1 Corintios 8 - Tz'utujil (Ja Cꞌacꞌa Chominem)

¹ Ja cꞌa camic wachꞌalal nwajoꞌ noktzijon ewqꞌuin tre ja tiꞌij ja noc sacrificio chwach rachbal jun winak owi chwach rachbal jun nakun. Caniꞌ nebij: —Jariꞌ kotak chic kanojel, nixcheꞌe. Pro ja tok congana ewotak jariꞌ ma cꞌayew ta ja kas ix nimak nenaꞌ kaj rmal pro ja tok newajoꞌ ewiꞌ jariꞌ cꞌo qꞌuiyem rcꞌamonto chibil tak ewiꞌ tre ja yukulbal ecꞌuꞌx ruqꞌuin ja Jesucristo.

² Ja wi cꞌoli awotak in wi kas nim nanaꞌ kaj rmal jariꞌ majaꞌn tawotakij chi mta noc wiꞌ ja rawotak ja wi ma rachbil ta ja rajoben riꞌil.

³ Pro ja wi nawajoꞌ ja Dios jariꞌ natruban reconocer ja Dios chi at rxin.

⁴ Ja cꞌa tre ja tiꞌoj tiꞌij ja ntzujux chwach rachbal jun winak owi chwach rachbal jun nakun quewaꞌ nbij chewe riꞌ. Bien kotak chi ja rachbal jun winak owi rachbal jun nakun waweꞌ chwachꞌulew arjaꞌ ma dios ta, ni majun rcꞌaslemal, bien kotak chi xa jun ja Dios, mchita jun.

⁵ Masqui ja winak nquibij chi e qꞌuiy ja dios ja recꞌo chicaj in chwach ja rwachꞌulew pro ajoj kotak chi xa jun ja Dios. Congana e qꞌuiy ja nbix chique chi: —Ixix ix kadios, necheꞌxi, in e qꞌuiy chakajaꞌ ja nbix chique chi: —Ixix ix kajaw, necheꞌxi.

⁶ Pro ja cꞌa rajoj bien kotak chi xa jun ja Dios, arjaꞌ Tatixel, ruqꞌuin arjaꞌ winakarnakto wiꞌ nojelal ja winakarsanto jeꞌe, arjaꞌ winakarsyon kaxin utzcꞌa chi nokoc ok yaꞌbal rukꞌij. In bien kotak chakajaꞌ chi xa jun ja kajaw jariꞌ Jesucristo, arjaꞌ cojon rmal ja Dios chi rwinakarsaxic nojelal ja winakarsanto jeꞌe in rmal arjaꞌ tok cꞌo jun cꞌacꞌa cꞌaslemal yatajnak chic chake.

⁷ Ixix nebij chi: —Jariꞌ kotak chic, nixcheꞌe, pro ecꞌoli ja kachꞌalal ja majaꞌn ticotakij como ecꞌo jujun ja nquechꞌob chi cꞌoli rcꞌaslemal ja rachbal jun winak owi rachbal jun nakun. Ejeꞌeꞌ ni cꞌamonnakto wiꞌ chique chi queriꞌ nquechꞌob. Ja cꞌa wi chaka jalal quetiꞌ juleꞌ tiꞌij ja tzujun chwach rachbal jun winak owi chwach rachbal jun nakun ja nquechꞌob ejeꞌeꞌ chi junwiꞌ chi na dios ja queyaꞌ rukꞌij in numaj tiꞌonem ja canma rmal. Ja canma como majaꞌn ticowir chipan ja rtzobal Dios chewiꞌ tok ntiꞌoni.

⁸ Ja cꞌa nkatiꞌ waweꞌ chwachꞌulew ma ja tariꞌ ntoꞌo kaxin ja tok xkoꞌekaji chwach ja Dios. Ja wi nkatiꞌ ja tiꞌij jariꞌ ni majun utzil rcꞌamonto tre ja kanma in wi matikatiꞌ ni majun itzel rcꞌamonto tre ja kanma chakajaꞌ.

⁹ Xarwariꞌ tebanaꞌ cuenta, masqui ix libre chi netiꞌ ja tiꞌij ja tzujun chwach rachbal jun winak owi chwach rachbal jun nakun pro maxta xa rumac ja rix libre tok xqueyojtaji ja kachꞌalal ja cꞌa nquechꞌob na chi maxla xajan ntiꞌi. Maxta cꞌoli nak ta teban ja xqueꞌetakchibej ta chi nquetiꞌ.

¹⁰ Tacꞌa atat, wi attzꞌubul chipan jun templo ja bar ntzujux wiꞌ sacrificio chwach rachbal jun winak in wi amajon rtiꞌic ja tiꞌij ja rocnak sacrificio, in wi cꞌo jun kachꞌalal natrutzꞌat chi amajon rtiꞌic maxla arjaꞌ numaj chic rtiꞌic chakajaꞌ pro xa amwal atat como arjaꞌ rotak chi congana awotak. Pro xa caꞌiꞌ rucꞌuꞌx tok nutiꞌ in numaj tiꞌonem ja ranma rmal.

¹¹ Queriꞌ cꞌa nuban, xcꞌa rmal ja congana awotak atat xa chewiꞌ tok nyojtaji ranma ja kachꞌalal ja majaꞌn ticowiri, amac atat tok nyojtaji ja kachꞌalal pro makanaꞌ maquita cami ja Cristo pa rcuenta.

¹² Ja cꞌa tok neban queriꞌ chique ja kachꞌalal jariꞌ il mac ja neban, xa nesoc ja canma pro makanaꞌ cowirnak chi ta cꞌa ja canma. Ja tok neban queriꞌ chique ja kachꞌalal jariꞌ ni chi Cristo neban wiꞌ chakajaꞌ.

¹³ Rmalcꞌariꞌ nbij chewe chi anin in conforme ruqꞌuin ja ni mchita wiꞌ tiꞌij xtintij ta chwach ja xtiyojtaji ranma jun wachꞌalal mwal. Ja wachꞌalal wi cꞌo jun comida nuchꞌob chi xajan nutiꞌ jariꞌ mta moda xtintakchiꞌij ta chi rtiꞌic.