1 Tesalonicenses 3 - Tz'utujil (Ja Cꞌacꞌa Chominem)

^1-2 Ja cꞌa rajoj ma xcochꞌtaj chi ta kumal ja mchita ewach katzꞌaton nak ebanon rmalariꞌ ja tok kachomij chi katakel ewqꞌuin ja kachꞌalal Timoteo in ajoj xokqꞌuejeꞌ can pan Atenas. Ja kachꞌalal Timoteo arjaꞌ ajsamajel rxin Dios, arjaꞌ kachbil chi rbixic ja utzlaj tzij xin Jesucristo in katakel ewqꞌuin chi xixertijoj xeryukbaꞌ can ecꞌuꞌx utzcꞌa chi nyukeꞌ ecꞌuꞌx chijutij ruqꞌuin ja Jesucristo.

³ Queriꞌ kaban utzcꞌa chi majun nak ta chewe ncapuj ta rucꞌuꞌx rmal ja rpokonal ja remajon rtijic. Como ixix ewotak chi ni rjawaxic wiꞌ chi nkatij na ja rpokonal.

⁴ Ja tok xokqꞌuejeꞌ checojol kabij chewe chi nkatij na ja rpokonal in queriꞌ bantaji camic jariꞌ bien ewotak.

⁵ Rmalariꞌ ja tok ma xcochꞌtaj chi ta mwal ja mchita ewach ntzꞌaton nak ebanon in xintakel ja Timoteo ewqꞌuin chi nwotakij nak rbanon ja yukulbal ecꞌuꞌx ruqꞌuin ja Jesucristo. Queriꞌ xinban como chaka jalal tok nixrtakchiꞌij ja diablo chipan ja ritzelal in ja wi queriꞌ neban jariꞌ xa mta noc wiꞌ ja samaj kabanon checojol.

⁶ Pro ja camic melojto ja Timoteo ewqꞌuin in congana utzlaj tak tzij ja rcꞌamonto chake, xurbij chake chi ni yukul wiꞌ ecꞌuꞌx ruqꞌuin ja Jesucristo in xurbij chake chakajaꞌ chi cꞌoli ja rajoben riꞌil xin Dios pa tak ecꞌaslemal. Arjaꞌ xurbij chake chi ixix ni nokenataj wiꞌ in nokewajoꞌ in congana egana nutzꞌat riꞌ kawach ewqꞌuin. In queriꞌ chake ajoj chakajaꞌ congana kagana nkatzꞌat ewach.

⁷ Rmalariꞌ wachꞌalal ja tok kacꞌaxaj nak ja rebanon chi ni yukul wiꞌ ecꞌuꞌx ruqꞌuin ja Jesucristo congana yukyuꞌ kacꞌuꞌx rmal. Nokquicot emwal masqui okcꞌo chipan ja rcꞌayewal masqui okcꞌo chipan ja rpokonal.

⁸ Congana nokquicot emwal in más chi na quiꞌil ja kacꞌaslemal camic como kotak chic chi ni yukul wiꞌ ecꞌuꞌx ruqꞌuin ja Jesucristo.

⁹ Ja Dios arjaꞌ bien rotak chi congana nokquicot emwal in rmalariꞌ tok ma janiꞌ chi ta nokcowini nkamaltioxij tre.

¹⁰ Congana kabanon oración chi pa kꞌij chi chakꞌaꞌ, nkacꞌutuj tre ja Dios chi nutzꞌat riꞌ kawach ewqꞌuin in nkacꞌutuj tre chakajaꞌ chi nixkatijoj na más utzcꞌa chi nqꞌuiy más ja yukulbal ecꞌuꞌx ruqꞌuin ja Jesucristo.

¹¹ Ja nkajoꞌ ajoj, ja katataꞌ Dios in ja kajaw Jesucristo ejeꞌeꞌ ta netoꞌo kaxin utzcꞌa chi nokcowini nokbe ewqꞌuin.

¹² In nkajoꞌ chakajaꞌ chi ja kajaw Jesucristo nuyaꞌ ta chewe chi neban ja caniꞌ kabanon ajoj como ajoj nixkajoꞌ in queriꞌ ta neban ixix chakajaꞌ, ni ta newajoꞌ wiꞌ ewiꞌ in neꞌewajoꞌ ta canojelal ja winak chakajaꞌ.

¹³ Queriꞌ nkajoꞌ chewe utzcꞌa ja kajaw Jesús nuyaꞌ ta chewe chi ni matiqꞌuis wiꞌ ja yukulbal ecꞌuꞌx ruqꞌuin utzcꞌa chakajaꞌ tok xtipi chic jutij ja kajaw Jesucristo e rachbil canojel ja re rxin tokocꞌariꞌ nixoc chwach ja katataꞌ Dios in ni majun nak ta ja rewil nbixi pro ni chꞌajchꞌoj ja rewanma triꞌ.