1 Timoteo 4 - Tz'utujil (Ja Cꞌacꞌa Chominem)

¹ Pro ni kꞌalaj wiꞌ ja nbij ja rEspíritu Santo chi nerilaꞌ na jun tiempo ja tok ecꞌoli ja nqueyaꞌ can ja utzlaj tijonem xin Jesucristo. Ejeꞌeꞌ neba̱n na engañar cumal ja ritzel tak espíritu in nquinimaj juleꞌ itzel tak tijonem quixin demonio.

² Jawaꞌ tijonem nyaꞌi cumal juleꞌ winak ja xa cacaꞌ quipalaj, xa e tzꞌakol tak tzij in matitiꞌon chique ja ritzelal nqueban.

³ Jawaꞌ winak nquibij chi xajan natcꞌuleꞌe in nquibij chakajaꞌ chi cꞌo jeꞌe ja xajan ntiꞌi. Queriꞌ nquibij pro ja Dios arjaꞌ tzꞌucarsyon nojel chi nkatiꞌ in nrajoꞌ chi nkamaltioxij tre. Jariꞌ nrajoꞌ chake ja yukul kacꞌuꞌx ruqꞌuin ja kotak ja utzlaj tijonem xin Jesucristo.

⁴ Como nojel ja nkatiꞌ arjaꞌ Dios tzꞌucarsyon in ni utz wiꞌ nojelal ja rtzꞌucarsan ja Dios. Rmalcꞌariꞌ tok ma yatal ta chakij nkabij chi xajan ntiꞌi. Ja yatal chakij katiꞌaꞌ in kamaltioxij tre ja Dios.

⁵ Como ja Dios arjaꞌ nuban bendecir ja nkatiꞌ rmal ja rtzobal nkanataj in rmal chakajaꞌ ja roración nkaban.

* * * * * * * * * *

⁶ Jawaꞌ ja xintzꞌibaj riꞌ wi xqueꞌatijoj ja kachꞌalal tre jariꞌ at jun utzlaj ajsamajel rxin ja Jesucristo. In natqꞌuiy más rmal ja rtzobal Dios ja rcꞌamonto ja yukulbal kacꞌuꞌx ruqꞌuin ja Jesucristo jariꞌ ja utzlaj tijonem animan.

⁷ Pro ma tayaꞌ ta rukꞌij ja juleꞌ historia ja xa winak ewinakarsyon nixtacꞌa ja ta ja rojer tak tzij ja nquibij rijaꞌ ja mta rcꞌamonto chake. Ja naban quewariꞌ, ni tatijoj wiꞌ awiꞌ tre ja nrajoꞌ ja Dios chawe chi naban.

⁸ Ja chique winak ja neꞌetzꞌani tok nquitijoj pon quiꞌ cꞌoli noc wiꞌ pro jariꞌ xa nkꞌaxi. Pro ja tok natijoj awiꞌ tre ja nrajoꞌ ja Dios chawe chi naban jariꞌ cꞌoli noc wiꞌ pro matikꞌaxi como cꞌoli noc wiꞌ tre ja kacꞌaslemal waweꞌ chwachꞌulew in tre chakajaꞌ ja utzlaj cꞌaslemal ja xtekawilaꞌ na chilaꞌ chicaj.

⁹ Jawaꞌ ja xintzꞌibaj riꞌ ni katzij wiꞌ in yatal chique canojelal ja winak chi nquinimaj.

¹⁰ Rmalcꞌariꞌ tok nkaban ja rsamaj Dios in nkatij rpokonal rmal como bien kotak chi ja Dios arjaꞌ ni nokrutoꞌ na wiꞌ in rmalcꞌariꞌ nokquicoti in kayben. Arjaꞌ Dios cꞌaslic Dios in nerutoꞌ canojelal ja winak pro arjaꞌ más na Toꞌonel kaxin ja yukul kacꞌuꞌx ruqꞌuin ja Jesucristo.

¹¹ Nojel awaꞌ ja xintzꞌibaj riꞌ jariꞌ rjawaxic chi neꞌatijoj ja kachꞌalal tre in nabij chique chi nquinimaj.

¹² Ja winak maxta ma catquinimaj ta xa rmal ja cꞌa at cꞌajol na. Pro ja naban, tacꞌutuꞌ ja rawutzil chiquewach ja kachꞌalal in ja naban quewariꞌ, ni utz wiꞌ nojel ja nabij in nojel ja naban chiquewach ja winak. In chakajaꞌ tiqꞌuejeꞌe ja rajoben riꞌil xin Dios pan acꞌaslemal, ja rEspíritu Santo ni ta arjaꞌ wiꞌ xtucꞌan awxin, ni tiyukeꞌ wiꞌ acꞌuꞌx ruqꞌuin ja Jesucristo in ni ta chꞌajchꞌoj wiꞌ ja rawanma.

¹³ Anin ninbe na awqꞌuin pro ja nwajoꞌ chawe, ni tasiqꞌuij wiꞌ ja rtzobal Dios chiquewach ja kachꞌalal tok nquemol quiꞌ, tayukbaꞌ quecꞌuꞌx in neꞌatijoj.

¹⁴ Ma tatzꞌilaꞌ ta tabanaꞌ cuenta ja rutzil ja yatajnak chawe rmal ja Dios tokoriꞌ tok ja ranciano xeꞌucꞌax rmal ja Dios in queyaꞌ quekꞌaꞌ pan awiꞌ tokoriꞌ yataj chawe ja rutzil rmal ja Dios chi natoc jun ajsamajel rxin.

¹⁵ Jawaꞌ ja xintzꞌibaj riꞌ nojel awanma tabanaꞌ utzcꞌa canojel ja winak nqueyaꞌ cuenta chawe chi rmajon qꞌuiyem ja yukulbal acꞌuꞌx ruqꞌuin ja Jesucristo.

¹⁶ Tabanaꞌ cuenta ja racꞌaslemal in tabanaꞌ cuenta ja tijonem ja nayaꞌ chique ja winak chakajaꞌ. Nojel ja xintzꞌibaj chawe maxta tayaꞌ can. Ja wi queriꞌ naban nattotaji chijutij in netotaji chakajaꞌ ja necꞌaxani ja utzlaj tijonem ja nayaꞌ chique.