1 Timoteo 1 - Tz'utujil (Ja Cꞌacꞌa Chominem)

¹ Anin in Pablo ntzꞌibajel chawe ja carta riꞌ Timoteo. Anin in apóstol rxin ja Jesucristo. Jariꞌ nsamaj yaꞌon chwe rmal ja Dios ja Toꞌonel kaxin in rmal ja kajaw Jesucristo chakajaꞌ, arjaꞌ ryukulbal kacꞌuꞌx.

² Ja cꞌa ratat Timoteo at ncꞌajol chwach Dios. Ja rutzil ja nsipaj ja Dios chake rachbil ja quicotemal xin Dios ja tariꞌ xtacochij más tre ja katataꞌ Dios in tre ja kajaw Jesucristo. Ejeꞌeꞌ ta xtiquipokonaj awach.

* * * * * * * * * *

³ Atat awotak ja xinbij can chawe ja tok xinpeti waweꞌ pa Macedonia. Ja xinbij can chawe chi ecꞌo jujun ja tijonem nqueyaꞌ ma junan ta ruqꞌuin ja caniꞌ nkayaꞌ ajoj in xinbij can chic chawe chakajaꞌ chi natqꞌuejeꞌ can pa Efeso chi nachꞌaꞌ chique utzcꞌa chi ma tiqueyaꞌ ta más.

⁴ In chakajaꞌ xinbij can chawe chi nabij chique chi ma tiqueyaꞌ ta rukꞌij juleꞌ historia in ojer tak tzij quixin ja katiꞌt kamamaꞌ, juleꞌ historia ja mta qꞌuisic trij ja xa winak ewinakarsyon. Nojel ariꞌ mta noc wiꞌ. In mta rcꞌamonto chake tre ja más na nkanimaj ja nrajoꞌ Dios chake chi nkaban in nixtacꞌa tre ta chakajaꞌ ja nqꞌuiyi ja yukulbal kacꞌuꞌx ruqꞌuin.

⁵ Ja xintzꞌibaj chawe riꞌ ja ngana anin chi canojel ja kachꞌalal ncajoꞌ ta quiꞌ. In ja nrajoꞌ chi nawajoꞌ awiꞌ quewariꞌ, cꞌo jun utzlaj anma awcꞌan, ni majun nak ta ntiꞌon pan awanma in ni katzij wiꞌ chi cꞌo yukulbal acꞌuꞌx ruqꞌuin ja Dios.

⁶ Pro ecꞌo jujun ja queyaꞌ can ja nawajoꞌ awiꞌ in xesach rmal juleꞌ tzij ja mta noc wiꞌ.

⁷ Congana nel quecꞌuꞌx trij chi ncajoꞌ nequitijoj ja winak tre ja ley xin Dios ja tzꞌibtal can rmal ja Moisés. Ejeꞌeꞌ riꞌ netzijoni pro xa ma cotak ta ja nquibij in nixtacꞌa chꞌobtajnak ta cumal chakajaꞌ ja tijonem ja nqueyaꞌ chique ja winak.

⁸ Bien kotak chi ni utz wiꞌ ja ley pro wi utz rcojic nkaban.

⁹ Pro kotak chakajaꞌ chi ja ley maqueruchap ja winak ja mta quil. Ja neruchap ja ley caniꞌ chique ja winak ja mta quigana ruqꞌuin ja ley in matiquinimaj, in caniꞌ chique ja matiquixbej quiꞌ chwach ja Dios ja xa más na il mac nqueban, in chique chakajaꞌ ja winak ja mta Dios pa tak canma in mta quigana ruqꞌuin ja rsamaj in chique ja nequicamsaj quitataꞌ queteꞌ in chique canojelal ja camsanelaꞌ,

¹⁰ in chique achiꞌiꞌ ja nemacun cuqꞌuin ixokiꞌ, in chique achiꞌiꞌ ja nemacun cuqꞌuin cach tak achiꞌiꞌ, in chique ja nequechap winak chi nequilakꞌaj, in chique ja nebanowi jolon tak tzij in chique canojel ja tzꞌakol tak tzij. In canojel ja winak ja xa itzel nquetzꞌat ja utzlaj tijonem xin Dios ejeꞌeꞌ necha̱p rmal ja ley chakajaꞌ.

¹¹ Jawaꞌ utzlaj tijonem xa junan ruqꞌuin ja utzlaj tzij xin Jesucristo in Dios xuyaꞌ chwe ja nsamaj chi nenyaꞌaꞌ rbixic ja utzlaj tzij. Ja utzlaj tzij jaꞌ ncꞌutu chikawach nak rbanic ja Dios chi arjaꞌ congana utz in kas nim rukꞌij. Ja Dios ruqꞌuin arjaꞌ winakarnakto wiꞌ ja quicotemal.

* * * * * * * * * *

¹² Ja kajaw Cristo Jesús xuyaꞌ chwe ja wachokꞌakꞌ chi nban ja rsamaj, congana nmaltioxij tre como arjaꞌ cꞌo rconfianza wqꞌuin in xuyaꞌ chwe chi xinoc ajsamajel rxin.

¹³ Queriꞌ xuban chwe masqui anin nabey xa itzel xintzijon tre, xinban pokon chique ja xeniman rxin in xintzꞌuj. Pro ja Dios arjaꞌ xpokonaj nwach como anin ma wotak ta ja xinban como jariꞌ tiempo ma nniman ta ja Jesucristo.

¹⁴ In ja kajaw Jesucristo congana xinrajoꞌ masqui in ajꞌil in ajmac in xuyaꞌ chwe chi yukeꞌ nucꞌuꞌx ruqꞌuin in xwinakarsaj ja rajoben riꞌil xin Dios pa ncꞌaslemal como jariꞌ nyataj chawe ja tok nojel acꞌuꞌx nanimaj ja Cristo Jesús.

¹⁵ Ja Cristo Jesús arjaꞌ pi waweꞌ chwachꞌulew chi katoꞌic ja rok ajꞌil ja rok ajmaquiꞌ. Jariꞌ tzij ni katzij wiꞌ in yatal chique canojelal ja winak chi nquinimaj. In anin más na nim ja wil numac chiquewach canojelal.

¹⁶ Pro ja Jesucristo arjaꞌ congana xpokonaj nwach masqui in nimlaj ajꞌil in ajmac chiquewach canojelal ja winak. Arjaꞌ xucuy ja wil numac in jariꞌ xcꞌutbej chiquewach ja winak chi cꞌo rpaciencia chi nerucuy ja rajꞌil ja rajmaquiꞌ. Queriꞌ xuban, xucuy ja wil numac jariꞌ xcꞌutbej chi ni nerucuy wiꞌ ja juleꞌ chic nak xqueniman rxin ja nquewil na ja utzlaj cꞌaslemal ja mta qꞌuisic trij.

¹⁷ Rmalariꞌ tok nbij chewe, ni ta nkaban wiꞌ respetar ja Dios in ni ta nkayaꞌ wiꞌ rukꞌij camic, chwak in chijutij. Ja Dios arjaꞌ nimlaj Rey chijutij, mta camíc trij, matitzꞌattaji, ruyon arjaꞌ Dios mchita jun queriꞌ ta, mchita jun nkꞌiꞌowi ja rnaꞌoj. Amén.

¹⁸ Timoteo, atat at caniꞌ ncꞌajol, congana nban recomendar chawe chi queriꞌ naban ja caniꞌ nuban jun utzlaj soldado, ma ticapuj ta acꞌuꞌx chipan ja rsamaj Dios. Tiyukeꞌ acꞌuꞌx ruqꞌuin ja Jesucristo, ni tayaꞌaꞌ wiꞌ cuenta tre ja tok ntzijoni ja Dios pan awanma. Caniꞌ binto chawe ojer cumal ja kachꞌalal chi natoc jun ajsamajel rxin Dios. Ja quibij ejeꞌeꞌ Dios biyon chique. Ja cꞌa riꞌ ni turkaj wiꞌ chawe, ma ticapuj ta acꞌuꞌx.

¹⁹ Como ecꞌo jujun ja matiqueyaꞌ cuenta tre ja tok ntzijoni ja Dios pa tak canma, ejeꞌeꞌ riꞌ xa qꞌuisnak chic ja yukulbal quecꞌuꞌx ruqꞌuin ja Jesucristo.

²⁰ Queriꞌ queban ja Himeneo rachbil Alejandro rmalcꞌariꞌ tok xenujach pa rukꞌaꞌ ja Satanás chi nquetij ja rpokonal. Queriꞌ xinban utzcꞌa chi ma itzel chi ta netzijon tre ja utzlaj tijonem ja rcꞌamonto ja rtzobal Dios.