1 Juan 5 - Tz'utujil (Ja Cꞌacꞌa Chominem)

¹ Kanojel ja kaniman ja Jesús chi arjaꞌ ja Cristo ja chaꞌon rmal ja Dios, ja wi queriꞌ kaniman ok ralcꞌwal Dios cꞌariꞌ. Caniꞌ tre jun alcꞌwalaxel ja wi nrajoꞌ ja rtataꞌ nerajoꞌ cꞌariꞌ chakajaꞌ ja juleꞌ chic rchꞌalal.

² Ja wi nkajoꞌ ja Dios in wi nkanimaj ja rmandamiento triꞌ nkatzꞌat wiꞌ chi nekajoꞌ ja ralcꞌwal Dios chakajaꞌ.

³ Ja wi nkanimaj ja mandamiento xin Dios jariꞌ nkacꞌutbej chi nkajoꞌ ja Dios chakajaꞌ. Ja cꞌa mandamiento xin Dios ma al ta rcꞌaxic

⁴ como arjaꞌ ryaꞌon kachokꞌakꞌ kanojel ja rok ralcꞌwal in rmalariꞌ ja ritzelal xin rwachꞌulew maticowin chakij, ajoj nokchꞌocmaji. Rmal ja yukulbal kacꞌuꞌx ruqꞌuin ja Jesucristo chewiꞌ tok nokchꞌocmaji.

⁵ ¿Echinatak cꞌariꞌ ja nechꞌocmaji? Ajoj cꞌariꞌ ja kaniman ja Jesús chi arjaꞌ ja Ralcꞌwal Dios ajoj nokchꞌocmaji.

* * * * * * * * * *

⁶ Ja tok peti ja Jesucristo cꞌoli kꞌalasan rxin chi Ralcꞌwal Dios jariꞌ tok ban bautizar in tok camsaxi xutix ja rquiqꞌuel chwach cruz. Ma chaka ta ruyon ariꞌ ja ban bautizar pro xutix ja rquiqꞌuel chwach cruz chakajaꞌ. Ja rEspíritu Santo arjaꞌ nbini chakajaꞌ chi ja Jesucristo arjaꞌ Ralcꞌwal Dios. Ja rEspíritu Santo ni rxin wiꞌ chi katzij nojel ja nbij.

⁷ E oxiꞌ ja recꞌo chilaꞌ chicaj ja xa junan nquibij tre ja Jesús chi arjaꞌ Ralcꞌwal Dios, jun, Dios ja Tatixel, in jun chic, ja Ralcꞌwalaxel ja nkꞌalasani janiꞌ rnaꞌoj ja Dios, in jun chic, ja rEspíritu Santo.

⁸ In chakajaꞌ oxiꞌ rwach ja testigo ja cꞌo chwachꞌulew, jun, ja rEspíritu Santo, in jun chic, ja tok ban bautizar ja Jesús, in jun chic, tok xutix ja rquiqꞌuel chwach cruz, xa junan nkꞌalasaj chi oxiꞌ chi Jesús arjaꞌ Ralcꞌwal Dios.

⁹ Como nekanimaj winak tok nqueyaꞌ testigoꞌil rmalcꞌariꞌ tok más na rjawaxic chi nkanimaj ja testigo xin Dios. Ja Dios rcojon ja testigo chi rkꞌalasaxic chi ja Jesús arjaꞌ ja Ralcꞌwal. Ja testigoꞌil nuyaꞌ ja Dios más na nim rukꞌij chwach ja nqueyaꞌ winak.

¹⁰ Kanojel ja yukul kacꞌuꞌx ruqꞌuin ja Ralcꞌwal Dios cꞌo chic ja testigoꞌil xin Dios pa tak kanma ja nyabex kaseguro. Ja wi matanimaj ja nbij ja Dios nel cꞌariꞌ xa caniꞌ tzꞌakol tzij nacoj wiꞌ. Queriꞌ naban ja wi matanimaj ja testigoꞌil ja ryaꞌonto ja Dios tre ja Ralcꞌwal.

¹¹ Ja testigoꞌil xin Dios quewaꞌ nucꞌut chikawach riꞌ, chi arjaꞌ Dios ryaꞌon chake ja utzlaj cꞌaslemal ja mta qꞌuisic trij in ruqꞌuin ja Ralcꞌwal nkawil wiꞌ.

¹² Ja wi awcꞌan ja Ralcꞌwal Dios chipan ja rawanma jariꞌ awcꞌan chic ja utzlaj cꞌaslemal ja mta qꞌuisic trij. Ja cꞌa wi ma awcꞌan ta ja Ralcꞌwal Dios pan awanma jariꞌ ma awcꞌan ta ja utzlaj cꞌaslemal ja mta qꞌuisic trij.

* * * * * * * * * *

¹³ Anin xintzꞌibajel ja carta riꞌ in ntakel ewqꞌuin ixix ja yukul ecꞌuꞌx ruqꞌuin ja Jesucristo ja Ralcꞌwal Dios. Ja xintzꞌibaj chipan jariꞌ nyabej eseguro chi ixix ewcꞌan chic ja utzlaj cꞌaslemal ja mta qꞌuisic trij.

¹⁴ Yukul kacꞌuꞌx ruqꞌuin ja Dios chi arjaꞌ ncꞌulbaꞌ ja roración nkaban ja wi utz ncꞌaxaj ja nkacꞌutuj tre.

¹⁵ Como kotak chi Dios ncꞌaxaj ja koración nkaban xa nak ta nkabij tre rmalcꞌariꞌ kotak chi arjaꞌ ni nuyaꞌ wiꞌ chake ja nkacꞌutuj tre.

¹⁶ Ja tok nkatzꞌat jun kachꞌalal wi xuban jun ril kabanaꞌ orar pa rcuenta in nyataj na tre ja utzlaj cꞌaslemal rmal ja Dios. Queriꞌ rubey ja wi ma ja ta xuban ja mta cuytajic trij ja natcꞌamoꞌel chijutij chipan ja camíc. Pro cꞌoli ja il mac wi xaban natrucꞌamel chijutij chipan ja camíc jariꞌ matinbij chi nkayaꞌ pan oración.

¹⁷ Nojelal ja naban ja matirajoꞌ Dios chawe chi naban jariꞌ il mac. Pro cꞌoli ja il mac wi xaban cꞌoli cuytajic trij in macatrucꞌamel chijutij chipan ja camíc.

¹⁸ Kotak chi kanojel ja rokalaxnak chic jutij ja cꞌo rcꞌaslemal Dios pa tak kanma ajoj makomacuni pro ja Jesús ja Ralcꞌwal Dios arjaꞌ nokchajini in maticowini ja diablo nokruchap ta.

¹⁹ Kotak chakajaꞌ chi ajoj okcꞌo pa rcuenta ja Dios pro ja juleꞌ chic winak ja recꞌo chwachꞌulew xa pa rukꞌaꞌ ja diablo ecꞌo wiꞌ.

²⁰ In kotak chakajaꞌ chi ja Jesús ja Ralcꞌwal Dios peti waweꞌ chwachꞌulew in xuyaꞌ chake chi kotakij rwach ja Dios ja katzij chi Dios. In ajoj xa jun kabanon ruqꞌuin ja Dios ja katzij chi Dios in xa jun kabanon ruqꞌuin ja Jesucristo ja Ralcꞌwal, ruyon arjaꞌ ja Dios ja katzij chi Dios, ruyon arjaꞌ nyowi ja utzlaj cꞌaslemal ja mta qꞌuisic trij.

²¹ Chakꞌlaj walcꞌwal, tebanaꞌ cuenta ewiꞌ, maxta tiyukeꞌ ecꞌuꞌx cuqꞌuin ja cachbal tak winak nixtacꞌa ruqꞌuin ta ja rachbal tak nakun. Amén.