1 Tesalonicenses 2 - Tz'utujil (Ja Cꞌacꞌa Chominem)

¹ Wachꞌalal, bien ewotak tok xokqꞌuejeꞌ ewqꞌuin ma chaka ta queriꞌ xokqꞌuejeꞌe pro cꞌoli rcꞌamonto chewe

² como kabij chewe ja utzlaj tzij xin Jesucristo ja rtakonto ja Dios. Queriꞌ kaban masqui nabey congana katij rpokonal chipan ja tinamit Filipos, congana lawuloꞌ ban chake, jariꞌ bien ewotak. Pro ja Dios arjaꞌ xuyaꞌ chake chi ma xkaxbej ta kiꞌ chi rbixic ja rtzobal masqui e qꞌuiy ja xechꞌaꞌo chake ja tijonem ja kayaꞌ chewe.

³ Ajoj ma oksachnak ta tre ja tijonem ja kayaꞌ chewe nixtacꞌa xixkatijoj rmal ta cꞌo ta nkajoꞌ chewe nixtacꞌa xixkaban ta engañar.

⁴ Ma queriꞌ ta kaban. Ja Dios arjaꞌ utz okrtzꞌaton in rbanon recomendar chake chi nkayaꞌ rbixic ja utzlaj tzij xin Jesucristo jariꞌ kabase tok nkabij rtzobal Dios. In ja kagana ajoj utz ta ncꞌaxaxi rmal ja Dios nojel ja nkabij masqui ja winak mta quigana ruqꞌuin como ja Dios arjaꞌ bien rotak ja cꞌo pa tak kanma ja rok winak ja wi utz owi ma utz ta.

⁵ Como ixix bien ewotak chi ajoj ma xkabij ta buen tak tzij chewe xa rmal cꞌo ta nkajoꞌ chewe. Ajoj majun nak ta kachꞌob ta kawawaj ta chewach rmal cꞌo ta nkachꞌec ta chewe. Nojel ariꞌ Dios bien rotak.

⁶ Ajoj tok xokqꞌuejeꞌ checojol ma xkacanoj ta chi neyaꞌ kakꞌij nixtacꞌa cumal chi ta juleꞌ winak. Ma ja tariꞌ kajoꞌ ta chewe masqui yatal chake chi neyaꞌ kakꞌij como ajoj okocnak apóstol rxin ja Cristo, arjaꞌ takyon kaxin.

⁷ Pro ja kaban, ma xkayaꞌ ta kakꞌij, lokꞌ xixkanaꞌ caniꞌ nuban jun teꞌej lokꞌ nerunaꞌ ja tak ral.

⁸ Congana xel kacꞌuꞌx chewij, kabij chewe ja utzlaj tzij xin Jesucristo ja rtakonto ja Dios in ma ruyon tariꞌ pro kayaꞌ kiꞌ pa camíc emwal chi nokcamsaxi. Queriꞌ kaban como congana nixkajoꞌ.

⁹ Wachꞌalal, bien ewotak chi congana samaj kaban chakajaꞌ ja katzukbej kiꞌ. Xoksamaji chi pa kꞌij chi chakꞌaꞌ chewiꞌ tok majun nak ta kayaꞌ ta chi ekul tre ja ncꞌatzin chake ja tok kabij chewe ja utzlaj tzij xin Jesucristo ja rtakonto ja Dios.

¹⁰ Ja tok xokqꞌuejeꞌ checojol wachꞌalal ni utz wiꞌ ja kacꞌaslemal caniꞌ nrajoꞌ ja Dios chake, ni majun nak ta itzel ta kaban. Jariꞌ bien ewotak in Dios rotak chakajaꞌ.

¹¹ Bien ewotak chakajaꞌ chi xixkapaxbaj chejujunal in kayukbaꞌ ecꞌuꞌx caniꞌ nuban jun tatixel nerpaxbaj ja tak ralcꞌwal.

¹² In chakajaꞌ kabij chewe chi ni neban wiꞌ ja caniꞌ nrajoꞌ ja Dios chewe chi neban como ix rxin chic ja Dios, arjaꞌ ni nixrsiqꞌuij wiꞌ chi nixqꞌuejeꞌ na chipan ja gobierno xin Dios pa gloria.

¹³ Ajoj ni nkamaltioxij wiꞌ tre ja Dios como ixix tok kabij ja rtzobal Dios chewe bien xeyaꞌ ewxquin tre, xenimaj chi rxin Dios in ma quixin winak ta. Dios nucoj ja rtzobal in camic nsamaji ja rtzobal pa tak ewanma ja yukul ecꞌuꞌx ruqꞌuin ja Jesucristo.

¹⁴ Como ixix wachꞌalal xetij ja rpokonal ja ban chewe cumal ja re ewach aj tinamit. Queriꞌ queban chakajaꞌ ja kachꞌalal ja recꞌo pa tak tinamit ja cꞌo pa rcuenta Judea ja yukul quecꞌuꞌx ruqꞌuin ja Jesucristo, ejeꞌeꞌ quetij ja rpokonal ja ban chique cumal ja cach tak aj Israel.

¹⁵ Ni quirwariꞌ quibanon ja raj Israel. Ja xebano pokon chique ja kachꞌalal ejeꞌeꞌ xecꞌutun rcamic ja kajaw Jesucristo. In chakajaꞌ e aj Israel ja xecamsan quixin ja rojer tak profeta ja cach aj tinamit. In camic e wach aj Israel chakajaꞌ ja xelasanto kaxin. Ja Dios arjaꞌ ma utz ta nutzꞌat ja nqueban. Ejeꞌeꞌ congana e quicꞌulel canojelal ja winak.

¹⁶ Cajoꞌ ta xokquekꞌil chi matikabij ja rtzobal Dios chique ja winak ja ma e aj Israel ta, maticajoꞌ chi netotaji. Queriꞌ nqueban, xa janiꞌ benak pa nim ja quil quemac in xa janiꞌ penak ryewal ja Dios chiquij.

* * * * * * * * * *

¹⁷ Wachꞌalal, ajoj oklasanto jun tiempo checojol in congana kagana nokbe chic jutij ewqꞌuin. Camic masqui matutzꞌat riꞌ kawach ewqꞌuin pro ni nixkanataj wiꞌ.

¹⁸ Ajoj kachꞌobon chi nokbe ewqꞌuin in anin qꞌuiylaj mul nchꞌobon chi queriꞌ nkaban pro ja Satanás arjaꞌ xa nuyoj ja kaviaje.

¹⁹ Wachꞌalal, ni katzij wiꞌ chi nkajoꞌ nutzꞌat riꞌ kawach ewqꞌuin como ixix congana qꞌuiy ecꞌamonto chake. ¿Nak cꞌa tre tok kotak chi cꞌo jun rtojbalil nyataj na chake? ¿Nak tre tok kotak chi nokquicot na in nya̱ꞌ na kakꞌij? Jariꞌ kotak como ixix tok xtipi chic jutij ja kajaw Jesucristo nixoc na chwach in emwal ixix tok xtiban queriꞌ chake.

²⁰ Ni katzij wiꞌ wachꞌalal congana nokquicot emwal, ixix ixocnak ix yaꞌbal kakꞌij.