dios pa tak kanma in rmalariꞌ ja winak xticotakij na chi ruqꞌuin ja Jesucristo natzꞌat wiꞌ chi janila nim rukꞌij ja Dios.

* * * * * * * * * *

⁷ Jawaꞌ luz xin Dios ja cꞌa xinbij kaj chewe riꞌ caniꞌ jun nimlaj mebaꞌil kucꞌan pro ja rajoj xa ok ulew, xa ok caniꞌ juleꞌ bojoꞌy ja cꞌolon juleꞌ nimak tak mebaꞌil chipan. Queriꞌ cꞌa rbanon chake ja Dios utzcꞌa chi ja nimlaj poder ja nsamaji pa tak kacꞌaslemal jariꞌ ni kꞌalaj wiꞌ chi ruqꞌuin Dios penak wiꞌ in ma ajoj ta kawinakarsan nojoj kayon.

⁸ Ja rcꞌayewal ni cꞌo wiꞌ penak chakij chikawach pro xarwariꞌ okcowinnak okelnak chipan. Ni cꞌo wiꞌ ja npi chakij: —¿Nak nkaban cꞌawaꞌ? nokcheꞌe, pro ni ma capujnak ta wiꞌ kacꞌuꞌx rmal.

⁹ Nij ecꞌo wiꞌ ja nquicanoj nak ja nqueban chake pro ja Dios arjaꞌ ni ma okryaꞌon can ta wiꞌ. Cꞌo jeꞌe okquichꞌakin pa tokꞌulew pro ni ma banon ta wiꞌ cowinem chakij chi okquicamsan ta.

¹⁰ Como ni pa camíc wiꞌ okcꞌo wiꞌ chewiꞌ tok noktajini kamajon rnaꞌic janiꞌ rquiꞌil ja rcamic ja Jesús. Queriꞌ kabanon utzcꞌa chi bien nkꞌalajin na janiꞌ rcꞌaslemal ja Jesús chi ntajini nsamaji chipan ja kacuerpo chakajaꞌ.

¹¹ Queriꞌ nbij chewe como ja rokcꞌasli ni ncanox wiꞌ kij kawach nak nba̱n chake chi nokcamsaxi pro rumac ja Jesús ja tok nba̱n queriꞌ chake. Queriꞌ nba̱n chake utzcꞌa chi bien nkꞌalajin na janiꞌ rcꞌaslemal ja Jesús chi ntajini nsamaji chipan ja kacꞌaslemal masqui xa ok ulew.

¹² Queriꞌ rbanic, ja rajoj ni pa camíc wiꞌ okcꞌo wiꞌ pro ja chewe ixix jariꞌ utzlaj cꞌaslemal rcꞌamonpi chewe.

¹³ Pro ja rajoj cꞌoli ja rEspíritu Santo kuqꞌuin, arjaꞌ ryaꞌon chake chi cꞌo yukulbal kacꞌuꞌx ruqꞌuin ja Dios. Jariꞌ ja mismo Espíritu Santo ja cꞌo ruqꞌuin ja rajsamajel xin Dios ojer ja tok xtzꞌibaj can juleꞌ tzij chipan ja rtzobal Dios quewariꞌ: —Anin yukul nucꞌuꞌx ruqꞌuin ja Dios in ma xinpokonaj ta xinyaꞌ rbixic, neꞌe. In como jariꞌ mismo Espíritu Santo cꞌo kuqꞌuin camic chewiꞌ tok yukul kacꞌuꞌx ruqꞌuin ja Dios in matikapokonaj nkayaꞌ rbixic chakajaꞌ.

¹⁴ Queriꞌ nbij chewe como bien kotak chi ja Dios arjaꞌ nokruyic na chipan ja camíc. Como ja Dios arjaꞌ yico rxin ja kajaw Jesús chipan ja camíc in nokruyic na ajoj chipan chakajaꞌ rumac ja xa jun kabanon ruqꞌuin ja Jesús in nuyaꞌ na chake chi nokekaj na chwach pro ix kachbil chic triꞌ chakajaꞌ.

¹⁵ Queriꞌ nbij chewe como nojel ja noktajini nokkꞌax chipan camic utzcꞌa chi cꞌoli rcꞌamonpi ixix chewe. Queriꞌ nkaban utzcꞌa ja rutzil ja nsipaj ja Dios jariꞌ nbe más nbe más cuqꞌuin ja winak in tok nbe más cuqꞌuin jariꞌ más chi na e qꞌuiy nemaltioxin tre ja Dios in nojel ariꞌ noqui como yaꞌbal rukꞌij ja Dios.

¹⁶ Rmalcꞌariꞌ ja tok ni maticapuj wiꞌ kacꞌuꞌx. Ja kacuerpo jariꞌ ni katzij wiꞌ chi xa rmajon rajiꞌxem, xa ntajini nqꞌuis rchokꞌakꞌ pro cꞌo jun cꞌacꞌa cꞌaslemal ja cꞌo pa tak kanma jariꞌ kꞌij kꞌij xa janiꞌ nba̱n más cꞌacꞌa tre.

¹⁷ Queriꞌ nbij chewe como ja rpokonal ja kamajon rtijic waweꞌ chwachꞌulew jariꞌ ma al ta, xa jurata nocꞌowi como ja rpokonal ja nkatij quewaꞌ rcꞌamonto chake riꞌ, nyataj na chake chi noqui ja gloria xin Dios chake pro jun gloria janila nim rukꞌij, ni mta wiꞌ qꞌuisic trij in mta bar ta triꞌ xtikajunsaj chi ta wiꞌ.

¹⁸ Queriꞌ cꞌa xtikaban ja wi ma ruqꞌuin ta ja xin rwachꞌulew tzꞌel wiꞌ kawach ja xa cꞌo tzꞌattajic trij, queriꞌ cꞌa xtikaban ja wi kas tzꞌel kawach trij ja mta tzꞌattajic trij. Queriꞌ rbanic como ja ntzꞌattaji ruqꞌuin kawach jariꞌ xa nocꞌowi pro ja matitzꞌattaji ruqꞌuin kawach jariꞌ ni mta wiꞌ qꞌuisic trij.