1 Juan 1 - Tz'utujil (Ja Cꞌacꞌa Chominem)

¹ Jawaꞌ jun carta ja nkatakel chewe riꞌ rcꞌamonto nak rbanic ja Ralcꞌwal Dios ja Yoꞌl utzlaj cꞌaslemal ja mta qꞌuisic trij, arjaꞌ xurkꞌalasani janiꞌ rnaꞌoj ja Dios. Ja Ralcꞌwal Dios arjaꞌ ni cꞌo wiꞌ ja tok tzꞌucarsaxto ja rwachꞌulew. Ajoj katzꞌat ruqꞌuin kawach, kacꞌaxaj ja xbij, katzꞌat janiꞌ ja rcꞌaslemal, kachap ruqꞌuin kakꞌaꞌ.

² Ja Yoꞌl cꞌaslemal xerilaꞌ ja kꞌij chi ntzꞌattaji, ajoj katzꞌat in camic kamajon rkꞌalasaxic nak rbanic in jariꞌ nkayaꞌ rbixic chewe. Nabey ni cꞌo wiꞌ ruqꞌuin ja Tatixel pro peti xurcꞌutuꞌ kaj riꞌ chikawach.

³ Ja katzꞌaton in ja kacꞌaxan jariꞌ nkayaꞌ rbixic chewe utzcꞌa chi ixix jun nixquicot kuqꞌuin rmal como xa jun kabanon ruqꞌuin ja Dios ja Tatixel in chakajaꞌ xa jun kabanon ruqꞌuin ja Jesucristo ja Ralcꞌwal.

⁴ Ja katzꞌibaj riꞌ nkatakel ewqꞌuin utzcꞌa chi nqꞌuiyi in nwachini ja quicotemal xin Dios pa tak ewanma.

* * * * * * * * * *

⁵ Ja xtikatzꞌibaj riꞌ jawaꞌ tijonem kacꞌaxan ja bix chake rmal ja Jesucristo quewariꞌ, ja Dios arjaꞌ ni sakil wiꞌ rcꞌan, ni utz wiꞌ ja nuban, majun kꞌekumal rcꞌan ta.

⁶ Ja wi nkabij chi xa jun kabanon ruqꞌuin ja Dios pro wi kꞌekumal cꞌayon kaxin jariꞌ xa ok tzꞌakol tak tzij in ni kꞌalaj wiꞌ chi matikanimaj ja utzlaj tzij xin Jesucristo.

⁷ Pro wi sakil cꞌayon kaxin caniꞌ tre ja Dios arjaꞌ ni pa sakil wiꞌ cꞌo wiꞌ, ja wi queriꞌ kabanon xcꞌa jun kabanon ariꞌ. Ja wi queriꞌ kabanon ja rquiqꞌuel ja Jesucristo ja Ralcꞌwal jariꞌ nchꞌachꞌojirsaj nojel ja kil kamac nkaban.

⁸ Ja wi nkabij chi mta ja il mac kabanon jariꞌ xa nkaban kaj engañar kiꞌ kayon in ma katzij ta ja nkabij.

⁹ Pro wi nkachol ja kil kamac chwach ja Dios arjaꞌ ni nuban wiꞌ cumplir in ni utz wiꞌ nuban chi rcuyic in nokrchꞌachꞌojirsaj chipan nojelal ja ritzelal ja nkaban.

¹⁰ Ja cꞌa wi nkabij chi mta ja il mac kabanon jariꞌ xa caniꞌ tzꞌakol tzij nkacoj wiꞌ ja Dios. Ja wi queriꞌ nkabij jariꞌ ni kꞌalaj wiꞌ chi ma kacojon ta ja rtzobal Dios pa tak kanma.