2 Corintios 11 - Tz'utujil (Ja Cꞌacꞌa Chominem)

¹ Ja cꞌa nwajoꞌ chewe camic, tiqꞌuejeꞌ jutzꞌit epaciencia chi rcꞌaxaxic ja jun caꞌiꞌ tzij ja xtinbij chewe riꞌ. Masqui xa ma chꞌobolic tak tzij ta pro kas quinecochꞌoꞌ ja xtinbij chewe.

² Pro ja tzij ja xtinbij chewe riꞌ ma chaka ta ngana nbij chewe, rumac ja yatajnak chwe rmal ja Dios chi congana nixtiꞌon chwe, matinwajoꞌ ja junwiꞌ chi ta xtiyukeꞌ wiꞌ ecꞌuꞌx. Queriꞌ nbij chewe como anin solo tre ja Cristo xixnujach wiꞌ chi solo ruqꞌuin arjaꞌ nyukeꞌ wiꞌ ecꞌuꞌx utzcꞌa ja tok xtipi chic jutij arjaꞌ bien chꞌajchꞌoj ja rewanma nixnuban presentar chwach como caniꞌ nba̱n presentar jun kꞌapoj xtan chwach ja rchajil.

³ Pro ja ranin nxbej wiꞌ, nurkaj chwe ja ban tre ja Eva ojer tok ban engañar rmal ja cumatz como ja cumatz congana listo, matzij xa queriꞌ xtiban chic chewe ixix in junwiꞌ chic xtechꞌob in ma ruyon chi ta ruqꞌuin ja Cristo xtiyukeꞌ wiꞌ ecꞌuꞌx.

⁴ Queriꞌ nbij chewe como ixix chaka quiꞌ chewe ja tok ecꞌoli winak neꞌekaj ewqꞌuin, nqueyaꞌ rbixic jun Jesús chewe ja junwiꞌ chi na chwach ja kayaꞌ rbixic ajoj chewe. In jun chic, chaka quiꞌ chewe wi noc jun chic espíritu chewe ja junwiꞌ chi na chwach ja rEspíritu Santo ja xoc chewe nabey. In jun chic, chaka quiꞌ chewe chakajaꞌ wi nenimaj jun chic tijonem ja utzlaj tzij xin Jesucristo neꞌxi, pro xa junwiꞌ chi na chwach ja xenimaj nabey.

⁵ Pro jariꞌ winak ja nquenaꞌ kaj chi congana e nimak tak apóstol pro jariꞌ ma nimak ta quekꞌij chinwach anin.

⁶ Anin ja tok nintzijoni masqui maquincowini nban rbanic ja tzij pro ja rtzobal Dios jariꞌ bien chꞌobtajnak mwal in mta ariꞌ ja maquita kakꞌalasan chi utz chewach ja rtzobal Dios.

⁷ Owi maxta xajan xinban nechꞌob ixix ja ma xincꞌutuj ta chewe ja ntzukbej wiꞌ tokoriꞌ tok xinyaꞌ rbixic chewe ja utzlaj tzij xin Dios. Como anin ruqꞌuin nukꞌaꞌ xinsamaji utzcꞌa chi ixix newil ja totajem xin Dios.

⁸ Cꞌo jeꞌe xincꞌam pwok chique ja kachꞌalal ja recꞌo chipan juleꞌ chic iglesia utzcꞌa chi nixntijoj ixix tre ja rtzobal Dios. Ejeꞌeꞌ xeyoꞌ chwe ja xintzukbej wiꞌ.

⁹ Ja cꞌa tok xinqꞌuejeꞌ checojol ixix in tok cꞌo rjawaxic chwe ni majun chewe cꞌo ta xincꞌutuj ta tre como ja kachꞌalal ja recꞌo waweꞌ chipan ja departamento Macedonia ejeꞌeꞌ xebe wqꞌuin xequiyaꞌaꞌ chwe nak ja cꞌo rjawaxic chwe. Queriꞌ xinban, ni majun nak ta xinyaꞌ ta chi ekul ja xintzukbej wiꞌ in niquirwariꞌ xtinban chwak cabij chakajaꞌ.

¹⁰ Ni katzij wiꞌ ja xtinbij chewe riꞌ como ja Cristo arjaꞌ cꞌo wqꞌuin chi rbixic. Ixix ja rixcꞌo chipan ja departamento Acaya mta jun chewe xtikꞌilo ta wxin chi rbixic chi majun nak ta nyaꞌon ta chi ekul ja ntzukben wiꞌ.

¹¹ Pro ¿nak tre ja tok nbanon queriꞌ chewe nechꞌob ixix? ¿La xa rmal chi maquixwajoꞌ? Ma queriꞌ ta wachꞌalal, ja Dios arjaꞌ bien rotak chi nixwajoꞌ.

¹² Pro caniꞌ nbanonto tre ja ntzukbej wiꞌ niquirwariꞌ xtinban chwak cabij utzcꞌa chi mta quibase ja juleꞌ chic winak ja ncajoꞌ nquibij chi junan rbanic ja samaj ja nqueban ejeꞌeꞌ ruqꞌuin ja caniꞌ nkaban ajoj como ejeꞌeꞌ congana nqueyaꞌ rukꞌij ja samaj ja nqueban.

¹³ Como ejeꞌeꞌ riꞌ winak e apóstol necheꞌxi, pro ma e apóstol ta xin Cristo, ejeꞌeꞌ e juleꞌ ajsamajelaꞌ ja xa e banol tak engaño, xa nquecoj quiꞌ como apóstol rxin ja Cristo pro ma katzij ta.

¹⁴ Pro maxta kas ncꞌascꞌoꞌi tecꞌwaxaj ja cꞌa xinbij chewe riꞌ como ja Satanás arjaꞌ xa banol engaño chakajaꞌ, nucoj riꞌ como jun ángel ja nsakirsan kabey chikawach.

¹⁵ Rmalcꞌariꞌ tok nbij chewe, maxta kas ncꞌascꞌoꞌi tecꞌwaxaj ja tok ja rajsamajelaꞌ rxin ja Satanás nquecoj quiꞌ como juleꞌ ajsamajelaꞌ ja re banol tak utzil pro xarwariꞌ nerilaꞌ na jun kꞌij ja tok xtiyataj na jun rtojbalil chique janiꞌ ja ritzelal quibanon.

* * * * * * * * * *

¹⁶ Camic nbij chic jutij chewe, kas quinecochꞌoꞌ ja jun caꞌiꞌ tzij ja xtinbij chewe riꞌ. Maxta cꞌo jun chewe tuchꞌob chwij chi xa ma in chꞌobol ta. Nowi nechꞌob chwij chi xa ma in chꞌobol ta pro teyaꞌaꞌ jutzꞌit ewxquin tre ja xtinbij chewe como caniꞌ xeyaꞌ ewxquin tre ja quibij chewe ja juleꞌ chic winak ja xa ma e chꞌobol ta. Como anin nwajoꞌ nyaꞌ jutzꞌit nukꞌij chewach chakajaꞌ.

¹⁷ Pro ma queriꞌ ta tzijoni ja kajaw Jesucristo ja caniꞌ nintajini nintzijoni camic como ja nmajon rbanic camic xa nintajini nmajon ryaꞌic nukꞌij ja caniꞌ nuban jun achi ja xa ma chꞌobol ta nuban.

¹⁸ Como e qꞌuiy ja winak ja xa nqueyaꞌ quekꞌij rmal ja reꞌocnak wiꞌ waweꞌ chwachꞌulew chewiꞌ cꞌa tok anin chakajaꞌ nyaꞌ na jutzꞌit nukꞌij camic.

¹⁹ Can nyaꞌ na jutzꞌit nukꞌij como ixix kas nixquicoti neyaꞌ caso chique winak ja tok xa ma e chꞌobolic tak winak ta como kas jakal ewiꞌ chi rcꞌaxaxic ja nquibij chewe.

²⁰ Como ixix chaka quiꞌ chewe ja tok wi cꞌo jun winak ja chaka nixruban mandar in nuban chewe ix caniꞌ esclavo pa rukꞌaꞌ, owi nuqꞌuis chewach nojel ja cꞌol ewqꞌuin, owi nlakꞌaj ja renakun, owi nucoj riꞌ ruyon chi congana nim rukꞌij arjaꞌ chewach ixix, owi nuyaꞌ kꞌaꞌ xeꞌ tak ewey.

²¹ Ja cꞌa rajoj kas qꞌuixbal nnaꞌ nbij chewe chi xa ok débil como ma xokcowin ta kaban ta queriꞌ chewe. Pro ja camic nbij chewe, ejeꞌeꞌ riꞌ winak xa nak ta ja nquibij chewe ja nquiyabej quekꞌij chewach jariꞌ nincowini nbij anin chewe chakajaꞌ ja nyabej nukꞌij chewach xarwariꞌ ja nintajini nbij chewe camic xa caniꞌ ma in chꞌobol ta.

²² Ejeꞌeꞌ kas nqueyaꞌ quekꞌij chi e Hebreo pro anin chakajaꞌ in Hebreo. Ejeꞌeꞌ kas nqueyaꞌ quekꞌij chi e aj Israel pro anin chakajaꞌ in aj Israel. Ejeꞌeꞌ kas nqueyaꞌ quekꞌij chi e riy rumam can ja rAbraham pro anin chakajaꞌ in riy rumam can ja rAbraham.

²³ Ejeꞌeꞌ kas nqueyaꞌ quekꞌij chi e ajsamajelaꞌ rxin ja Cristo pro anin más chi na in ajsamajel chiquewach ejeꞌeꞌ rxin ja Cristo. Pro ja nintajini nbij chewe camic riꞌ caniꞌ xa ma in chꞌobol ta. Anin más chi na samaj xin Cristo nbanon, qꞌuiylaj mul inrapan rmal ja rtzobal Dios, qꞌuiylaj mul inqꞌuejenak pa cheꞌ in qꞌuiylaj mul jutzꞌit laj xincamsaxi.

²⁴ Ja wach tak aj Israel ejeꞌeꞌ xinquirapaj tzaꞌn asial, ja jutaktij treintinueve rab asial queyaꞌ chwe in joꞌoꞌ mul ja queban queriꞌ chwe.

²⁵ Oxmul banon chwe xcꞌaꞌy xinrapbexi in xinban jutij xinqꞌuia̱k tzaꞌn abaj. Oxmul xinbe pa yaꞌ rmal ja lancha jokꞌtaji parwiꞌ yaꞌ. In xinban jutij jun kꞌij in jun akꞌaꞌ xinqꞌuejeꞌ pa ncꞌaj mar.

²⁶ Qꞌuiy ja viaje nbanon in ni cꞌo wiꞌ rcꞌayewal xinwil chipan. Cꞌo rkan tak yaꞌ xinruyaꞌ pa rcꞌayewal, ecꞌoli ja ralakꞌomaꞌ xinqueyaꞌ pa rcꞌayewal, ecꞌoli ja wach tak aj Israel xinqueyaꞌ pa rcꞌayewal, ecꞌoli ja ma e aj Israel ta xinqueyaꞌ pa rcꞌayewal. Cꞌo jeꞌe xinwil ja rcꞌayewal pa tak tinamit, cꞌo jeꞌe xinwil ja rcꞌayewal pa tak lugar ja bar ma ecꞌo ta wiꞌ winak, cꞌo jeꞌe xinwil ja rcꞌayewal parwiꞌ mar. Cꞌo jeꞌe chakajaꞌ xinqueyaꞌ pa rcꞌayewal ja winak ja nebini chi e kachꞌalal pro ma katzij ta ja nquibij.

²⁷ Congana jun samaj nbanon in congana xinrcosaj chakajaꞌ. Qꞌuiylaj mul ja ma xinwar ta chakꞌaꞌ, xintij waꞌal chakichiꞌ. Qꞌuiylaj mul ja ma xinwaꞌ ta, xintij pokon rmal tew in ja ntziak kas tak lawuloꞌ chwij.

²⁸ Cꞌa cꞌo na más ja rinkꞌaxnak chipan pro ma ruyon tariꞌ como kꞌij kꞌij ni cꞌo wiꞌ chi nukul chi nenuban cuenta nojel ja riglesia.

²⁹ Ja wi cꞌo jun kachꞌalal yawaꞌ jariꞌ nnaꞌ kaj chi caniꞌ anin jun in yawaꞌ chakajaꞌ. Ja cꞌa wi cꞌo jun kachꞌalal ntakchiꞌixi in wi nkaji pa il mac rmal jariꞌ congana ntiꞌon chwe anin chakajaꞌ.

³⁰ Ja wi kas puersa na chi nyaꞌ nukꞌij chewach mejor quewaꞌ nban riꞌ, nojel ja nbanon ja ncꞌutuwi chi xa in jun achi in débil jariꞌ nyabej nukꞌij.

³¹ Ja Dios ja Tatixel rxin ja kajaw Jesucristo arjaꞌ bien rotak chi ni katzij wiꞌ ja nmajon rbixic chewe, arjaꞌ janila nim rukꞌij chijutij.

³² Ja tok xinqꞌuejeꞌ pa Damasco cꞌo jun gobernador ja samaji chipan ja gobierno rxin ja rey Aretas. Ja cꞌa gobernador arjaꞌ xuyaꞌ orden chi nchajixi ja tinamit utzcꞌa chi ninchapi.

³³ Pro xintoꞌel wiꞌ pa rukꞌaꞌ como xinya̱ꞌ pa jun chacach in xinkajsaxto pa jun wantana trij ja tabia ja rsutin riꞌ trij ja tinamit.