1 Pedro 2 - Tz'utujil (Ja Cꞌacꞌa Chominem)

¹ Rmalcꞌariꞌ tok nbij chewe, teyaꞌaꞌ can jutzꞌit nojel rwach ja ritzelal. Maxta teban engaño, maxta teban cacaꞌ epalaj, maxta tiquiakiri ja rewanma, maxta teban molon tak tzij.

² Caniꞌ nuban jun ti yaquiꞌ kas nyarij rutzꞌum ja ruteꞌ quirtariꞌ chewe ixix chakajaꞌ kas tel ecꞌuꞌx trij ja chꞌajchꞌojlaj rtzobal Dios como jariꞌ majun engaño rcꞌan. Ja wi queriꞌ xteban jariꞌ nixcowir chipan ja rtzobal Dios in nixtotaji chijutij.

³ Quirtariꞌ xteban como enaꞌon chic janiꞌ rnaꞌoj ja kajaw Jesucristo chi arjaꞌ ni utz wiꞌ.

* * * * * * * * * *

⁴ In kꞌij kꞌij tiyukeꞌ más ecꞌuꞌx ruqꞌuin ja Jesucristo ja Yoꞌl cꞌaslemal. Arjaꞌ ocnak caniꞌ jun abaj ja cojon rmal ja Dios chi rbanic jun templo espiritual. Ja winak xa mta quigana ruqꞌuin pro arjaꞌ chaꞌon rmal ja Dios in congana nim rukꞌij ntzꞌa̱t rmal. In ixix chakajaꞌ ixocnak ix caniꞌ juleꞌ abaj ixcojon rmal ja Dios chi rbanic ja templo.

⁵ Ix sacerdote rxin ja Dios jariꞌ samaj yatajnak chewe utzcꞌa chi cꞌoli sacrificio ja netzujuj chwach ja Dios. Ja sacrificio netzujuj chwach jariꞌ ja rewutzil ja nwinakarsax pa tak ewanma rmal ja rEspíritu Santo. Jariꞌ netzujuj chwach pa rubiꞌ ja Jesucristo in rmalariꞌ tok utz nutzꞌat ja sacrificio ja netzujuj in nucꞌam chewe.

⁶ Caniꞌ tzꞌibtal can chipan ja rtzobal Dios quewaꞌ nbij ja Dios ja ncꞌambex tzij riꞌ: —Anin cꞌo jun lokꞌlaj abaj ja nmajon rcojic chi rbanic ja templo wxin. Chipan ja tinamit Sión ncoj wiꞌ ja rabaj. Jariꞌ abaj anin xinchaꞌowi, congana nim rukꞌij. Ja winak ja nyukeꞌ quecꞌuꞌx ruqꞌuin ejeꞌeꞌ ma xtiqueyaꞌ ta queqꞌuix pro nquewil na ja rutzil ja cayben. Queriꞌ ja tzꞌibtal can.

⁷ Ja chewe ixix ja yukul ecꞌuꞌx ruqꞌuin ja Jesucristo arjaꞌ congana nim rukꞌij. Pro ja chique ja winak ja maticajoꞌ nyukeꞌ quecꞌuꞌx ruqꞌuin ejeꞌeꞌ e junan cuqꞌuin ja banol tak jay caniꞌ tzꞌibtal can chic chipan ja rtzobal Dios ja ncꞌambex tzij quewariꞌ: —Ja rabaj ja mta quigana ja banol tak jay ruqꞌuin nijawariꞌ abaj cojon rmal ja Dios chi rbanic ja jay in más na nim rukꞌij ja rabaj como arjaꞌ nchapowi ja resquinaꞌil ja jay.

⁸ In chakajaꞌ tzꞌibtal can ja ncꞌambex tzij quewariꞌ: —Jariꞌ abaj ja winak nquechokꞌ cakan chwach, nepaji in nekaj chipan jun nimlaj rpokonal rmal, neꞌe. Queriꞌ nqueban ja winak ja maticajoꞌ nquinimaj ja rtzobal Dios, nekaj chipan jun nimlaj rpokonal jariꞌ rchominto ja Dios.

⁹ Pro ja rixix ix tinamit rxin ja Dios, ixchaꞌon rmal. Arjaꞌ xixrpartiꞌij chi neban ja rsamaj. Ix sacerdote rxin ja nimlaj Rey ja cꞌo chilaꞌ chicaj. Jariꞌ samaj yatajnak chewe utzcꞌa chi neyaꞌ rbixic ja nimlaj samaj ja rbanon ja katataꞌ Dios. Kas turkaj chewe chi arjaꞌ lasan ewxin chipan ja kꞌekumal in camic ixrcojon chic pa rcuenta arjaꞌ pa jun nimlaj sakil.

¹⁰ Ja nabey ma ix rtinamit ta ja Dios pro ja camic ix rtinamit chic. Ja nabey majun nak ta xewil ja xpokonaj ta ewach pro ja camic xewil ja Dios chi arjaꞌ xpokonaj ewach.

* * * * * * * * * *

¹¹ Chakꞌlaj wachꞌalal, kas turkaj chewe chi xa ok kꞌaxel chwachꞌulew, ma waweꞌ ta ja mero katinamit. Rmalcꞌariꞌ nbij chewe, maxta teyaꞌ lugar tre ja ritzel tak yarinem chi xquixrucꞌaj ta como ja nuban ja ritzel tak yarinem xa nchꞌojin ruqꞌuin ja rewanma, nrajoꞌ nixruchꞌec.

¹² Ja neban, tecꞌutuꞌ ja rewutzil chiquewach ja winak ja ma cotak ta rwach ja Dios. Ejeꞌeꞌ xa nquemol tzij chewij camic in nquibij chewe chi ix itzel tak winak pro nquetzꞌat na ja rutzil neban in rmalariꞌ ja tok nqueyaꞌ na rukꞌij ja Dios tok xturbanaꞌ jun nimlaj samaj chiquicojol.

¹³ Tenimaj ja kꞌetbal tak tzij nojelal como ja kajaw Dios queriꞌ nrajoꞌ chewe chi nenimaj. Caniꞌ tre ja nimlaj rey tenimaj como arjaꞌ más nim ja kꞌetbaltzij cꞌo pa rukꞌaꞌ.

¹⁴ In caniꞌ chique gobernador chakajaꞌ queꞌenimaj como ejeꞌeꞌ ecojon pa kꞌetbal tak tzij chi nequeban castigar ja winak ja nqueban ja ritzelal pro utz nqueban chique ja winak ja banol tak utzil.

¹⁵ Quewaꞌ nrajoꞌ ja Dios chewe riꞌ chi neban ja rutzil utzcꞌa chi nquekꞌil pa quechiꞌ ja winak ja ma e chꞌobolic tak winak ta tok nquijoloj jeꞌe tzij chewij.

¹⁶ Ixix ix libre pa quekꞌaꞌ ja winak pro ma ruqꞌuin ta ja rix libre chaka ta nojel ta ja ma utz ta xteban. Pro ja neban, tenimaj ja Dios como pa rukꞌaꞌ chic ixcꞌo wiꞌ camic.

¹⁷ Queꞌebanaꞌ respetar ja winak canojelal. Queꞌewajoꞌ ja kachꞌalal. Texbej ewiꞌ chwach ja Dios. Tebanaꞌ respetar ja nimlaj rey.

* * * * * * * * * *

¹⁸ Ja wi cꞌol apatrón tabanaꞌ respetar xa nak ta wi utzlaj winak owi xa cꞌaꞌn.

¹⁹ Ja tok nba̱n pokon chewe wi ma pan ewil ta, wi nurkaj chewe chi cꞌoli ja Dios ewqꞌuin in necochꞌ, ja wi queriꞌ neban jariꞌ utz.

²⁰ Ja cꞌa wi pan ewil tok nba̱n pokon chewe wi necochꞌ in wi cꞌol epaciencia pro jariꞌ ma vale ta chwach ja Dios. Pro wi rumac ja rutzil neban tok nba̱n pokon chewe ja wi necochꞌ in wi cꞌol epaciencia jariꞌ utz nixrutzꞌat ja Dios.

²¹ Xcꞌa rmalariꞌ tok xixsiqꞌuix rmal ja Dios chi neban ja rutzil in necochꞌ ja rpokonal como queriꞌ xuban ja Cristo chakajaꞌ, arjaꞌ xutij ja rpokonal pan ecuenta. Queriꞌ xuban, xuyaꞌ can jun ejemplo chi queriꞌ neban ixix ja caniꞌ xuban arjaꞌ.

²² Arjaꞌ ni majun ril rumac nixtacꞌa cꞌo ta jun xuban ta engañar.

²³ Ja tok cꞌoli ja pokonlaj tak tzij bix tre ma xuyaꞌ ta rjil rcꞌaxel. Ja tok ban pokon tre cumal ja winak arjaꞌ ma xcꞌutuj ta chi npi rcꞌayewal chiquij. Nojel ja ban tre xujach pa rukꞌaꞌ ja Dios como bien rotak chi ja Dios arjaꞌ utzlaj kꞌetoj tzij ja nuban.

²⁴ Ja Cristo arjaꞌ xrijkaj ja kil kamac chwach cruz. Queriꞌ xuban utzcꞌa chi nokel libre pa rukꞌaꞌ ja il mac in matikaban chic, utzil chic nrajoꞌ chake chi nkaban. Arjaꞌ soctaj pan ecuenta rmalcꞌariꞌ tok xixtzuri.

²⁵ Ja cꞌa rixix nabey ix caniꞌ juleꞌ tak carnelo ja retzaknak pro ja camic ixcꞌo chic pa rukꞌaꞌ ja Jesucristo, arjaꞌ chic nyukꞌun ewxin, arjaꞌ nixchajini.