1 Juan 4 - Tz'utujil (Ja Cꞌacꞌa Chominem)

¹ Chakꞌlaj wachꞌalal, teyaꞌaꞌ ewxquin tre ja xtinbij chewe riꞌ. E qꞌuiy ja winak quipaxin quiꞌ chwachꞌulew ejeꞌeꞌ nquibij chi tijonem xin Dios ja nqueyaꞌ. Pro xa quipayil ja nquibij, ma katzij ta. Rmalcꞌariꞌ tok nbij chewe, ma queꞌenimaj ta canojel ja winak ja nebini chi Espíritu xin Dios ecꞌayon. Pro ja neban, bien teyaꞌaꞌ cuenta chique janiꞌ netzijoni ja wi katzij chi Espíritu xin Dios ecꞌayon owi mani.

² Waweꞌ newotakij wiꞌ ja wi Espíritu xin Dios ecꞌayon, ja nebini chi kajto ja Jesucristo in xoc kach winak ejeꞌeꞌ riꞌ ja katzij chi Espíritu xin Dios ecꞌayon.

³ Pro ja nebini chi ja Jesucristo ma xoc ta kach winak ejeꞌeꞌ riꞌ ja ma Espíritu xin Dios ta ecꞌayon. Junwiꞌ chi na chi espíritu cꞌayon quixin, jariꞌ espíritu xa rcꞌulel ja Cristo. Jariꞌ espíritu ecꞌwaxan chic chi npi na pro camic cꞌo chic waweꞌ chwachꞌulew.

⁴ Chakꞌlaj walcꞌwal, ixix ixcꞌo pa rcuenta ja Dios. Ja maestro ja ma Dios ta ecꞌayon ejeꞌeꞌ ma xecowin ta chewij, ixix xixchꞌeco quixin. Queriꞌ xeban como ja Dios ja cꞌo pa tak ewanma ixix más chi na kꞌaxnak rchokꞌakꞌ chwach ja diablo ja cꞌo pa tak canma ja winak ja xa ruqꞌuin rwachꞌulew yukul wiꞌ quecꞌuꞌx.

⁵ Como ejeꞌeꞌ xa ruqꞌuin rwachꞌulew yukul wiꞌ quecꞌuꞌx rmalariꞌ tok xa jaꞌ nquinataj ja xin rwachꞌulew. Ja cꞌa juleꞌ chic winak ja yukul quecꞌuꞌx ruqꞌuin ja rwachꞌulew ejeꞌeꞌ nel quecꞌuꞌx chi rcꞌaxaxic ja nbix chique cumal.

⁶ Pro ja rajoj okcꞌo pa rcuenta ja Dios. Ja winak ja cotak rwach ja Dios ejeꞌeꞌ nel quecꞌuꞌx chi rcꞌaxaxic ja nkabij pro ja ma ecꞌo ta pa rcuenta ja Dios ejeꞌeꞌ maticajoꞌ nquicꞌaxaj ja nkabij. Triꞌ cꞌa nkotakij wiꞌ echinatak ja reꞌucꞌan rmal ja rEspíritu xin Dios, jun Espíritu ja mta tzꞌakoj tzij rcꞌamonto, in echinatak ja reꞌucꞌan rmal ja respíritu xin diablo, jun espíritu ja xa tzꞌakoj tzij rcꞌamonto.

* * * * * * * * * *

⁷ Chakꞌlaj wachꞌalal, congana rjawaxic chi nkajoꞌ kiꞌ. Ja rajoben riꞌil ruqꞌuin Dios winakarnakto wiꞌ. Ja nawajoꞌ awiꞌ jariꞌ at ralcꞌwal Dios, jariꞌ awotak rwach ja Dios.

⁸ Ja Dios arjaꞌ ni rcꞌan wiꞌ ja rajoben riꞌil rmalcꞌariꞌ ja tok nbij chewe, ja wi matawajoꞌ awiꞌ jariꞌ ma awotak ta rwach ja Dios.

⁹ Ja Dios xutakto ja Ralcꞌwal chi katoꞌic, ni xarwariꞌ jun ja Ralcꞌwal. Triꞌ nkatzꞌat wiꞌ chi nokrajoꞌ ja Dios como xutakto ja Ralcꞌwal waweꞌ chwachꞌulew. Queriꞌ xuban utzcꞌa chi rmal ja Ralcꞌwal nkawil ja utzlaj cꞌaslemal ja mta qꞌuisic trij.

¹⁰ Ja Dios ma ajoj ta xokajoꞌn rxin nabey, arjaꞌ xajoꞌn kaxin nabey como xutakto ja Jesucristo ja Ralcꞌwal chi arjaꞌ xoc chomarsbal rxin ja kil kamac chwach ja Dios. Triꞌ nkatzꞌat wiꞌ ja kas mero rbanic ja rajoben riꞌil.

¹¹ Chakꞌlaj wachꞌalal, queriꞌ xuban ja Dios, arjaꞌ congana xokrajoꞌ rmalcꞌariꞌ nbij chewe chi yatal chakij chi nkajoꞌ kiꞌ ajoj chakajaꞌ.

¹² Ja Dios majun nak ta tzꞌatyon rxin pro wi nkajoꞌ kiꞌ jariꞌ nqꞌuejeꞌ pa tak kanma ja Dios in chakajaꞌ nqꞌuiyi nwachini pa tak kanma ja rajoben riꞌil rxin.

¹³ Ja Dios ryaꞌonto chake ja rEspíritu rxin, triꞌ cꞌa nkatzꞌat wiꞌ chi okcꞌo pa ranma in arjaꞌ chakajaꞌ cꞌo pa tak kanma.

¹⁴ In ajoj chakajaꞌ katzꞌat rwach ja Jesucristo ja Ralcꞌwal Dios in nkayaꞌ rbixic chi arjaꞌ takto rmal ja Tatixel, xoc Toꞌonel kaxin kanojelal ja rok winak.

¹⁵ Canojel ja winak ja nebini chi Jesús arjaꞌ Ralcꞌwal Dios ejeꞌeꞌ riꞌ cꞌoli pa tak canma ja Dios in ejeꞌeꞌ chakajaꞌ ecꞌo pa ranma ja Dios.

¹⁶ Ajoj kotak chi ja Dios nokrajoꞌ, yukul kacꞌuꞌx ruqꞌuin ja rajoben riꞌil rcꞌan. Ja Dios ni rxin wiꞌ ni rcꞌan wiꞌ ja rajoben riꞌil. Kanojelal ja kucꞌan chic ja rajoben riꞌil xin Dios jariꞌ okcꞌo pa ranma ja Dios in queriꞌ chake ajoj chakajaꞌ cꞌoli ja Dios pa tak kanma.

¹⁷ Ja wi matikaxbej kiꞌ chwach ja nimlaj kꞌij xin juicio ja tok xtipi chic jutij ja Jesucristo triꞌ nkatzꞌat wiꞌ chi qꞌuiynak chic in wachinnak chic ja rajoben riꞌil xin Dios pa tak kanma. Ajoj cꞌa okcꞌo na waweꞌ chwachꞌulew pro como xa junan chic kanaꞌoj ruqꞌuin ja Jesucristo chewiꞌ tok matikaxbej kiꞌ chwach.

¹⁸ Ja rajoben riꞌil xin Dios ni majun xbeben riꞌil rcꞌan. Pro ja rbanic, ja wi nwachini ja rajoben riꞌil xin Dios chipan ja rawanma ja cꞌa xbeben riꞌil nlasaxel rmal. Ja xbeben riꞌil congana lawuloꞌ nuban chawe. Ja wi xa naxbej awiꞌ jariꞌ majaꞌn tiqꞌuiyi chi utz majaꞌn tiwachini ja rajoben riꞌil xin Dios chipan ja rawanma.

¹⁹ Ja Dios arjaꞌ xokrajoꞌ ajoj nabey rmalcꞌariꞌ tok nkajoꞌ arjaꞌ chakajaꞌ.

²⁰ Ja wi cꞌo jun nbij: —Anin nwajoꞌ ja Dios, wi neꞌe, pro wi xa itzel nutzꞌat jun rchꞌalal jariꞌ xa tzꞌakol tzij. Ja rawachꞌalal cꞌoloc chawach, natzꞌat rwach pro wi matawajoꞌ ¿nak ta cꞌa moda ariꞌ natcowini nawajoꞌ ja Dios ja matitzꞌattaji?

²¹ Ja mandamiento xin Dios quewaꞌ nbij chake riꞌ: —Ja wi ninewajoꞌ anin rjawaxic chi neꞌewajoꞌ ja rewachꞌalal chakajaꞌ, neꞌe ja Dios chake.