1 Corintios 5 - Tz'utujil (Ja Cꞌacꞌa Chominem)

¹ Cꞌo takaꞌan jun itzelal bantajnak checojol elnak rbixic como cꞌo jun chewe xucꞌam ja rteꞌbal. Jariꞌ congana itzel na, xnaꞌ xa ma queriꞌ ta nqueban ja winak ja ma cotak ta rwach ja Dios.

² Pro ixix takaꞌan cꞌa emajon na ryaꞌic ekꞌij pro ja kas yatal chewij bis okꞌej ta xeban, xewasajel ta ja rachi checojol ja banowi ja ritzelal.

³ Como anin nchꞌobon chic nak rjawaxic chi nba̱n tre ja rachi. Masqui anin ma incꞌo ta ewqꞌuin pro ja respíritu wxin jariꞌ cꞌol ewqꞌuin.

⁴ Anin xinban caniꞌ incꞌol ewqꞌuin in pa rubiꞌ ja kajaw Jesucristo xinkꞌet tzij trij ja rachi ja banowi ja ritzelal. Quewaꞌ neban riꞌ, ja tok emolon chic jutij ewiꞌ ewachbil ja respíritu wxin in tok cꞌoli ja poder rxin ja kajaw Jesucristo checojol

⁵ tokocꞌariꞌ xtewasajel checojol ja rachi, xtoc pa rukꞌaꞌ ja Satanás in ja cꞌa rcuerpo xtutij na rpokonal pa rukꞌaꞌ ja Satanás. Queriꞌ ta cꞌa neban tre utzcꞌa chi ja respíritu rxin jariꞌ matitzꞌiloxi pro ntotaji tokoriꞌ tok xterilaꞌ ja nimlaj kꞌij ja tok xtipi chic jutij ja kajaw Jesús.

⁶ Pro ma rubey ta ja rebanon ja xa neyaꞌ nojoj ekꞌij eyon pro cꞌol itzelal bantajnak checojol. ¿La ma ewotak ta cꞌa chi ja ritzelal queriꞌ nuban ja caniꞌ nuban ja levadura? Como ja levadura masqui xa tutzꞌit pro nbe pa nim, npaxij riꞌ chipan ja kꞌor nojelal.

⁷ Ma teban chi ta más ja ritzelal ja rebanonto ojer utzcꞌa chi bien kꞌalaj chi cꞌacꞌa chic ja recꞌaslemal, ix caniꞌ juleꞌ kꞌor cꞌacꞌa ja ni majun levadura ruqꞌuin. In ni katzij wiꞌ chi cꞌo jun cꞌacꞌa cꞌaslemal yatajnak chewe rmal ja Cristo pro jun cꞌaslemal ja ni majun itzelal rcꞌan. Queriꞌ nbij chewe como ja Cristo arjaꞌ camsaxi rmal ja kil kamac, ban tre caniꞌ nba̱n chique ja tak carnelo ja neꞌoc sacrificio ja necamsax parwiꞌ altar pa tak nmakꞌij pascua.

⁸ Rmalcꞌariꞌ nbij chewe, kawasajel jutzꞌit ja ritzel tak naꞌoj ja kucꞌan ojer rachbil nojel ja kaban ja xa itzelal rcꞌamonto. Ni ta katzij wiꞌ jutzꞌit nojel ja nkabij in nojel ja nkaban, nojel ta kacꞌuꞌx nojel ta kanma nkaban.

⁹ Turkaj chewe ja jun chic carta ja ntakon chic ewqꞌuin, cꞌoli xintzꞌibaj chipan quewariꞌ: —Ma queꞌewachbilaj ta achiꞌiꞌ ja nqueban ja il mac cuqꞌuin ixokiꞌ, xincheꞌ chewe.

¹⁰ Pro tok xinbij queriꞌ chewe ma ja ta xinbij chewe chi maqueꞌekꞌijlaꞌ ja rebanol itzelal ja ma e kachꞌalal ta. Como ja waweꞌ chipan ja rwachꞌulew riꞌ ni newil wiꞌ ewiꞌ cuqꞌuin winak ja ma quiniman ta ja Jesucristo ja nqueban ja il mac owi cuqꞌuin winak ja chaka benak chi yarin quinakun winak neꞌoclaꞌ wiꞌ il owi cuqꞌuin ja ralakꞌomaꞌ owi cuqꞌuin ja nexuqueꞌ chwach rachbal jun winak owi chwach rachbal jun nakun. Ja wi newajoꞌ owi mani puersa newil ewiꞌ cuqꞌuin. Ja cꞌa wi mta egana newil ewiꞌ cuqꞌuin rjawaxic cꞌariꞌ chi nixel ta chipan awaꞌ rwachꞌulew riꞌ.

¹¹ Pro ja xintzꞌibaj chipan ja carta quewaꞌ rbanic riꞌ, ma queꞌewachbilaj ta ja rachiꞌiꞌ ja nebini chi e kachꞌalal pro nqueban ja il mac cuqꞌuin ixokiꞌ owi chaka benak chi nquiyarij quinakun winak owi nexuqueꞌ chwach rachbal jun winak owi chwach rachbal jun nakun owi xa pokonlaj tak tzij netzijoni owi xa e kꞌabarelaꞌ owi xa e alakꞌomaꞌ. Ja kachꞌalal ja nebano queriꞌ nixtacꞌa nixwaꞌ ta cuqꞌuin.

¹² Ja cꞌa winak ja ma e kachꞌalal ta jariꞌ mta nukꞌaꞌ chique xtinkꞌet ta tzij chiquij. Pro ja kachꞌalal ja recꞌo checojol ¿la ma chi ekul ta cꞌa ixix ecꞌo wiꞌ chi neꞌechomij ja tok cꞌoli ja ritzelal nqueban?

¹³ Pro ja ma e kachꞌalal ta jariꞌ Dios nchomin ariꞌ. Ja cꞌa rixix camic tewasajel cꞌa checojol ja rachi ja banowi ja ritzelal.