1 Pedro 3 - Tz'utujil (Ja Cꞌacꞌa Chominem)

^1-2 In ixix chakajaꞌ ja rix ixokiꞌ queꞌenimaj ja rewachajilal. Como ecꞌoli chewe ja rewachajilal ma quiniman ta ja rtzobal Dios pro ja tok nixquetzꞌat chi ewcꞌan jun utzlaj anma in cꞌol erespeto xa rmalariꞌ tok xtiqueqꞌuex ja quinaꞌoj in xtiquinimaj ja rtzobal Dios in ma kas ta rjawaxic chakajaꞌ chi xqueꞌepaxbaj ta.

³ Maxta congana tel ecꞌuꞌx trij ja newekbej ewiꞌ chwach ja newcꞌaj jun utzlaj anma. Maxta jaꞌ tel más ecꞌuꞌx trij ja rbanic rpachꞌuxic ewiꞌ owi trij nakun jeꞌe caniꞌ tre kꞌop kꞌakꞌaꞌl ja oro ocnak owi trij tziak ja nimak rjil, jariꞌ xa nkꞌaxi.

⁴ Pro ja ta neban, jun utzlaj anma newcꞌaj, jariꞌ más na buena in ni matikꞌax wiꞌ, jariꞌ más na vale nutzꞌat ja Dios.

⁵ Queriꞌ quicꞌaslemal ja rixokiꞌ ojer ja re xin Dios ja yukul quecꞌuꞌx ruqꞌuin, ejeꞌeꞌ cucꞌaj jun utzlaj anma, xequinimaj ja quichajilal.

⁶ Queriꞌ rcꞌaslemal ja Sara, arjaꞌ xnimaj ja rAbraham ja rchajil, —Wajaw, neꞌ tre, jariꞌ xbanbej respetar. Ja cꞌa rixix ix caniꞌ ral ja Sara ja wi utz ja recꞌaslemal in wi matexbej ewiꞌ chwach ja xa nak ta xtipi chewij.

⁷ In ixix chakajaꞌ ja rix achiꞌiꞌ lokꞌ queꞌenaꞌaꞌ ja rewixjayilal como ejeꞌeꞌ ma e junan ta ewqꞌuin. In chakajaꞌ junan xecochij cuqꞌuin ja rewixjayilal ja utzlaj cꞌaslemal ja mta qꞌuisic trij ja sipax chewe rmal ja Dios chewiꞌ tok rjawaxic chi lokꞌ neꞌenaꞌ. Quirtariꞌ neban utzcꞌa chi ja Dios ncꞌaxaj ja roración neban.

* * * * * * * * * *

⁸ Camic ja nwajoꞌ chewe ewanojelal xta jun neban, xta jun enaꞌoj xta jun ewanma. Titiꞌon chewe wi cꞌo jun kachꞌalal nak xkajbej. Tewajoꞌ ewiꞌ como ewachꞌalal ewiꞌ, tipokonaj riꞌ ewach, maxta teyaꞌ ekꞌij.

⁹ Ja tok nba̱n itzel chewe owi tok cꞌoli ja pokonlaj tak tzij nbix chewe maxta teyaꞌ rjil rcꞌaxel. Ja neban, tebanaꞌ ja rutzil. Ja Dios arjaꞌ xixrsiqꞌuij chi ix banol tak utzil. Queriꞌ xuban utzcꞌa chi newilaꞌ na ja rutzil ixix chakajaꞌ rmalcꞌariꞌ tok nbij chewe, ni tebanaꞌ wiꞌ ja rutzil.

¹⁰ Caniꞌ tzꞌibtal can chipan ja rtzobal Dios quewariꞌ: —Ja winak ja cꞌo quigana chi necꞌaseꞌ na más in ncajoꞌ nquewil ja utzlaj tak tiempo rjawaxic chi matiquibij itzel tak tzij in rjawaxic chakajaꞌ chi matiquetzꞌak tzij.

¹¹ Ja rjawaxic chi nqueban quewariꞌ, nqueyaꞌ can ja ritzelal in nqueban ja rutzil, rjawaxic chi nquechꞌob rij rwach nak nqueban utzcꞌa chi mta sícꞌ chꞌaꞌoj nqueban.

¹² Ja cꞌa kajaw Dios arjaꞌ nerchajij ja nebanowi ja rutzil, arjaꞌ ncꞌaxaj ja roración ja nqueban pro xa itzel nerutzꞌat ja nebanowi ja ritzelal. Queriꞌ ja tzꞌibtal can.

¹³ Majun xtibano pokon chewe ja wi nij utzil wiꞌ ja xteban.

¹⁴ Owi cꞌoli ja pokon nba̱n chewe rmal ja rutzil neban pro jariꞌ cꞌoli rcꞌamonto chewe. Ma texbej ta ewiꞌ chiquewach ja winak ja ncajoꞌ nqueban pokon chewe in ma quixoclaꞌ ta il chakajaꞌ.

¹⁵ Ja neban, teyaꞌaꞌ rukꞌij ja kajaw Dios pa tak ewanma. Techꞌoboꞌ rij rwach nak rbanic nojel ja rcꞌamonto chewe ja Jesucristo ja bar yukul wiꞌ ecꞌuꞌx. Quirtariꞌ neban utzcꞌa chi nixcowini nechꞌob chiquewach chakajaꞌ ja winak xa nak ta necꞌaxan razón chewe. Pro pan utzil techꞌoboꞌ chiquewach, maxta xa teyabej ekꞌij.

¹⁶ Maxta cꞌoli teban ja ma utz ta ja xa ntiꞌon ewanma rmal. Como ecꞌoli winak ja nquibij chewe chi: —Xa itzel quicꞌaslemal ja winak ja neniman rxin ja Cristo, necheꞌe, pro ja wi mta ja ma utz ta ebanon ejeꞌeꞌ nqueyaꞌ na queqꞌuix ja tok xtikꞌalajini chi ma katzij ta ja quibij chewe.

¹⁷ Ja tok nba̱n pokon chewe xa rmal ja rutzil ja neban pro wi queriꞌ rvoluntad ja Dios chewe jariꞌ cꞌoli noc wiꞌ ja netij ja rpokonal pro wi xa pan ewil jariꞌ mta noc wiꞌ.

¹⁸ Ja Cristo arjaꞌ ban pokon tre chakajaꞌ, camsax rmal ja kil kamac, xa jutij cami, mchita ja camíc trij. Arjaꞌ ni majun ril rumac pro cam pa kacuenta ja rok ajꞌil ok ajmaquiꞌ. Ja tok queriꞌ xuban jariꞌ xjakbej kabey chikawach chi nokekaj na ruqꞌuin ja Dios. Arjaꞌ camsaxi como winak pro cꞌastaji como espíritu.

¹⁹ In queriꞌ xuban como espíritu be cuqꞌuin ja juleꞌ espíritu ja reꞌocnak preso, xeryaꞌaꞌ rbixic ja utzlaj tzij chique.

²⁰ Ejeꞌeꞌ riꞌ espíritu quixin ja winak ja ma xquinimaj ta ja Dios ojer pa rtiempo ja Noé. Treriꞌ tiempo ja Dios congana xeraybej na chi nnimax cumal tokoriꞌ tok majtajnak rbanic ja nimlaj lancha rmal ja Noé. Xa ma e jaruꞌ ta ja xeꞌoc chipan ja lancha, xa e waxakiꞌ ja xeꞌoc chipan, ejeꞌeꞌ riꞌ xekꞌax parwiꞌ ja yaꞌ xetotaji.

²¹ In queriꞌ cꞌa chake ajoj camic chakajaꞌ como pa yaꞌ nokban wiꞌ bautizar in noktotaji. Ja bautismo ma acuerpo ta nuchꞌaj pro ja rubey tok natban bautizar jariꞌ nacꞌutbej jun chꞌajchꞌojlaj anma tre ja Dios. Queriꞌ nkaban noktotaji in xa rmal ja rcꞌastajic ja Jesucristo chewiꞌ tok noktotaji.

²² Arjaꞌ cꞌastaji, joteꞌ chilaꞌ chicaj in camic cꞌo pa riquikꞌaꞌ ja Dios. Arjaꞌ cꞌo rukꞌaꞌ chique ja ángel, cꞌo rukꞌaꞌ chique espíritu, majun kꞌetbaltzij ja maquita cꞌo rukꞌaꞌ tre.