1 Pedro 1 - Tz'utujil (Ja Cꞌacꞌa Chominem)

¹ Anin in Pedro in apóstol rxin ja Jesucristo. Anin ntzꞌibaj ja carta riꞌ in ntakel ewqꞌuin ja rixsalunel chipan ja retinamit jeꞌe ja rixcꞌo pa tak tinamit ja cꞌo pa rcuenta Ponto, pa rcuenta Galacia, pa rcuenta Capadocia, pa rcuenta Asia in pa rcuenta Bitinia.

² Ixix ixchaꞌon rmal ja katataꞌ Dios, ix rxin chic como queriꞌ ja rchominto ojer, xixcoj pa rukꞌaꞌ rmal ja rEspíritu Santo. Queriꞌ ban chewe utzcꞌa chi nenimaj ja Jesucristo utzcꞌa chakajaꞌ chi nixchꞌachꞌojirsax chipan ja rewil emac rmal ja rquiqꞌuel. Xtibe ta pa nim checojol ja rutzil ja nsipaj ja Dios in xtiyaꞌ ta jun nimlaj quicotemal pa tak ewanma.

* * * * * * * * * *

³ Kayaꞌaꞌ rukꞌij ja Dios, arjaꞌ Tatixel rxin ja kajaw Jesucristo, congana xpokonaj kawach, xuyaꞌ chake chi xokalax chic jutij. Ja Jesucristo arjaꞌ yataj tre rmal ja Dios chi cꞌastaj rwach chiquicojol ja camnakiꞌ chewiꞌ tok yataj chake chi xokalax chic jutij. Rmalariꞌ tok ni maticapuj wiꞌ kacꞌuꞌx chi raybexic ja rutzil xin Dios

⁴ in rmalariꞌ chakajaꞌ tok cꞌo jun herencia ewxin chilaꞌ chicaj, jun herencia chajin rmal ja Dios. Jariꞌ herencia ni majun nak ta falta tre, matitzabukari, mta qꞌuisic trij.

⁵ Ja herencia ewxin ixix ja yukul ecꞌuꞌx ruqꞌuin ja Jesucristo in rmal ja yukulbal ecꞌuꞌx tok Dios nixrchajij chi utz. Arjaꞌ ni matuyaꞌ can wiꞌ ja rechajixic in nerilaꞌ na jun kꞌij ja tok xquixtotaji chijutij. Ja retoꞌic chomarsan chic rmal ja Dios jariꞌ nkꞌalajin na ja tok xterilaꞌ ja qꞌuisbal kꞌij xin rwachꞌulew.

⁶ Rmalariꞌ tok ixix camic congana nixquicoti masqui nixbison na jun tiempo rmal ja rpokonal como qꞌuiy rwach ja npi chewij.

⁷ Pro ma chaka ta nixkꞌax chipan ja rpokonal, cꞌoli rcꞌamonto chewe. Chipan ja rpokonal nixcꞌambajax wiꞌ janiꞌ ja yukulbal ecꞌuꞌx ruqꞌuin ja Jesucristo. Ja tok nixkꞌax chipan ja rpokonal quewaꞌ rbanic riꞌ caniꞌ nba̱n tre ja oro como ja oro nya̱ꞌ pa kꞌakꞌ chi ncꞌat can ja ma oro ta cꞌo trij. Ja puro oro janila nim rjil pro xa cꞌo yojtajic trij. Ja cꞌa yukulbal ecꞌuꞌx ruqꞌuin ja Jesucristo más chi na vale chwach ja oro. Queriꞌ rbanic ja rpokonal ncowirsaj ja yukulbal ecꞌuꞌx utzcꞌa tok xtipi chic jutij ja Jesucristo rmal cꞌa ja yukulbal ecꞌuꞌx nquicoti ja Dios chewij in nya̱ꞌ ekꞌij rmal chakajaꞌ.

⁸ Ixix janila newajoꞌ ja Jesucristo masqui ma etzꞌaton ta rwach in ni yukul wiꞌ ecꞌuꞌx ruqꞌuin camic. Rmalariꞌ tok janila nixquicoti camic, yatajnak chewe ja nimlaj quicotemal xin chilaꞌ chicaj.

⁹ In rmal ja yukulbal ecꞌuꞌx ruqꞌuin ja Jesucristo chewiꞌ tok ewilon ja totajem xin Dios.

¹⁰ Ja totajem xin Dios ja rewilon jariꞌ ja rutzil ja rtzujunto ja Dios ojer in tzꞌibtal can cumal ja rojer tak profeta. Ejeꞌeꞌ congana quecoj quiꞌ pa chꞌaꞌoj chi rchꞌobic nak rbanic.

¹¹ Ja rEspíritu xin Cristo arjaꞌ xuchꞌob pa quewiꞌ pa tak canma chi cꞌo jun Toꞌonel ja npi na, ja cꞌa rejeꞌeꞌ congana nquetij quekꞌij chi ncotakij nak chi winakil ja npeti in nak tiempo ja npi wiꞌ. Como ja rEspíritu arjaꞌ nbij chique chi ja Cristo xturtijaꞌ na rpokonal in nya̱ꞌ chi na rukꞌij ja tok xticꞌastaj rwach. Jariꞌ chꞌobtaj chiquewach ja tok majaꞌn tipeti ja Cristo.

¹² Ja Dios arjaꞌ xkꞌalasaj chiquewach chi cꞌa pa katiempo ajoj nuryataj wiꞌ chijutij ja totajem ja yaꞌto rbixic cumal, ma pa quitiempo ta ejeꞌeꞌ. Jariꞌ totajem ecꞌwaxan chic nak rbanic como bin chic chewe cumal ja kachꞌalal ja xeyoꞌ rbixic chewe ja utzlaj tzij xin Jesucristo. Ja rEspíritu Santo ja takonto chilaꞌ chicaj arjaꞌ cꞌayon quixin chi rbixic. Jariꞌ totajem ja ángel congana nquiyarij nquechꞌob nak rbanic.

* * * * * * * * * *

¹³ Rmalcꞌariꞌ tok nbij chewe, quixcꞌascꞌoti, bien techꞌoboꞌ ja neban. Nojel ta ecꞌuꞌx nojel ta ewanma newaybej ja rutzil xin Dios ja xtiyataj na chewe ja tok xtipi chic jutij ja Jesucristo.

¹⁴ Como ix alcꞌwalaxelaꞌ rxin ja Dios tenimaj ja nbix chewe rmal chi neban. Maxta teban chic ja ma utz ta jeꞌe ja xel ecꞌuꞌx trij caniꞌ xebanto ja tok majaꞌn tichꞌobtaj emwal ja utzlaj tzij xin Jesucristo.

¹⁵ Ja nrajoꞌ, jun chꞌajchꞌojlaj anma newcꞌaj nojel tiempo. Como ja Dios arjaꞌ xixrsiqꞌuij chi xixoc ralcꞌwal como arjaꞌ ni rcꞌan wiꞌ jun chꞌajchꞌojlaj anma chewiꞌ tok rjawaxic chi newcꞌaj ixix chakajaꞌ jun chꞌajchꞌojlaj anma.

¹⁶ Caniꞌ tzꞌibtal can chipan ja rtzobal Dios quewaꞌ nbij ja Dios riꞌ: —Como anin wcꞌan jun chꞌajchꞌojlaj anma rmalariꞌ tok nbij chewe, tewcꞌaj cꞌa ixix jun chꞌajchꞌojlaj anma chakajaꞌ, neꞌe.

¹⁷ Ja tok neban oración bien nnataj chewe chi ja Dios arjaꞌ Tatixel. Arjaꞌ kꞌetol tzij pa kawiꞌ chi nimlaj kanojelal, nuyaꞌ cuenta tre ja nkaban wi utz owi ma utz ta. Arjaꞌ ma jun ta utz nutzꞌat in ma jun ta itzel. Rmalcꞌariꞌ tok nbij chewe, rjawaxic chi nexbej ewiꞌ chwach ja Dios jaruꞌ pa tiempo nebanel waweꞌ chwachꞌulew.

¹⁸ Ixix cꞌoli ja xixlokꞌbexi tok xixtotaj chipan ja juleꞌ costumbre ja mta noc wiꞌ ja cꞌutun can chewach cumal ja rewatiꞌt emamaꞌ. Pro bien ewotak chi ma ja ta xixlokꞌbexi ja xa cꞌo qꞌuisic trij caniꞌ tre oro caniꞌ tre plata.

¹⁹ Pro ja lokꞌlaj rquiqꞌuel ja Cristo jariꞌ xixlokꞌbexi. Ja cꞌa Cristo arjaꞌ camsaxi, ban sacrificar ja caniꞌ nba̱n tre jun carnelo ja ni majun nak ta falta tre.

²⁰ Ja Dios tok majaꞌn tiwinakarsaj ja rwachꞌulew arjaꞌ rchominto chic chi nba̱n na sacrificar ja Cristo. Pro jariꞌ ma xbantaj ta chanim, cꞌa jawaꞌ xurbantaji chipan ja qꞌuisbal tiempo ja rokcꞌo wiꞌ riꞌ. Ja cꞌariꞌ xuban ja Dios pan ecuenta.

²¹ Rmal ja Cristo chewiꞌ tok yukul chic ecꞌuꞌx ruqꞌuin ja Dios. Jariꞌ mismo Dios ja xuyaꞌ tre ja Cristo chi cꞌastaji chiquicojol ja camnakiꞌ in xuyaꞌ tre chakajaꞌ chi congana nim chic rukꞌij. Rmalcꞌariꞌ tok ruqꞌuin ja Dios yukul wiꞌ ecꞌuꞌx, rmalcꞌariꞌ chakajaꞌ tok ewotak chi ja Dios arjaꞌ nyowi ja rutzil ja rewayben.

²² Ja rEspíritu Santo arjaꞌ xuyaꞌ chewe chi xenimaj ja utzlaj tzij xin Jesucristo jariꞌ utzlaj tzij xechꞌachꞌojirsbej ja rewanma. Queriꞌ xeban in rmalariꞌ tok nixcowin chic neꞌewajoꞌ ja kachꞌalal in ma chi echiꞌ ta cꞌo wiꞌ tok neꞌewajoꞌ. Rmalcꞌariꞌ nbij chewe, tewajoꞌ ewiꞌ pro nojel ecꞌuꞌx nojel ewanma.

²³ Ixix ixalaxnak chic jutij pro ja cꞌacꞌa cꞌaslemal ewcꞌan camic jariꞌ mta qꞌuisic trij, ma junan ta ruqꞌuin ja cꞌaslemal ja yatajnak chewe cumal ja retataꞌ eteꞌ como jariꞌ xa cꞌo camíc trij. Rmal cꞌa ja rtzobal Dios tok ixalaxnak chic jutij. Ja cꞌa rtzobal Dios jariꞌ ma camnak ta rwach, ni cꞌo wiꞌ chijutij.

²⁴ Caniꞌ tzꞌibtal can quewariꞌ: —Ja quicꞌaslemal ja winak xa caniꞌ kꞌayis nchakiji, ja nyabex jeꞌe quekꞌij xa caniꞌ rusiꞌj kꞌayis tok nocꞌo rukꞌij ntiltoꞌi.

²⁵ Pro ja rtzobal ja kajaw Dios jariꞌ mta qꞌuisic trij, neꞌe. Ja cꞌariꞌ rtzobal Dios xa junan ruqꞌuin ja utzlaj tzij xin Jesucristo ja yatajnak chic rbixic chewe.