1 Tesalonicenses 5 - Tz'utujil (Ja Cꞌacꞌa Chominem)1 Pro ¿nak tiempo npeti ja kajaw Jesucristo in nak kꞌij? Jariꞌ kachꞌalal ma rjawaxic ta ntzꞌibaj chewe 2 como ixix bien ewotak ja rpetbal ja kajaw Jesucristo chaka jalal tok xtipeti, ni majun otakyon caniꞌ nuban jun alakꞌom chaka jalal tok nbe nerbanaꞌ alakꞌ chakꞌaꞌ, ni majun otakyon. 3 Ja tok xajalal majaꞌn tipeti ja Jesucristo ja winak xtiquibij: —Congana quiꞌil ja tiempo okcꞌo wiꞌ riꞌ, ni majun rcꞌayewal, xquecheꞌe, pro chaka jalal tok nkajto juicio chiquij caniꞌ tre jun ixok chaka jalal tok nmajtaj rmal ja rtiꞌobal jun ti ral tok xajalal majaꞌn tiqꞌuejeꞌe. Queriꞌ xtibantaj chique, ni majun nutoꞌ riꞌ chique. 4 Pro ma queriꞌ ta chewe ixix wachꞌalal como ixix ma pa kꞌekumal ta ixcꞌo wiꞌ, mta moda cꞌa jaꞌ ta xtenaꞌ ja tok xtipeti ja kajaw Jesucristo caniꞌ tre jun alakꞌom majun otakyon tok nekaji. 5 Como ja sakil jariꞌ cꞌayon ewxin ewanojelal, ewayben ja kꞌij tok xtipeti ja Jesucristo, ma kꞌekumal chi ta cꞌayon kaxin. 6 Rmalcꞌariꞌ nbij chewe, maxta tikaban ajoj ja caniꞌ nqueban ja winak ja ma cayben ta ja kꞌij tok xtipeti ja Jesucristo caniꞌ waram quibanon pro kocꞌascꞌoti, bien kachꞌoboꞌ nojel ja nkaban. 7 Ja chakꞌaꞌ newari ja winak in ja chakꞌaꞌ nekꞌabari ja winak chakajaꞌ. 8 Pro ja rajoj ja sakil cꞌayon kaxin in rmalariꞌ tok nbij chewe, bien kachꞌoboꞌ nojel ja nkaban. Congana tiyukeꞌ kacꞌuꞌx ruqꞌuin ja Jesucristo in nkajoꞌ kiꞌ jariꞌ nkatobej kiꞌ caniꞌ nuban jun soldado cꞌoli nuyaꞌ chwarucꞌuꞌx ja ntobej riꞌ. In koquicoti chi raybexic ja katotajic jariꞌ chakajaꞌ nkatobej kiꞌ caniꞌ nuban jun soldado cꞌoli nucoj pa rwiꞌ ja ntobej rwiꞌ. 9 Como ja Dios arjaꞌ okrchaꞌon utzcꞌa chi nkawil ja totajem ja rcꞌamonto ja kajaw Jesucristo, ma xuchꞌob ta ja Dios chakij chi nokruyaꞌ pa rcꞌayewal. 10 Arjaꞌ Jesucristo cam pa kacuenta utzcꞌa wi okcꞌasli owi ma okcꞌas ta xarwariꞌ nokeqꞌuejeꞌ na ruqꞌuin chijutij. 11 Rmalcꞌariꞌ tok nbij chewe, teyukbaꞌ ecꞌuꞌx in tetoꞌoꞌ ewiꞌ utzcꞌa chi nqꞌuiy más ja yukulbal ecꞌuꞌx ruqꞌuin ja Jesucristo ja caniꞌ emajon rbanic. * * * * * * * * * * 12 Wachꞌalal, congana nkaban recomendar chewe chi neꞌeban ta respetar ja nesamaj checojol in pa rubiꞌ ja kajaw Jesucristo ejeꞌeꞌ ecꞌayon ewxin in nixquipaxbaj chakajaꞌ. 13 Lokꞌ ta neꞌenaꞌ in congana ta neꞌewajoꞌ rmal ja samaj nqueban. Xta jun neban, maxta teban sícꞌ chꞌaꞌoj. 14 In chakajaꞌ nkaban chic recomendar chewe wachꞌalal, techꞌaꞌaꞌ chique ja nquipokonaj nquetzuk quiꞌ ja maquesamaji in teyukbaꞌ quecꞌuꞌx ja capujnak quecꞌuꞌx in queꞌetoꞌoꞌ ja majaꞌn quecowir chipan ja rtzobal Dios in tiqꞌuejeꞌe ja repaciencia cuqꞌuin canojelal. 15 Tebanaꞌ cuenta ewiꞌ, maxta teyaꞌ rjil rcꞌaxel ja tok cꞌol itzel nba̱n chewe. Ja neban, ni tecꞌutuꞌ wiꞌ ja rewutzil, utz ta netzꞌat ewiꞌ in chakajaꞌ tecꞌutuꞌ ja rewutzil chiquewach canojel ja winak. 16 Quixquicoti nojel tiempo in 17 majutij tetanbaꞌ ja roración in 18 temaltioxij tre ja Dios xa nak ta ja nbantaji como jariꞌ nrajoꞌ chewe chi neban ja yukul ecꞌuꞌx ruqꞌuin ja Cristo Jesús. 19 Ma tekꞌil ta ja samaj ja nuban ja rEspíritu Santo checojol. 20 Maxta itzel tecꞌwaxaj ja mensaje ja nyaꞌi cumal ja reꞌucꞌan rmal ja Dios. 21 Tecꞌwaxaj chi utz nojel ja nbixi ja wi utz owi ma utz ta, ja cꞌa wi utz tenimaj. 22 Teyaꞌaꞌ can nojelal ja ritzelal. 23 Ja Dios arjaꞌ Yoꞌl quicotemal in ja ngana anin ni ta chijutij nixrchꞌachꞌojirsaj utzcꞌa ni majun nak ta itzel ta xtiqꞌuejeꞌ ta pa tak ewanma. In chakajaꞌ nwajoꞌ chi arjaꞌ nuban ta cuenta ja rewanma in nuban ta cuenta ja recuerpo utzcꞌa chi ni majun nixchapbexi ja tok xtipi chic jutij ja kajaw Jesucristo. 24 Arjaꞌ Dios ixrsiqꞌuin chi nixqꞌuejeꞌ pa rukꞌaꞌ, arjaꞌ ni nuban wiꞌ cumplir ja ntzujuj. * * * * * * * * * * 25 Wachꞌalal, tebanaꞌ orar pa kacuenta. 26 Teyaꞌaꞌ rutzil quewach ja kachꞌalal canojelal pro ruqꞌuin ta ja rajoben riꞌil xin Dios. 27 Pa rubiꞌ ja kajaw Dios nbij chewe, tesiqꞌuij jawaꞌ carta riꞌ chiquewach ja kachꞌalal canojelal ja re xin Dios. 28 Wachꞌalal, kas ta xtiqꞌuejeꞌe ja rutzil rxin ja kajaw Jesucristo ewqꞌuin. Amén. |
© 2010, Wycliffe Bible Translators, Inc. All rights reserved.
Wycliffe Bible Translators, Inc.