2 Corintios 1 - Tz'utujil (Ja Cꞌacꞌa Chominem)

¹ Anin ja rin Pablo, Dios ryaꞌon chwe chi inocnak apóstol rxin ja Jesucristo. Anin wachbil ja kachꞌalal Timoteo ntzꞌibaj jawaꞌ carta riꞌ in ntakel ewqꞌuin wachꞌalal ja nemol ewiꞌ pa rubiꞌ ja Dios chipan ja tinamit Corinto. In ntakel cuqꞌuin chakajaꞌ canojel ja kachꞌalal ja re xin Dios ja recꞌo chipan ja juleꞌ chic tinamit ja cꞌo chipan ja departamento Acaya.

² Ja rutzil ja nsipaj ja Dios chake rachbil ja quicotemal xin Dios ja ta riꞌ xtecochij más tre ja katataꞌ Dios in tre ja kajaw Jesucristo.

* * * * * * * * * *

³ Ni ta xtiyaꞌ wiꞌ rukꞌij ja Dios, arjaꞌ Dios in Tatixel rxin ja kajaw Jesucristo, arjaꞌ jun Tatixel ja ni rxin wiꞌ chi npokonaj kawach, arjaꞌ jun Dios ja ni rxin wiꞌ chi nyukbaꞌ kacꞌuꞌx.

⁴ Ja tok nokqꞌuejeꞌ chipan ja rpokonal xa nak ta rpokonal, arjaꞌ ni nyukbaꞌ wiꞌ kacꞌuꞌx. Queriꞌ nuban chake utzcꞌa chi ajoj tok nekatzꞌat ja winak ja recꞌo chipan ja rpokonal xa nak ta rpokonal nokcowini nkayukbaꞌ quecꞌuꞌx ejeꞌeꞌ chakajaꞌ. Caniꞌ nuban ja Dios chake, arjaꞌ nyukbaꞌ kacꞌuꞌx ajoj queriꞌ cꞌa nkaban chique ja winak, ajoj nkayukbaꞌ chic quecꞌuꞌx ejeꞌeꞌ chakajaꞌ.

⁵ Congana nkatij rpokonal ja caniꞌ xuban ja Cristo pro ja tok congana rpokonal nkatij xa janiꞌ nyukbaꞌ más kacꞌuꞌx ja Dios chakajaꞌ pro xa rmal ja xa jun kabanon ruqꞌuin ja Cristo tok nuban queriꞌ chake.

⁶ Ajoj tok nkatij rpokonal jariꞌ cꞌoli rcꞌamonto chewe como nokcowini nkayukbaꞌ más ecꞌuꞌx in nixtotaj más rmal ja Dios. Ja cꞌa tok Dios nyukbaꞌ kacꞌuꞌx ajoj jariꞌ nokcowini nkayukbaꞌ chic ecꞌuꞌx ixix in nixtotaj más rmal ja Dios. Jawaꞌ ja cꞌa xinbij chewe riꞌ congana nixrutoꞌ chi rcochꞌic nojel ja rpokonal ja caniꞌ nokkꞌax ajoj chipan.

⁷ Ajoj bien kotak chi nixcowini necochꞌ como kotak chi ja tok ixix jun netij ja rpokonal jariꞌ ixix jun chakajaꞌ nyukbax ecꞌuꞌx rmal ja Dios.

⁸ Queriꞌ nbij chewe wachꞌalal como ajoj nkajoꞌ chi newotakij nak rbanic ja nimlaj rpokonal ja katij chipan ja departamento Asia, ni katzij wiꞌ chi jun nimlaj rpokonal congana lawuloꞌ, congana capuj kacꞌuꞌx rmal: —Ni nokcam wiꞌ, xokcheꞌ kaj.

⁹ Ja tok kachꞌob chi xa camíc cajal chic chikawach jariꞌ xucꞌut chikawach chi rjawaxic chi solo ruqꞌuin ja Dios nyukeꞌ wiꞌ kacꞌuꞌx, jun Dios ja nyico quixin ja camnakiꞌ chipan ja camíc, bien chꞌobtaj kumal chi mta noc wiꞌ ja xtiyukeꞌ kaj ta kacꞌuꞌx kuqꞌuin ajoj kayon.

¹⁰ Como ja Dios arjaꞌ xokrutoꞌ chipan ja camíc pro jun camíc congana lawuloꞌ, arjaꞌ rmajon katoꞌic camic in ni yukul wiꞌ kacꞌuꞌx ruqꞌuin chi nokrutoꞌ na chwak cabij chakajaꞌ.

¹¹ In ixix chakajaꞌ wachꞌalal, koꞌetoꞌoꞌ pan oración. Ja tok e qꞌuiy chewe nqueban orar pa kacuenta in tok ncꞌaxaxi ja coración rmal ja Dios in noktotaj rmal tokocꞌariꞌ e qꞌuiy chakajaꞌ nemaltioxin tre ja Dios como arjaꞌ ntoꞌo kaxin.

* * * * * * * * * *

¹² Como ajoj wachꞌalal congana nokquicoti ja mta nak ta kabanon ja xtitiꞌon ta kaconciencia rmal, chꞌajchꞌoj rij rwach ja kabanon, ni majun nak ta kawawan ta pa tak kanma. Ni quirwariꞌ ja kabanon chiquewach ja winak in pior cꞌa chewach ixix. Ma kanaꞌoj ta ajoj nkacoj pro ja rutzil ja nsipaj ja Dios chake jariꞌ nsamaji pa tak kanma chi rbanic nojel ja nkaban.

¹³ Jawaꞌ carta riꞌ ni majun engaño rcꞌan, ni queriꞌ nbij ja carta ja caniꞌ nesiqꞌuij, bien nixcowini nechꞌob ja nbij. Ja ngana anin, kas ta xtichꞌobtaj emwal chijutij.

¹⁴ Ecꞌoli chewe ja bien chꞌobtajnak chic cumal chi ajoj ok utzlaj tak ajsamajelaꞌ rxin ja Jesucristo in congana nequicot chakij, in ajoj congana nokquicot chewij ixix chakajaꞌ, in niquirwariꞌ kabanon ewqꞌuin ja tok xtipi chic jutij ja kajaw Jesús.

¹⁵ Ja tok xinchꞌob chi nban jun viaje, como cꞌo nconfianza ewqꞌuin chewiꞌ tok xinchꞌob chi ewqꞌuin ninkꞌax wiꞌ nabey in ninkꞌax chic jutij ewqꞌuin ja tok xquinmelojto. Ja ngana anin, nixquicot rmal ja caꞌmul ninkꞌax ewqꞌuin.

¹⁶ Quewaꞌ xinchꞌob riꞌ, ninkꞌax ewqꞌuin nabey cꞌacꞌariꞌ ninbe chic chipan ja departamento Macedonia cꞌacꞌariꞌ ninkꞌax chic jutij ewqꞌuin cꞌacꞌariꞌ ninetoꞌel chi ninbe chic pa Judea. Queriꞌ xinchꞌob.

¹⁷ Pro como ma xinbe ta ¿la xa ma chꞌobol ta xinban nechꞌob ixix, la xa ngana anin xinban kaj nuyon nechꞌob ixix, la xa chi nuchiꞌ cꞌo wiꞌ nechꞌob ixix ja tok xinbij chi can ninbe ewqꞌuin? Anin ma in queriꞌ ta.

¹⁸ Caniꞌ tre ja Dios arjaꞌ ni nuban wiꞌ cumplir ja ntzujuj, arjaꞌ rotak chi ma chi kachiꞌ ta cꞌo wiꞌ ja kabij chewe.

¹⁹ Como ja kayaꞌ rbixic chewe jariꞌ Jesucristo ja Ralcꞌwal Dios, queriꞌ xinban anin e wachbil ja Silvano in Timoteo. Ja Jesucristo arjaꞌ mta jutij xbij ta jun tzij ja xta chuchiꞌ cꞌo wiꞌ pro ni nuban wiꞌ cumplir ja ntzujuj.

²⁰ Queriꞌ nbij chewe como ruqꞌuin ja Jesucristo nkawil wiꞌ nojelal ja rtzujunto ja Dios chake in rmal ja Jesucristo tok nkabij amén como jariꞌ nkayabej rukꞌij ja Dios.

²¹ Ja Dios arjaꞌ okrticon chi utz ruqꞌuin ja Cristo in queriꞌ rbanon chewe ixix chakajaꞌ, okrchaꞌon chi nkaban ja rsamaj.

²² In chakajaꞌ cꞌo jun retal rcojon chake ja ncꞌutu kaxin chi ok xin Dios, cꞌoli ja rEspíritu Santo rtakonto pa tak kanma jariꞌ ocnak kaseguro chi nuyaꞌ na chake nojel ja herencia ja rtzujun chake.

²³ Chwach Dios ja xtinbij chewe riꞌ, como anin mta ngana ninbe ewqꞌuin nixenbanaꞌ ta castigar xa chewiꞌ ja tok ma xinbe ta ewqꞌuin pa Corinto.

²⁴ Pro maxta techꞌob chakij chi ajoj nkajoꞌ nixkaban mandar tre ja yukulbal ecꞌuꞌx ruqꞌuin ja Jesucristo, ma queriꞌ ta, como xa rmal ja yukulbal ecꞌuꞌx ruqꞌuin chewiꞌ tok cow ixpaꞌli camic. Pro ja kamajon rbanic jariꞌ noktajini noksamaji pan ecuenta utzcꞌa chi newil más ja quicotemal xin Dios.