1 Corintios 7 - Tz'utujil (Ja Cꞌacꞌa Chominem)

¹ Ja cꞌa camic noktzijon chic tre ja xecꞌwaxaj chwe chipan ja carta ja xetak wqꞌuin. Ja chwe anin, jun achi wi ni mta wiꞌ rxjayil ncanoj jariꞌ utz, mta nuban.

² Pro como congana benak pa nim ja nemacun achiꞌiꞌ cuqꞌuin ixokiꞌ mejor ja neban, ja rix achiꞌiꞌ queꞌecanoj jujun ewixjayilal in queriꞌ chewe ixix ja rix ixokiꞌ chakajaꞌ, queꞌecanoj jujun ewachajilal.

³ Jun achi arjaꞌ yatal trij chi nuyaꞌ rgana ja rxjayil in queriꞌ tre jun ixok chakajaꞌ yatal trij chi nuyaꞌ rgana ja rchajil.

⁴ Ja rixok mta moda maquita xtuyaꞌ rcuerpo tre ja rchajil como ja rachi cꞌo rukꞌaꞌ tre rcuerpo ja rxjayil. In queriꞌ tre ja rachi chakajaꞌ mta moda maquita xtuyaꞌ rcuerpo tre ja rxjayil como ja rixok cꞌo rukꞌaꞌ tre rcuerpo ja rchajil.

⁵ Ja rixok maxta tibij tre rchajil chi ma can ta in ja rachi maxta tibij tre rxjayil chi ma can ta chakajaꞌ. Pro wi cꞌo jeꞌe ja junan nquechꞌob chi mta nqueban, wi nquipartiꞌij jun tiempo quiꞌ chi solo oración nqueban jariꞌ utz. Xar maxta chijutij tiqueban queriꞌ, chaka jalal matiquecochꞌ in netakchiꞌix rmal ja Satanás.

⁶ Ja cꞌa xinbij chewe riꞌ ewqꞌuin cꞌo wiꞌ wi neban owi mani, jawaꞌ ma jun mandamiento ta.

⁷ Pro ja ngana anin yatajnak chi ta na chique canojel ja rachiꞌiꞌ ja caniꞌ yatajnak anin chwe. Pro ja Dios cꞌoli ryaꞌon chake chikajujunal, junwiꞌ yatajnak tre jun in junwiꞌ chic yatajnak chic tre jun.

⁸ Ja cꞌa rixix ja ma ixcꞌulan ta in ixix chakajaꞌ ja recamnak chic ja rewachajilal quewaꞌ nbij chewe riꞌ, ja wi neban ixix ja caniꞌ nbanon anin, wi matecanoj jun ewachbil jariꞌ utz.

⁹ Pro wi matecochꞌ mejor quixcꞌuleꞌe. Queriꞌ nbij chewe como ma utz ta ja tok lawuloꞌ naban rmal ja chaka benak chi nayarij rwach jun ixok owi jun achi.

¹⁰ Ja cꞌa rixix ja rixcꞌulani cꞌoli xtinbij chewe camic pro jawaꞌ jun mandamiento yaꞌon can rmal ja kajaw Jesucristo, quewaꞌ nbij riꞌ: —Ja rix ixokiꞌ maxta queꞌejach can ja rewachajilal.

¹¹ Ja cꞌa wi xqueꞌejach can quixqꞌuejeꞌ cꞌa chi queriꞌ, maxta quixcꞌuleꞌ chic jutij, owi nechomij chic jutij ewiꞌ cuqꞌuin jariꞌ utz. In chakajaꞌ ja rix achiꞌiꞌ maxta queꞌejach can ja rewixjayilal. Queriꞌ nbij ja mandamiento ja ryaꞌon can ja kajaw Jesucristo.

¹² In chakajaꞌ cꞌoli xtinbij chewe ixix kachꞌalal ja recꞌamon jun ixok ja ma rniman ta ja kajaw Jesucristo pro jawaꞌ ja xtinbij chewe riꞌ mta bin can tre rmal ja kajaw Jesucristo. Quewaꞌ nbij chewe riꞌ, ja wi conforme ja rixok chi nqꞌuejeꞌ ewqꞌuin maxta tejach can.

¹³ In queriꞌ chewe ixix chakajaꞌ kachꞌalal ja recꞌamon jun achi ja ma rniman ta ja Jesucristo, ja wi conforme ja rachi chi nqꞌuejeꞌ ewqꞌuin maxta tejach can chakajaꞌ.

¹⁴ Queriꞌ nbij chewe como e xin Dios ja rewachajilal ja ma quiniman ta ja Jesucristo. Como ixix eniman ja Jesucristo in como xa jun quibanon ja rewachajilal ewqꞌuin xa chewiꞌ tok e xin Dios. In queriꞌ cꞌa chewe ixix chakajaꞌ kachꞌalal achiꞌiꞌ, e xin Dios ja rewixjayilal ja ma quiniman ta ja Jesucristo pro xa rumac ja xa jun quibanon ewqꞌuin tok banon queriꞌ chique. Ja cꞌa wixta ma e xin Dios ta ja cꞌa rewalcꞌwal e junan ta cꞌariꞌ cuqꞌuin calcꞌwal winak ja ma cotak ta rwach ja Dios. Pro ja rewalcꞌwal ixix ejeꞌeꞌ e xin Dios, epartiꞌin.

¹⁵ Pro xa nak ta chewe kachꞌalal wi achi owi ixok wi nrajoꞌ ja rawachbil natrujach can in wi ma rniman ta ja Jesucristo tayaꞌaꞌ lugar tre chi nbe. Ja cꞌa wi natrujach can jariꞌ ma atximon chi ta ruqꞌuin. Como ja Dios arjaꞌ nrajoꞌ chake chi quiꞌil nokqꞌuejeꞌe in rmalariꞌ tok xokrsiqꞌuij, ma rmal ta chi nkaban sícꞌ chꞌaꞌoj.

¹⁶ Kachꞌalal ixokiꞌ ¿la ewotak cꞌa chi nixcowini neꞌechꞌec ja rewachbil chi nquewil ja totajem xin Dios? In ixix chakajaꞌ kachꞌalal achiꞌiꞌ ¿la ewotak cꞌa chi nixcowini neꞌechꞌec ja rewachbil chi nquewil ja totajem xin Dios?

¹⁷ Xarwariꞌ nbij chewe chejujunal, ja yatajnak chewe rmal ja kajaw Jesucristo quixqꞌuejeꞌ conforme ruqꞌuin. Ja rixocnak wiꞌ tok xixsiqꞌuix rmal ja Dios quixqꞌuejeꞌ conforme ruqꞌuin chakajaꞌ. Ja cꞌa xinbij chewe riꞌ jariꞌ nbij chique canojel ja kachꞌalal xa nak ta chi iglesiaꞌal ecꞌo wiꞌ.

¹⁸ Ja tok xatsiqꞌuix rmal ja Dios wi atbanon chic circuncidar triꞌ maxta tayoj ja rawetal chi atbanon circuncidar. Nowi ma atbanon ta circuncidar triꞌ maxta catban chic circuncidar.

¹⁹ Ma ja ta vale ja natban circuncidar in ma ja ta vale chakajaꞌ ja macatban circuncidar pro ja más vale jariꞌ tok nanimaj nojel ja nbij ja Dios chawe chi naban.

²⁰ Ja rixocnak wiꞌ ja tok xixsiqꞌuix rmal ja Dios quixqꞌuejeꞌ conforme ruqꞌuin, queriꞌ nbij chewe chejujunal.

²¹ Ja tok xatsiqꞌuix rmal ja Dios ja wi at esclavo atocnak wiꞌ pa rukꞌaꞌ ja rapatrón chꞌenchilaꞌ, ma catoclaꞌ ta il tre. Pro wi ntzujux chawe chi natel libre pa rukꞌaꞌ ja rapatrón mejor catel cꞌa pa rukꞌaꞌ.

²² Ja wi at esclavo tok xatsiqꞌuix rmal ja Dios in tok xanimaj ja kajaw Jesucristo chꞌenchilaꞌ como atwasanel chic libre pa rukꞌaꞌ ja il mac, at rxin chic ja kajaw Jesucristo. Ja cꞌa wi ma at esclavo ta tok xatsiqꞌuix rmal ja Dios pro kas turkaj chawe chi at esclavo chic rxin ja Cristo chi arjaꞌ nbano mandar awxin.

²³ Ja Dios cꞌoli xutoj ja xixrlokꞌbej, pa rukꞌaꞌ chic ixcꞌo wiꞌ, maxta teyaꞌ ewiꞌ pa quekꞌaꞌ winak chi xquixqueban ta mandar chi rbanic ja ma rvoluntad ta arjaꞌ.

²⁴ Queriꞌ cꞌa nbij chewe wachꞌalal chejujunal, ja rixocnak wiꞌ ja tok xixsiqꞌuix rmal ja Dios quixqꞌuejeꞌ conforme ruqꞌuin in turkaj chewe chi Dios cꞌol ewqꞌuin.

²⁵ Ja cꞌa rixix ja ni mta wiꞌ ewachbil ecanon cꞌoli xtinbij chic chewe riꞌ. Ja xtinbij chewe riꞌ mta bin can tre rmal ja kajaw Jesucristo pro jun paxbanem nyaꞌ anin chewe. Xarwariꞌ, yatal chewe chi nyukeꞌ ecꞌuꞌx ruqꞌuin ja paxbanem nyaꞌ chewe pro xa rmal ja yatajnak chwe rmal ja kajaw Jesucristo tok nbij queriꞌ chewe como arjaꞌ xpokonaj nwach, xuyaꞌ chwe chi inocnak apóstol rxin.

²⁶ Rmalcꞌariꞌ nbij chewe, ja rixocnak wiꞌ camic quixqꞌuejeꞌ conforme ruqꞌuin. Queriꞌ nbij chewe como cꞌo jun cꞌayewalaj tiempo penak chikawach.

²⁷ Caniꞌ nbin chic chique ja kachꞌalal ja cꞌo quixjayilal maxta tiquechꞌob chi nequeyaꞌ can. Ja cꞌa wi mta awixjayil maxta tachꞌob chi nacanoj.

²⁸ Pro ja wi natcꞌuleꞌe jariꞌ ma xajan ta in queriꞌ cꞌa tre jun xtan chakajaꞌ, ma xajan ta ja wi ncꞌuleꞌe. Xar nbij chewe, wi nixcꞌuleꞌe cꞌo jeꞌe rpokonal newil na chipan ja recꞌaslemal rmal in ja ngana anin maquita nixkꞌax chipan awaꞌ rpokonal riꞌ.

²⁹ Bien tecꞌwaxaj ja xtinbij chewe riꞌ wachꞌalal, xa patali ja tiempo ja yatajnak chake in congana nban recomendar chewe chi maxta cꞌoli nak ta xtikꞌilo ta ewxin chi rbanic cumplir xa nak ta nrajoꞌ ja Dios chewe chi neban. Ja wi cꞌol awixjayil maxta tibe acꞌuꞌx ruqꞌuin in rmaltariꞌ maquita naban cumplir ja nrajoꞌ ja Dios chawe chi naban.

³⁰ Owi bis okꞌej amajon maxta rmal ja bis okꞌej maquita naban cumplir. Owi quicotemal amajon maxta rmal ja quicotemal maquita naban cumplir. Ja cꞌa tok cꞌo jeꞌe nalokꞌ maxta tibe acꞌuꞌx ruqꞌuin in rmaltariꞌ maquita naban cumplir.

³¹ Maxta congana tibe ecꞌuꞌx ruqꞌuin nakun jeꞌe waweꞌ chwachꞌulew in rmaltariꞌ maquita neban cumplir xa nak ta nrajoꞌ ja Dios chewe chi neban. Queriꞌ nbij chewe como jawaꞌ rwachꞌulew riꞌ xa rmajon kꞌaxem.

³² Ja cꞌa nwajoꞌ chewe, maquita cꞌo rjawaxic chewe chi nebisoj ja xin rwachꞌulew. Tacꞌa jun achi wi mta rxjayil xa jaꞌ nbisoj ja xin kajaw Jesucristo in quewaꞌ nuchꞌob kaj pa ranma riꞌ: —Anin nwajoꞌ nyaꞌ rgana ja wajaw Jesucristo xa nak ta nrajoꞌ chwe chi nban, neꞌe.

³³ Pro wi cꞌo rxjayil jariꞌ cꞌo rjawaxic tre chi nbisoj ja xin rwachꞌulew chakajaꞌ, rjawaxic tre chi nuchꞌob nak rgana ja rxjayil tre chi nuban.

³⁴ In queriꞌ cꞌa chique chakajaꞌ ja rixokiꞌ, ja cꞌo rchajil junwiꞌ nbisoj in junwiꞌ na nbisoj ja mta rchajil rcanon. Jun ixok wi mta rchajil xa jaꞌ nbisoj ja xin kajaw Jesucristo in quewaꞌ nuchꞌob kaj pa ranma riꞌ: —Anin nwajoꞌ npartiꞌij wiꞌ chi solo ja xin Dios nbisoj pro ni chi in jun, neꞌe. Pro wi cꞌo rchajil jariꞌ cꞌo rjawaxic tre chi nbisoj ja xin rwachꞌulew chakajaꞌ, rjawaxic tre chi nuchꞌob nak rgana ja rchajil tre chi nuban.

³⁵ Ja cꞌa xinbij chewe riꞌ ma wxin ta nwajoꞌ chewe, ma puersa ta nban chewe chi maquixcꞌuleꞌe. Pro ja kas nwajoꞌ chewe chi utz nixeli, ja kas ngana anin ni ta ja wiꞌ ja kajaw Jesucristo nechꞌob in ma junwiꞌ chi ta nbe wiꞌ epensar.

³⁶ Pro jun tatixel wi nuchꞌob chi ma rubey ta ja maquita nuyaꞌ ja rmeꞌal pa cꞌulbic, wi nutzꞌat chi xa nrajiꞌx más ja rmeꞌal in wi nutzꞌat chi rjawaxic chi nuyaꞌ pa cꞌulbic jariꞌ tibanaꞌ janiꞌ rchꞌobon, tiyaꞌaꞌ lugar tre ja rmeꞌal chi necꞌuleꞌ ruqꞌuin ja ralaꞌ, jariꞌ ma xajan ta ja nuban.

³⁷ Pro jun tatixel wi bien rotak chi mta nuban ja maquita nuyaꞌ ja rmeꞌal pa cꞌulbic, wi nutzꞌat chi ma rjawaxic ta chi nuyaꞌ in wi cꞌo rukꞌaꞌ tre chi nuyaꞌ owi mani in wi bien rchꞌobon kaj pa ranma chi mejor ja ni maticanoj wiꞌ rchajil ja rmeꞌal jariꞌ utz ja nuban.

³⁸ Queriꞌ cꞌa rbanic, jun tatixel wi nuyaꞌ ja rmeꞌal pa cꞌulbic jariꞌ utz ja nuban in chakajaꞌ wi matuyaꞌ ja rmeꞌal pa cꞌulbic jariꞌ más na utz ja nuban.

³⁹ Jun kachꞌalal ixok arjaꞌ chapon rmal ja ley xin Dios chi matiquejach quiꞌ ruqꞌuin ja rchajil jaruꞌ pa tiempo ncꞌaseꞌe ja rchajil. Pro ja wi ncami ja rchajil jariꞌ libre chic ja kachꞌalal chi ncꞌuleꞌ chic jutij xa nak ta cꞌo rgana nucꞌam pro xarwariꞌ wi yukul rucꞌuꞌx ja rachi ruqꞌuin ja kajaw Jesucristo.

⁴⁰ Pro ja chwe anin más na quiꞌil tre ja wi maticꞌuleꞌ chic in ja nchꞌob anin chi inucꞌan rmal ja rEspíritu Santo chakajaꞌ.