1 Pedro 5 - Tz'utujil (Ja Cꞌacꞌa Chominem)

¹ Camic nwajoꞌ nintzijon cuqꞌuin ja recꞌayon quixin ja kachꞌalal ja recꞌo checojol como anin jun in cachbil. Anin xintzꞌat nojel ja rpokonal ja xutij ja Cristo. In anin jun chakajaꞌ xquintzꞌatowi ja Jesucristo ja tok xtipi chic jutij tokoriꞌ tok nkꞌalajin na chi congana nim rukꞌij.

² Queꞌeyukꞌuj chi utz ja rtinamit Dios. Nojel ecꞌuꞌx nojel ewanma queꞌewcꞌaj, maxta chaka ix puersa. Maxta xa rmal pwok teyarij más ja tok neꞌewcꞌaj pro kas tel ecꞌuꞌx chi cucꞌaxic.

³ Maxta chaka egana ixix queꞌeban mandar pro ja neban, teyaꞌaꞌ jun utzlaj ejemplo chiquewach.

⁴ Ja Jesucristo arjaꞌ jun Pastor arjaꞌ jun ajyukꞌ ja más nim rukꞌij in tok xtipi chic jutij tokoriꞌ xtiyataj chewe ja rtojbalil ja xtiyabex ekꞌij, jun rtojbalil ja mta qꞌuisic trij.

⁵ In ixix chakajaꞌ ja rix jóvenes, queꞌebanaꞌ respetar ja kachꞌalal ja recꞌayon ewxin. Xta jun neban ewanojel, tebanaꞌ respetar ewiꞌ, maxta teyaꞌ ekꞌij. Ja cꞌa Dios arjaꞌ itzel nerutzꞌat ja nqueyaꞌ quekꞌij pro nuyaꞌ rutzil chique ja matiqueyaꞌ quekꞌij.

⁶ Rmalcꞌariꞌ tok nbij chewe, tebanaꞌ taknoꞌy chwach ja nimlaj katataꞌ Dios utzcꞌa chi arjaꞌ nuyaꞌ ekꞌij ja tok xterilaꞌ ja tiempo.

⁷ Arjaꞌ ixrchajin chi utz rmalcꞌariꞌ tok nbij chewe, tejachaꞌ pa rukꞌaꞌ xa nak ta ja remajon rbisoxic, arjaꞌ nchomarsan chewach.

⁸ Ja cꞌa diablo ja recꞌulel arjaꞌ ntajini ncanoj nak nuban chewe caniꞌ nuban jun cój nurak ruchiꞌ tok nercanoj ja nerutij. Rmalcꞌariꞌ tok nbij chewe, kas bien techꞌoboꞌ na ja neban in quixcꞌascꞌoti.

⁹ Maxta teyaꞌ ewiꞌ tre ja diablo, ni tiyukeꞌ wiꞌ ecꞌuꞌx ruqꞌuin ja Jesucristo. Turkaj chewe chi ma eyon ta ixix ja nba̱n pokon chewe como queriꞌ nba̱n chique chakajaꞌ ja kachꞌalal ja recꞌo nojel rwachꞌulew.

¹⁰ Pro xa ma nim ta ja tiempo rxin ja rpokonal cꞌacꞌariꞌ ja Dios arjaꞌ xtuyaꞌ chewe xa nak ta ja ma tzꞌakat ta chewe, arjaꞌ ncowirsaj ja rewanma in nuyaꞌ ja rewachokꞌakꞌ in nuyaꞌ chewe chi cow nixpeꞌi, majun nak ta xquixcꞌamoꞌel ta. Arjaꞌ nojel rwach ja rutzil cꞌo ruqꞌuin in rmal ja Jesucristo tok xokrsiqꞌuij chi nokeqꞌuejeꞌ na pa gloria pro jun gloria ja mta qꞌuisic trij.

¹¹ Ni ta xtiyaꞌ wiꞌ rukꞌij, ni ta xtinatax wiꞌ chi pa rukꞌaꞌ cꞌo wiꞌ nojelal camic, chwak in chijutij. Amén.

* * * * * * * * * *

¹² Ja kachꞌalal Silvano cꞌo nconfianza ruqꞌuin rmalariꞌ tok nyaꞌel tre ja ti carta riꞌ chi nerjachaꞌ chewe. Ja xintzꞌibaj chipan ja carta chi ncowirsaj más ja rewanma, nucꞌut chewach ja rutzil ja nsipaj ja Dios ja katzij chi utzil, ni tiyukeꞌ wiꞌ ecꞌuꞌx ruqꞌuin.

¹³ Ja kachꞌalal ja recꞌo waweꞌ pa Babilonia ejeꞌeꞌ ewachbil ja rixchaꞌon rmal ja Dios in nquetakel rutzil ewach. Ja Marcos arjaꞌ ncꞌajol chwach Dios, arjaꞌ nutakel rutzil ewach chakajaꞌ.

¹⁴ Ja tok nemol ewiꞌ teyaꞌaꞌ rutzil ewach chibil tak ewiꞌ ja necꞌutbej chi newajoꞌ ewiꞌ. Kas ta xtiyataj chewe ja quicotemal xin Dios ewanojel ja xa jun ebanon ruqꞌuin ja Jesucristo. Amén.