1 Pedro 4 - Tz'utujil (Ja Cꞌacꞌa Chominem)

¹ Ja Cristo arjaꞌ como winak xutij ja rpokonal kumal. In queriꞌ ta cꞌa neban ixix chakajaꞌ ja caniꞌ xuban ja Jesucristo, techomij ewiꞌ utzcꞌa chi nixcowini necochꞌ ja rpokonal ja npi chewij. Ja wi atijon ja rpokonal waweꞌ chwachꞌulew ja npi chawij rmal ja Jesucristo jariꞌ matayaꞌ chic awiꞌ tre ja il mac chi xcatrumel chi ta.

² Ma ja chi ta nbe acꞌuꞌx trij ja chaka nojel ta nayarij pro ja nrajoꞌ ja Dios chawe chi naban nijawariꞌ naban jaruꞌ pa tiempo xcatqꞌuejeꞌ chwachꞌulew.

³ Ja winak ja ma cotak ta rwach ja Dios ejeꞌeꞌ qꞌuiy rwach ja ritzelal nel quecꞌuꞌx trij in queriꞌ xebanto ixix chakajaꞌ. Congana qꞌuixbal xebanto in tok xeban nimak tak waꞌim xixchꞌujar rmal ja tijoj yaꞌ, xerak echiꞌ, xeban sícꞌ chꞌaꞌoj in chakajaꞌ más na lawuloꞌ xeban xixxuqueꞌ chiquewach cachbal tak winak in chwach rachbal tak nakun. Pro jariꞌ matel chic ecꞌuꞌx trij camic, itzel chic netzꞌat.

⁴ Pro ja camic junwiꞌ chic nixtzꞌati cumal ja winak como ma ix cachbil chi ta chi rbanic ja ritzelal rmalcꞌariꞌ tok nquemol tzij chewij.

⁵ Pro nerilaꞌ na jun kꞌij ja tok xtiquejach na cuenta chwach ja Dios, arjaꞌ rchomin chic riꞌ chi nukꞌet tzij chiquij ja winak chi ecꞌasli chi e camnakiꞌ.

⁶ Como ja utzlaj tzij xin Jesucristo yataj rbixic chique chakajaꞌ ja re camnakiꞌ. Queriꞌ bantaji utzcꞌa chi jariꞌ nkꞌetbex tzij chiquij como winak pro nyataj lugar chique chakajaꞌ chi necꞌaseꞌ na ruqꞌuin ja Dios rmal ja rEspíritu.

⁷ Nnakajinto ja qꞌuisbal rwachꞌulew rmalariꞌ tok nbij chewe, techꞌoboꞌ chi utz ja neban, quixcꞌascꞌoti, ni ta neban wiꞌ ja roración.

⁸ Ja más rjawaxic congana tewajoꞌ ewiꞌ. Ja tok newajoꞌ ewiꞌ qꞌuiy ja nixcowini necuy rmal.

⁹ Ja tok cꞌo jun chewe tok ncꞌutuj rposada nojel ecꞌuꞌx teyaꞌaꞌ.

¹⁰ Cꞌoli ja yatajnak chewe chejujunal chi nixcowini neban ja recochin tre ja Dios. Ja yatajnak chewe ja tariꞌ netobej ewiꞌ chibil tak ewiꞌ. Qꞌuiy rwach ja yatajnak chewe ja recochin tre ja Dios, ja cꞌa wi ma quixnimari chi rbanic jariꞌ ix utzlaj tak ajsamajelaꞌ rxin ja Dios.

¹¹ Ecꞌoli chewe quicochin tre ja Dios chi necowini nqueyaꞌ mensaje, kas turkaj chique chi rtzobal Dios ja nquecoj, ma quinaꞌoj ta winak ja nquecoj. In chakajaꞌ ecꞌoli ja yatajnak chique chi necowini nequetoꞌ winak, kas turkaj chique chi ja Dios arjaꞌ yoyon chique chi necowini nequetoꞌ. Rmal ja Jesucristo chewiꞌ tok qꞌuiy rwach ja yatajnak chewe ja recochin tre ja Dios, tebanaꞌ cꞌa nojelal chi nyabex rukꞌij. Ni ta xtiyaꞌ wiꞌ rukꞌij, ni ta xtinatax wiꞌ chi pa rukꞌaꞌ cꞌo wiꞌ nojelal camic, chwak in chijutij. Amén.

* * * * * * * * * *

¹² Chakꞌlaj wachꞌalal, ixcꞌo chipan ja nimlaj rpokonal utzcꞌa chi ncꞌambajaxi janiꞌ ja yukulbal ecꞌuꞌx ruqꞌuin ja Jesucristo. Maxta quewaꞌ techꞌob kaj pa tak ewanma riꞌ: —¿Nak tre cꞌawaꞌ ja tok nba̱n pokon chake? maxta quixcheꞌe. Jariꞌ ni kaxin wiꞌ.

¹³ Ja neban, quixquicoti rmal ja yatajnak chewe chi xa jun neban ruqꞌuin ja Cristo chi rtijic ja rpokonal. Ja wi queriꞌ neban jariꞌ más chi na nixquicoti chakajaꞌ ja tok xtipi chic jutij ja Jesucristo tokoriꞌ tok nkꞌalajin na chi congana nim rukꞌij.

¹⁴ Ja wi rmal ja yukulbal ecꞌuꞌx ruqꞌuin ja Cristo tok nixtzꞌuji in tok nixyokꞌi jariꞌ cꞌoli rcꞌamonto chewe. Ja wi queriꞌ nba̱n chewe jariꞌ ni kꞌalaj wiꞌ chi cꞌol ewqꞌuin ja lokꞌlaj Espíritu Santo xin Dios. Ja nebano pokon chewe ejeꞌeꞌ xa itzel netzijon tre ja rEspíritu Santo pro ja rixix neyaꞌ rukꞌij.

¹⁵ Pro maxta xa rmal banoj camíc maxta rmal banoj alakꞌ tetij pokon owi rmal juleꞌ chic itzelal owi rmal ja chaka nemin ewiꞌ cuqꞌuin winak ja mta ekꞌaꞌ chique.

¹⁶ Ja cꞌa wi netij pokon rmal ja yukulbal ecꞌuꞌx ruqꞌuin ja Jesucristo maxta qꞌuixbal tenaꞌ pro ja neban, teyaꞌaꞌ rukꞌij ja Dios rmal ja yatajnak chewe chi netij ja rpokonal pa rubiꞌ ja Jesucristo.

¹⁷ Camic numajel ja tiempo rxin ja rpokonal. Kuqꞌuin ajoj numajel wiꞌ nabey ja rok ralcꞌwal Dios. Ja wi ajoj nkatij ja rpokonal pior cꞌa ja winak ja maticajoꞌ nquinimaj ja utzlaj tzij xin Jesucristo ja rtakonto ja Dios.

¹⁸ Ajoj ja yukul kacꞌuꞌx ruqꞌuin ja Dios noktotaji pro kas maril. Ja wi kas maril noktotaj ajoj ¿la netotaj cꞌariꞌ ja rajꞌil ajmaquiꞌ ja mta Dios pa tak canma?

¹⁹ Pro wi cꞌoli ja rpokonal netij rmal ja rvoluntad Dios maxta teyaꞌ can ja banoj utzil, ni tebanaꞌ wiꞌ in chakajaꞌ ni tiyukeꞌ wiꞌ ecꞌuꞌx ruqꞌuin ja Dios, arjaꞌ winakarsyon ewxin in ni nuyaꞌ wiꞌ ja rtzujun.