1 Tesalonicenses 1 - Tz'utujil (Ja Cꞌacꞌa Chominem)

¹ Anin in Pablo e wachbil Silvano in Timoteo nkatzꞌibaj jawaꞌ carta riꞌ in nkatakel ewqꞌuin wachꞌalal ja rix iglesia ja rixcꞌo chipan ja tinamit Tesalónica. Ixix wachꞌalal xa jun ebanon ruqꞌuin ja katataꞌ Dios, xa jun ebanon ruqꞌuin ja kajaw Jesucristo. Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.

* * * * * * * * * *

² Wachꞌalal, ajoj ni nkamaltioxij wiꞌ tre ja Dios emwal ewanojel rmal ja rebanon in ni nixkanataj wiꞌ pan oración.

³ Ja tok nkaban orar ruqꞌuin ja katataꞌ Dios ni nurkaj wiꞌ chake nojel ja samaj ja rebanon rmal ja yukulbal ecꞌuꞌx ruqꞌuin ja Jesucristo. Bien nurkaj chake nojel ja rutzil ja rebanon rmal ja rajoben riꞌil xin Dios ja cꞌo pa tak ewanma in bien nurkaj chake chakajaꞌ nojel ja recochꞌon rmal ja congana nixquicoti chi raybexic ja kajaw Jesucristo.

⁴ Wachꞌalal, ja Dios congana nixrajoꞌ in ajoj kotak chi arjaꞌ xixchaꞌowi chi xixoc pa rukꞌaꞌ.

⁵ Ja tok kabij chewe ja utzlaj tzij xin Jesucristo ma ruyon tariꞌ tok kabij, jaꞌ Espíritu Santo congana xucoj rchokꞌakꞌ, congana samaji pa tak ewanma. In chakajaꞌ bien xetzꞌat chi congana yukul kacꞌuꞌx ruqꞌuin ja kabij chewe. Ja tok xokqꞌuejeꞌ checojol bien ewotak chi utzlaj ejemplo kacꞌut chewach utzcꞌa chi newotakij nak rbanic ja utzlaj cꞌaslemal.

⁶ Ja cꞌa rixix xecꞌam ja rejemplo kaxin ajoj, xecꞌam ja rejemplo rxin ja kajaw Jesucristo como queriꞌ xeban ixix ja caniꞌ kaban ajoj, xixquicoti chi rnimaxic ja rtzobal Dios masqui congana xetij rpokonal rmal. Katzij chi xixquicoti jariꞌ yatajnak chewe rmal ja rEspíritu Santo.

⁷ Queriꞌ xeban, xixoc ejemplo chiquewach canojel ja kachꞌalal ja recꞌo pa tak tinamit ja cꞌo pa rcuenta Macedonia in ja cꞌo pa rcuenta Acaya.

⁸ Queriꞌ nbij chewe como congana benak pa nim ja rtzobal Dios emwal. Xekaji pa tak tinamit ja cꞌo pa rcuenta Macedonia in xurkaji pa tak tinamit ja cꞌo pa rcuenta Acaya in ma ruyon tariꞌ pro nojel nat nakaj otakin chi wiꞌ chi congana yukul ecꞌuꞌx ruqꞌuin ja Dios. Rmalariꞌ tok ma rjawaxic chi ta nkabij chique, ejeꞌeꞌ cotak chic.

⁹ Como ejeꞌeꞌ quimajon rbixic nak rbanic tok xokekaj ewqꞌuin chi congana quiꞌil kacꞌulic xeban. In nquibij chakajaꞌ nak xeban tok xenimaj ja cꞌaslic Dios ja katzij chi Dios

¹⁰ in tok xeꞌeyaꞌ can ja cachbal tak winak in rachbal tak nakun in maquixxuqueꞌ chic chiquewach in nixquicot chic chi raybexic ja kꞌij tok xtipi chic jutij ja Ralcꞌwal Dios chilaꞌ chicaj. Arjaꞌ Jesús yataj tre rmal ja Dios chi cꞌastaji chiquicojol ja camnakiꞌ, arjaꞌ noktoꞌowi chipan ja ryewal Dios ja penak chakij.