1 Timoteo 3 - Tz'utujil (Ja Cꞌacꞌa Chominem)

¹ Ja wi cꞌo jun kachꞌalal nyarij chi noc chajinel quixin ja kachꞌalal jariꞌ ni katzij wiꞌ chi utzlaj samaj ja nyarij.

² Pro ja rjawaxic tre quewariꞌ, utz rcꞌaslemal, majun nak ta nchapbexi. In ma e caꞌiꞌ ta ja rxjayil. Rjawaxic chi bien nuchꞌob ja nuban in nba̱n respetar. In nuyaꞌ quiposada ja neꞌekaj ruqꞌuin ja cꞌo rjawaxic chique in bien ncowini nertijoj ja kachꞌalal.

³ Ma tikꞌabar ta in ma banol chꞌaꞌoj ta. Ja rjawaxic tre cꞌo rpaciencia in chakajaꞌ maxta congana tel rucꞌuꞌx trij pwok.

⁴ In rjawaxic chakajaꞌ chi rotak nchomij ja ncꞌatzini pa rochoch in nnimax cumal ja ralcꞌwal in nba̱n respetar cumal chakajaꞌ.

⁵ Como ja wi maticowini nchomij ja ncꞌatzini pa rochoch arjaꞌ ¿nak moda ncowini nerchajij ja tinamit rxin Dios?

⁶ Ja wi cꞌo jun cꞌa ma jaruꞌ ta tiempo tinimaj ja Jesucristo jariꞌ mta moda xquerucꞌaj ta ja kachꞌalal como chaka jalal nuyaꞌ rukꞌij in nkaji pa juicio ja caniꞌ xuban ja diablo.

⁷ Ja nucꞌan quixin ja kachꞌalal rjawaxic chi nba̱n respetar cumal ja winak ja ma quiniman ta ja Jesucristo utzcꞌa ma itzel ta nbix tre utzcꞌa chi matichap rmal ja diablo.

* * * * * * * * * *

⁸ In queriꞌ chique ja diácono chakajaꞌ rjawaxic chi utz ja quicꞌaslemal utzcꞌa chi neba̱n respetar. Ja tok netzijoni tiquibij ja ni katzij wiꞌ, maxta junwiꞌ nquibij jutij in junwiꞌ chic nquibij chic jutij. Ma quekꞌabar ta. In chakajaꞌ maxta congana tel quecꞌuꞌx trij pwok in utz rchꞌaquic tiquibanaꞌ.

⁹ Rjawaxic chi nquinimaj ja rkꞌalasan ja Dios chikawach tre nojel ja rcꞌamonto Jesucristo in ni nqueyaꞌ wiꞌ caso tre tok ntzijoni ja Dios pa tak canma.

¹⁰ Rjawaxic chi utz ntzꞌati ja quicꞌaslemal, ja wi queriꞌ utz neꞌoc diácono.

¹¹ In chique ja rixokiꞌ chakajaꞌ rjawaxic chi utz ja quicꞌaslemal utzcꞌa chi neba̱n respetar in ma e banol molon tak tzij ta in bien nquechꞌob ja nqueban in ni nqueban wiꞌ cumplir ja nbix chique.

¹² Ja diácono rjawaxic chi ma e caꞌiꞌ ta ja quixjayilal in cotak nequipaxbaj ja calcꞌwal in nquichomij ja ncꞌatzini pa tak cochoch.

¹³ Como ja diácono wi utz nqueban tre ja quisamaj más na nya̱ꞌ quekꞌij in más na nqꞌuiyi ja yukulbal quecꞌuꞌx ruqꞌuin ja Cristo Jesús in rmalariꞌ matiquixbej quiꞌ netzijon cuqꞌuin winak.

* * * * * * * * * *

¹⁴ Anin nwajoꞌ ninbe awqꞌuin chanim pro maxla cꞌamalo xquinekaji in rmalariꞌ tok ntakel ja carta awqꞌuin riꞌ.

¹⁵ Queriꞌ nban utzcꞌa chi nawotakij nak rjawaxic tre ja quicꞌaslemal ja tinamit xin Dios, ejeꞌeꞌ riꞌ ja riglesia rxin ja cꞌaslic Dios. Como ja quisamaj ejeꞌeꞌ nqueban cuenta ja utzlaj tzij xin Jesucristo in matiqueyaꞌ lugar chique ja winak ja necꞌutu chic juleꞌ tijonem ja junwiꞌ chi na.

¹⁶ Ni katzij wiꞌ chi congana nim rukꞌij ja rkꞌalasan chikawach ja Dios tre nojel ja rcꞌamonto ja Jesucristo. Quewaꞌ ja rkꞌalasan chikawach riꞌ. Ja Dios qꞌuejeꞌ waweꞌ chwachꞌulew, xoc kach winak. Kꞌalasax rmal ja rEspíritu Santo chi ni katzij wiꞌ nojel ja xbij tok qꞌuejeꞌ waweꞌ. In tzꞌat cumal ja ángel. Yaꞌ rbixic chique ja winak pa tak nación jeꞌe. In ecꞌoli chique ja winak nojel rwachꞌulew quinimaj. In joteꞌ pa gloria chilaꞌ chicaj. Queriꞌ ja rkꞌalasan chikawach ja Dios.