2 Corintios 2 - Tz'utujil (Ja Cꞌacꞌa Chominem)

¹ Queriꞌ rbanic wachꞌalal, anin bien xinchꞌob chi matinban chic jun ja viaje ewqꞌuin ja xta bis rcꞌamonto chewe.

² Queriꞌ xinchꞌob wachꞌalal, como anin wi xa pa bis nixnuyaꞌ wiꞌ jariꞌ xa ninbison anin chakajaꞌ in ¿nak cꞌa nyoꞌ chic ariꞌ ja quicotemal chwe? nij ixix wiꞌ wachꞌalal.

³ Rmalcꞌariꞌ tok xintzꞌibaj ja carta chewe utzcꞌa chi ma pa bis ta nineyaꞌ wiꞌ tok xquinekaj ewqꞌuin como ja yatal chewe chi neyaꞌ quicotemal chwe. Queriꞌ nbij chewe como anin cꞌo nconfianza ewqꞌuin ewanojelal chi ja tok ninquicot anin jariꞌ ixix jun nixquicot wqꞌuin chakajaꞌ.

⁴ Como anin ja tok xintzꞌibaj ja carta ja xintak ewqꞌuin congana bis okꞌej nmajon triꞌ. Ja xintzꞌibaj chipan ja carta ma rmal ta chi nuyaꞌ bis chewe pro xintzꞌibaj utzcꞌa chi netzꞌat chi congana nixwajoꞌ.

* * * * * * * * * *

⁵ Pro ja kachꞌalal ja ticowi ja bis, ma nuyon ta anin xinruyaꞌ pa bis pro xixbison ixix rmal chakajaꞌ ewanojelal. Queriꞌ nbij chewe como matinwajoꞌ congana ta xquixnchꞌolij ta rmal.

⁶ Pro ja camic sobre alaꞌ ja disciplina tre ja kachꞌalal.

⁷ Ja cꞌa neban tre camic, tecuyuꞌ in teyukbaꞌ rucꞌuꞌx. Quirtariꞌ neban jutzꞌit tre utzcꞌa chi maticapuj rucꞌuꞌx chijutij rmal ja bis.

⁸ Rmalcꞌariꞌ congana nban recomendar chewe, lokꞌ tenaꞌaꞌ ja kachꞌalal utzcꞌa chi nutzꞌat chi congana newajoꞌ.

⁹ Como anin nwajoꞌ nixncꞌambajaj wachꞌalal, nwajoꞌ nwotakij wi nenimaj nojel ja nbij chewe in rmalariꞌ chakajaꞌ ja tok xintakel ja jun chic carta ewqꞌuin.

¹⁰ Ja wi ixix necuy ja kachꞌalal can ncuy anin chakajaꞌ. Ja cꞌa wi cꞌoli ncuyun jariꞌ emwal ixix chewiꞌ tok ncuyun, in chakajaꞌ ja Cristo rotak chi ncuyun.

¹¹ Ni rjawaxic wiꞌ chi nkacuy ja kachꞌalal utzcꞌa chi makoruchꞌec ja Satanás como ajoj bien kotak ja rnaꞌoj ja Satanás chi ni nrajoꞌ wiꞌ nokruban engañar.

* * * * * * * * * *

¹² Ja cꞌa xinban wachꞌalal, tok xinekaji chipan ja tinamit Troas chi rbixic ja utzlaj tzij xin Cristo cꞌo jun bey jaktaj chinwach chi nban ja samaj rxin ja kajaw Jesucristo.

¹³ Pro ni ma quiꞌ ta wiꞌ nucꞌuꞌx rumac ja ma xinwil ta triꞌ ja kachꞌalal Tito. Rmalcꞌariꞌ tok xinel chiquicojol ja kachꞌalal ja recꞌo pa Troas in xinbe chic chipan ja departamento Macedonia.

¹⁴ Pro nmaltioxij tre ja Dios como arjaꞌ ni nokrcꞌaj wiꞌ in nokchꞌocmaji chakajaꞌ pro xa rumac ja xa jun kabanon ruqꞌuin ja Cristo chewiꞌ tok nokchꞌocmaji. Maltiox tre ja Dios chakajaꞌ como arjaꞌ ryaꞌon chake chi nokbe nat nakaj chi nekayaꞌaꞌ rbixic ja Jesucristo chique winak, jariꞌ caniꞌ rxulaꞌ jun akꞌom nekaj cuqꞌuin pro jun akꞌom ja congana quiꞌ rxulaꞌ.

^15-16 Como ajoj tok nkayaꞌ rbixic ja Jesucristo ok caniꞌ jun nakun ja congana quiꞌ rxulaꞌ nunaꞌ ja Dios pro caꞌiꞌ quewach ja winak ja necꞌaxan kaxin. Ecꞌoli ja netajini nquewil ja totajem xin Dios in tok nkayaꞌ rbixic ja Jesucristo chique jariꞌ utzlaj cꞌaslemal rcꞌamonto chique. Pro ecꞌo chic juleꞌ ja netajini nebe chipan ja nimlaj rpokonal in tok nkayaꞌ rbixic ja Jesucristo chique jariꞌ xa camíc rcꞌamonto chique. Jawaꞌ samaj xin Dios ja cꞌa xinbij chewe riꞌ ¿nak ta cꞌa xticowin ariꞌ xtirijkalej ta ja xta ruyon kaj?

¹⁷ Pro ajoj nkaban jawaꞌ samaj riꞌ como ma ok junan ta cuqꞌuin ja juleꞌ chic winak ja xa por interés nquexol ja rtzobal Dios ruqꞌuin juleꞌ itzel tak tijonem. Pro ajoj tok nkayaꞌ rbixic ja rtzobal Dios nojel kacꞌuꞌx nojel kanma nkayaꞌ, Dios nyoꞌ chake ja nkabij, arjaꞌ nokrutzꞌat, xa jun kabanon ruqꞌuin ja Cristo chi rbixic.