1 Juan 3 - Tz'utujil (Ja Cꞌacꞌa Chominem)

¹ Janila nokrajoꞌ ja Dios ja Tatixel. Arjaꞌ nbij chake chi ok ralcꞌwal, triꞌ cꞌa nkatzꞌat wiꞌ chi congana nokrajoꞌ in ni katzij wiꞌ chi ok ralcꞌwal. Ja winak ja xa ruqꞌuin rwachꞌulew yukul wiꞌ quecꞌuꞌx ejeꞌeꞌ matichꞌobtaj cumal janiꞌ rnaꞌoj ja Dios in rmalariꞌ matichꞌobtaj cumal nak kabanic ajoj chakajaꞌ.

² Chakꞌlaj wachꞌalal, anin nbij chewe chi ok ralcꞌwal chic ja Dios camic. Majaꞌn tikꞌalasax chikawach nak kabanic ja tok xkoqꞌuextaji pa jun kꞌij xarwariꞌ kotak chi ja tok xtipi chic jutij ja Jesucristo ajoj nij ok queriꞌ chic triꞌ ja caniꞌ arjaꞌ. Nkatzꞌat na chi utz triꞌ janiꞌ ja kas mero rbanic ja Jesucristo chewiꞌ tok nokoqui ja caniꞌ arjaꞌ.

³ Ja wi nokquicoti chi raybexic ja Jesucristo jariꞌ nkachꞌachꞌojirsbej ja kanma como ja Jesucristo arjaꞌ ni rcꞌan wiꞌ jun chꞌajchꞌojlaj anma.

⁴ ¿Janiꞌ cꞌa ja il mac? Ja il mac junan ruqꞌuin ja matanimaj ja ley xin Dios. Ja cꞌa tok natmacuni ley xin Dios ariꞌ ja matanimaj.

⁵ Ixix bien ewotak chi peti ja Jesucristo waweꞌ chwachꞌulew chi rchupic ja kil kamac in arjaꞌ ni mta wiꞌ jun ril rumac rbanon.

⁶ Ja wi natqꞌuejeꞌ pa ranma ja Jesucristo jariꞌ macatmacuni. Ja cꞌa wi chaka natmacuni jariꞌ ma chꞌobtajnak ta amwal janiꞌ rnaꞌoj ja Jesucristo in nixtacꞌa chꞌobtajnak ta amwal nak rbanic chakajaꞌ.

⁷ Chakꞌlaj walcꞌwal, maquita cꞌo jun xquixbano engañar, ja winak ja nebanowi ja rutzil xa queyon ejeꞌeꞌ ja utz netzꞌa̱t rmal ja Dios caniꞌ tre ja Jesucristo arjaꞌ banol utzil.

⁸ Pro ja winak ja chaka nemacuni ejeꞌeꞌ riꞌ e ralcꞌwal diablo caniꞌ tre ja diablo arjaꞌ nij ajꞌil nij ajmac wiꞌ ja tok tzꞌucarsaxto ja rwachꞌulew. Ja cꞌa Ralcꞌwal Dios peti waweꞌ chwachꞌulew chi ryojic ja samaj ja nuban ja diablo.

⁹ Ja wi at ralcꞌwal Dios jariꞌ awcꞌan ja cꞌaslemal xin Dios in macatmacuni. Rmal ja rat ralcꞌwal Dios chewiꞌ tok mta moda natmacuni.

¹⁰ Waweꞌ nkatzꞌat wiꞌ echinatak ja ralcꞌwal Dios in echinatak ja ralcꞌwal diablo, ja wi ma utz ta ja nqueban in wi maquecajoꞌ ja cachꞌalal ma e ralcꞌwal Dios ta cꞌariꞌ.

* * * * * * * * * *

¹¹ Ni rjawaxic wiꞌ chi nkajoꞌ kiꞌ como queriꞌ nucꞌut chikawach ja tijonem ja recꞌwaxanto nabey.

¹² Maxta queriꞌ tikaban ajoj ja caniꞌ xuban ja Caín ojer, xoc pa rcuenta ja diablo ja Caín in xcamsaj ja ruchakꞌ. ¿Nak tre tok xcamsaj? Como arjaꞌ xa itzel rcꞌaslemal pro ja ruchakꞌ utz rcꞌaslemal xa chewiꞌ tok xcamsaj.

¹³ Wachꞌalal, maxta junwiꞌ tenaꞌ rmal ja nixtzelax cumal ja winak ja xa ruqꞌuin rwachꞌulew yukul wiꞌ quecꞌuꞌx.

¹⁴ Ja wi matawajoꞌ awiꞌ jariꞌ atcamnak chwach ja Dios. Ja cꞌa rajoj nekajoꞌ ja kachꞌalal rmalcꞌariꞌ tok kotak chi ma okcamnak chi ta chwach ja Dios, kotak chi okkꞌaxnakpi chic chipan ja camíc in kawilon chic ja utzlaj cꞌaslemal ja mta qꞌuisic trij.

¹⁵ Ja wi xa itzel natzꞌat jun awachꞌalal jariꞌ at jun camsanel. Ixix bien ewotak chi majun camsanel rcꞌan ta ja utzlaj cꞌaslemal ja mta qꞌuisic trij.

¹⁶ Ja Jesucristo arjaꞌ xuyaꞌ riꞌ chi camsax pa kacuenta, triꞌ nkotakij wiꞌ janiꞌ ja rajoben riꞌil. Queriꞌ chake ajoj chakajaꞌ yatal chakij chi matikapokonaj nkayaꞌ kiꞌ pa camíc pa quicuenta ja kachꞌalal.

¹⁷ Pro ja wi cꞌo jun awachꞌalal wi cꞌoli ncꞌatzin tre ja ntzukbej riꞌ in wi cꞌol awqꞌuin ja ncꞌatzin tre, ja cꞌa wi matapokonaj rwach, wi matatoꞌ jariꞌ ni kꞌalaj wiꞌ chi mta ja rajoben riꞌil xin Dios pan awanma.

¹⁸ Chakꞌlaj walcꞌwal, maxta xa chi kachiꞌ cꞌo wiꞌ ja tok nkabij chi nkajoꞌ kiꞌ. Ja kas nrajoꞌ chi cꞌoli nkaban ja nkacꞌutbej chi ni katzij wiꞌ chi nkajoꞌ kiꞌ.

* * * * * * * * * *

^19-20 Ja wi ni katzij wiꞌ chi nkajoꞌ kiꞌ triꞌ nkotakij wiꞌ chi ja Dios okcꞌayon. In jun chic, masqui ntiꞌoni ja kanma rmal ja ma utz ta kabanon pro wi cꞌoli ja rajoben riꞌil xin Dios chake xa rmalariꞌ tok nquicoti ja kanma chwa Dios in matitiꞌon chic. Queriꞌ rbanic como ja Dios arjaꞌ más chi na nim rukꞌij, cꞌo rukꞌaꞌ tre ja kanma in nojel rotak.

²¹ Chakꞌlaj wachꞌalal, ja wi mta ntiꞌon pa tak kanma jariꞌ cꞌo kaconfianza noktzijon ruqꞌuin ja Dios

²² in arjaꞌ nuyaꞌ chake xa nak ta ja nkacꞌutuj tre. Como ajoj nkanimaj ja rmandamiento in como arjaꞌ nquicot chakij chewiꞌ tok nuban queriꞌ chake.

²³ Ja rmandamiento ja Dios quewaꞌ nbij chake riꞌ, tiyukeꞌ kacꞌuꞌx ruqꞌuin ja Jesucristo ja Ralcꞌwal in tikajoꞌ kiꞌ ja caniꞌ bin can chake rmal.

²⁴ Ja wi nanimaj ja rmandamiento ja Dios jariꞌ natqꞌuejeꞌ pa ranma ja Dios in nqꞌuejeꞌe ja Dios pan awanma atat chakajaꞌ. Rmal ja rEspíritu Santo ja ryaꞌon ja Dios chake chewiꞌ tok kotak chi arjaꞌ cꞌo pa tak kanma.