2 Corintios 13 - Tz'utujil (Ja Cꞌacꞌa Chominem)

¹ Roxmul awaꞌ ja xquinbe ewqꞌuin riꞌ. Ja cꞌa tok xquinekaj ewqꞌuin quewaꞌ nkaban riꞌ, ja wi cꞌo jun kachꞌalal ja cꞌo ril xuban in wi ecꞌo caꞌiꞌ owi e oxiꞌ testigo ja xetzꞌatowi ja ma utz ta xuban jariꞌ ncꞌutu chikawach chi ni katzij wiꞌ chi cꞌo ril.

² Ja tok xinqꞌuejeꞌ checojol ja pa rcab viaje xinbij chique ja quimajon rbanic ja ritzelal chi cow nenuchap na in queriꞌ nbij chic chique chakajaꞌ ja juleꞌ chic ja quimajon rbanic ja ritzelal camic, masqui ma incꞌo ta ewqꞌuin pro mta moda ja maquita cow xquenuchap ja tok xquinekaj chic ewqꞌuin.

³ Como ixix newajoꞌ ninecꞌambajaj, como newajoꞌ newotakij ja wi ni katzij wiꞌ chi ja Cristo nbin chwe ja nbij chic chewe ixix pro jariꞌ bien netzꞌat na. Ja cꞌa Cristo arjaꞌ ma débil ta, sobre poder ja cꞌo ruqꞌuin chi quibanic castigar ja recꞌo checojol ja nebanowi ja ritzelal.

⁴ Queriꞌ nbij chewe como arjaꞌ masqui xa débil ja tok camsax chwach cruz pro ja camic cꞌasli rmal ja poder xin Dios ja rocnak chic tre. In queriꞌ cꞌa chake ajoj chakajaꞌ, xa ok débil rmal ja xa jun kabanon ruqꞌuin pro ja tok xkobe ewqꞌuin chi echomixic jariꞌ ma ok débil chi ta, okcꞌas chic ruqꞌuin rmal ja poder xin Dios ja rocnak chic chake triꞌ.

⁵ Bien cꞌa tecꞌambajaj kaj ewiꞌ eyon, ixix cꞌa quixtzꞌatowi ja wi ni katzij wiꞌ chi cꞌoli ja yukulbal ecꞌuꞌx ruqꞌuin ja Jesucristo. ¿La ma ewotak ta cꞌa chi cꞌoli ja Jesucristo pa tak ewanma? Queriꞌ rbanic ja wi ni katzij wiꞌ chi ix xin Cristo.

⁶ Pro ja tok xkoꞌekaj ewqꞌuin cꞌo nseguro chi bien netzꞌat na chi ajoj ni katzij wiꞌ chi ok apóstol xin Cristo.

⁷ Pro ja cꞌa camic kamajon rcꞌutuxic tre ja Dios chi nixrutoꞌ utzcꞌa chi mateban ja ritzelal. Pro ma ja ta ja kas nkajoꞌ chewe chi nkacoj chewij ja poder ja ncꞌutu chewach chi ni katzij wiꞌ chi ok apóstol xin Cristo. Ja kas nkajoꞌ chewe chi neban ja rutzil. Queriꞌ nkajoꞌ chewe masqui ja rajoj xkotzꞌati caniꞌ mta ja poder xin Cristo pa kakꞌaꞌ.

⁸ Queriꞌ nbij chewe como ajoj mta moda ja cꞌo ta xtikaban ja matucꞌam riꞌ ruqꞌuin ja utzlaj tzij xin Jesucristo pro solo ja nucꞌam riꞌ ruqꞌuin jariꞌ nkaban.

⁹ Como ajoj congana nokquicoti ja tok ma rjawaxic ta nkacoj chewij ja poder xin Cristo ja cꞌo pa kakꞌaꞌ in tok cꞌo poder ewqꞌuin chi rbanic ja rutzil. Congana kamajon rbanic orar pan ecuenta utzcꞌa chi nqꞌuiyi in nwachini ja rutzil xin Dios pa tak ewanma.

¹⁰ Rmalcꞌariꞌ ja tok cow xixnuchap jutzꞌit chipan awaꞌ jun carta ja ntakel ewqꞌuin riꞌ como ja tok xquinekaj ewqꞌuin xa ma quiꞌil ta ja wi cow nixnuchap na in ncoj na chewij ja poder ja yaꞌon pa nukꞌaꞌ rmal ja kajaw Jesucristo. Como jariꞌ poder yatajnak chwe chi ncoj chi etoꞌic utzcꞌa chi nixqꞌuiyi, ma rmal ta chi nixnuyoj.

¹¹ Camic nbij chewe wachꞌalal, quixquicoti. Techomarsaj cꞌa ja ma utz ta jeꞌe ja remajon rbanic, Dios ta xtiyukban ecꞌuꞌx, xta jun neban, maxta sícꞌ chꞌaꞌoj teban. Ja wi nenimaj ja cꞌa xinbij kaj chewe riꞌ jariꞌ nqꞌuejeꞌe ja Dios ewqꞌuin, arjaꞌ nyowi ja rajoben riꞌil pa tak kanma, arjaꞌ nyowi ja quicotemal.

¹² Teyaꞌaꞌ rutzil ewach chibil tak ewiꞌ pro ruqꞌuin ta ja rajoben riꞌil xin Dios.

¹³ Canojel ja re xin Dios ja recꞌo wqꞌuin ejeꞌeꞌ nquetakel rutzil ewach.

¹⁴ Ja rutzil ja nsipaj ja kajaw Jesucristo rachbil ja rajoben riꞌil xin Dios jariꞌ xtiqꞌuejeꞌ ta ewqꞌuin ewanojelal in xtiqꞌuejeꞌ ta ja rEspíritu Santo ewqꞌuin chakajaꞌ, xta jun xtuban chewe ewanojelal. Amén.