1 Corintios 4 - Tz'utujil (Ja Cꞌacꞌa Chominem)

¹ Ja cꞌa rajoj wachꞌalal kas ta xtichꞌobtaj emwal chi xa ok tak moso rxin ja Cristo in yaꞌon chi kakul chi nkayaꞌ rbixic ja utzlaj tzij xin Dios ja ma kꞌalasan ta nabey.

² In tre jun achi tok cꞌoli yaꞌon chi rukul rmal ja rpatrón jariꞌ congana rjawaxic tre chi ni nuban wiꞌ cumplir ja nbix tre rmal ja rpatrón chi nuban.

^3-4 Pro ja kajaw Jesucristo xa ruyon arjaꞌ cꞌo rukꞌaꞌ tre chi nbij pon wi nbanon cumplir owi mani. Pro wi ixix nixbin pon chi ma nbanon ta cumplir in chakajaꞌ xa nak ta chi winakil ja rocnak kꞌetol tzij waweꞌ chwachꞌulew wi arjaꞌ nbin pon chi ma nbanon ta cumplir jariꞌ ma kas ta ninoclaꞌ il chwach. In nixtacꞌa anin ta chakajaꞌ cꞌo ta nukꞌaꞌ tre chi xtinbij pon ta wi nbanon cumplir owi mani. Masqui anin nnaꞌ kaj camic chi mta ja ma utz ta nbanon pro matibij tzij ariꞌ chi mta, maxla cꞌoli pro xa mta nnaben. Pro xa ruyon ja kajaw Jesucristo ja cꞌo rukꞌaꞌ chwe chi nukꞌet tzij chwij.

⁵ Ja cꞌa tok xtipi chic jutij ja kajaw Jesucristo jariꞌ tiempo xin kꞌetoj tzij rmalcꞌariꞌ nbij chewe chi ma tekꞌetlaꞌ pon chi ta tzij ixix trij jun winak. Ja cꞌa tok xtipeti ja kajaw Jesucristo arjaꞌ nlasaj na pa sakil nojel ja rawatali, arjaꞌ nkꞌalasaj na chakajaꞌ nojel ja nkachꞌob kaj pa tak kanma. Ja cꞌa tok xtikꞌalastaj rmal cꞌacꞌariꞌ ja Dios arjaꞌ xtibin chake chikajujunal wi utz kabanon owi mani.

⁶ Nojel awaꞌ xinbij chewe riꞌ wachꞌalal jun ejemplo cꞌawaꞌ chewe. Anin xincoj wiꞌ chipan ja rejemplo in xincoj ja rApolos chipan chakajaꞌ, ja kas ngana anin cꞌo ta rcꞌamonto chewe. Xinchꞌob chewach chi anin wachbil ja rApolos xa ok moso rxin ja Jesucristo. Jariꞌ xinchꞌob chewach utzcꞌa chi newotakij ja ncꞌu̱t chikawach rmal ja rtzobal Dios chi ma winak ta ja neyaꞌ quekꞌij. Ja kas nwajoꞌ anin, ni ta majun chewe congana ta nim xtunaꞌ kaj xtibij ta tre jun kachꞌalal: —Anin más na buena ja nmaestro ja bar ncojon wiꞌ wiꞌ pro ja rawxin atat ma kas ta buena, xticheꞌ ta.

⁷ Ja cꞌa wi cꞌo jun nunaꞌ kaj chi congana nim pro ¿nak cꞌa bin tre chi arjaꞌ más nim rukꞌij chiquewach ja juleꞌ chic kachꞌalal? ¿La ma Dios ta cꞌa sipan tre nojelal ja cꞌo ruqꞌuin? Ja wi xa rcochin tre ja Dios ¿nak cꞌa tre tok nyabej kaj rukꞌij ruyon, nak cꞌa tre tok nuban tre caniꞌ xa ma sipan ta?

⁸ ¿La ixnojnak chi cꞌa ixix tre ja rtzobal Dios, la mchita cꞌa ncꞌatzin chewe? ¿La cꞌo chi cꞌa ewqꞌuin ixix nojel ja mebaꞌil xin Dios? ¿La ixocnak chi cꞌa ixix ix rey nabey chikawach ajoj chipan ja gobierno xin Dios? Congana ta buena ariꞌ ja wixta ixocnak chic ix rey como jariꞌ ajoj jun ta cꞌariꞌ okocnak chic rey ewqꞌuin chakajaꞌ.

⁹ Congana ta buena ja queriꞌ como ja rajoj camic congana majtajnak rbanic pokon chake cumal winak. Ja nchꞌob anin ja Dios arjaꞌ ryaꞌon lugar chique ja winak chi quibanon chake ja rok apóstol ni ma ok vale ta, quibanon chake caniꞌ kꞌeton chic tzij chakij chi nokcamsaxi. Queriꞌ nbij chewe como mta ja maquita kꞌalajinnak wiꞌ ja rpokonal katijon, bien kꞌalaj chiquewach winak in bien kꞌalaj chiquewach ángel chakajaꞌ.

¹⁰ Ajoj tok nkayaꞌ rbixic ja Cristo chique ja winak xa ok nacnak tak winak nokcheꞌxi cumal no ixix nenaꞌ kaj chi congana ewotak chic nojelal tre nak rbanic ja Cristo. Ajoj ma kas ta ok fuerte no ixix congana ix fuerte nenaꞌ kaj. Ixix congana nixban respetar no ajoj xa itzel noktzꞌati.

¹¹ Ja cꞌa rpokonal cꞌa majtajnak na chakij camic caniꞌ tre waꞌal chakichiꞌ in caniꞌ tre katziak kas tak lawuloꞌ chic chakij. Cꞌo jeꞌe noc kꞌaꞌ chakij in mta kochoch ja ni ta kaxin wiꞌ.

¹² Congana nokcosi, noksamaj ruqꞌuin kakꞌaꞌ. Ja tok noktzꞌuji tok nokyokꞌi cumal winak ja cꞌa nkaban, utzil xin Dios nkacꞌutuj pa quewiꞌ. Ja tok nba̱n pokon chake nkacochꞌ, matikayaꞌ rjil rcꞌaxel.

¹³ Ecꞌoli nebin chake chi xa ok itzel tak winak pro ajoj nkachꞌob chiquewach pan utzlaj tzij. Ja banon chake cumal ja winak waweꞌ chwachꞌulew xa ok caniꞌ kꞌayis ja nel pa mes, xa ok caniꞌ nakun ja xa tzꞌil nchꞌakixel in niquirwariꞌ majtajnak rbanic chake camic.

¹⁴ Nojel awaꞌ xintzꞌibaj chewe riꞌ ma rmal ta chi qꞌuixbal xtenaꞌ ta rmal, ma queriꞌ ta. Pro nojel awaꞌ wariꞌ jun paxbanem chewe, nbanon chewe ix caniꞌ chakꞌlaj tak walcꞌwal.

¹⁵ Ix walcꞌwal como anin xinyoꞌ rbixic chewe ja utzlaj tzij xin Cristo Jesús in rmalariꞌ tok xa jun ebanon ruqꞌuin camic. Masqui e lajuj mil maestro xquewinakari ja nechꞌobo chewach nak rbanic ja Cristo pro ni xa nuyon wiꞌ anin inocnak etataꞌ chwach ja Dios.

¹⁶ Como anin in etataꞌ rmalcꞌariꞌ tok congana nban recomendar chewe chi necꞌam ja rejemplo ja nmajon ryaꞌic chewach.

¹⁷ Queriꞌ nwajoꞌ chewe in xcꞌa rmalariꞌ tok xintakel ewqꞌuin ja Timoteo. Ja cꞌa Timoteo arjaꞌ caniꞌ chakꞌlaj walcꞌwal, arjaꞌ ni nuban wiꞌ cumplir ja najoꞌx tre rmal ja kajaw Jesucristo chi nuban. Xintakel ewqꞌuin utzcꞌa chi arjaꞌ nernataj chewe janiꞌ ja rejemplo ja nyaꞌ anin chiquewach ja kachꞌalal ja tok nchꞌob chiquewach nak rbanic ja Cristo. Jariꞌ ejemplo ja nyaꞌ anin chiquewach ja riglesia pro chiquewach canojelal xa nak ta chi tinamital ecꞌo wiꞌ.

¹⁸ Pro ecꞌoli checojol, ejeꞌeꞌ congana e nimak nquenaꞌ kaj in quewaꞌ nquibij riꞌ: —Ja Pablo xa nxbej riꞌ npeti kuqꞌuin, necheꞌe.

¹⁹ Pro anin can ninbe ewqꞌuin chanim wi xtiyaꞌ lugar chwe rmal ja kajaw Dios chi ninbe. Ja cꞌa tok xquinekaj ewqꞌuin bien ntzꞌat na nak quibanic ja juleꞌ winak ja kas e nimak nquenaꞌ kaj. Nixtacꞌa xtinyaꞌ ta jutzꞌit caso tre ja juleꞌ tzij nquibij ja ni majun poder rcꞌan pro bien ntzꞌat na ja wi cꞌoli ja poder xin Dios cuqꞌuin owi mani.

²⁰ Queriꞌ nbij chewe como ja tok nsamaji ja gobierno xin Dios pan acꞌaslemal jariꞌ ma chaka ta nabij juleꞌ tzij pro cꞌoli ja poder xin Dios awqꞌuin.

²¹ Ja cꞌa camic ewqꞌuin ixix cꞌo wiꞌ nak nban chewe ja tok xquinekaj ewqꞌuin, wi pa chꞌolinem nintzijon ewqꞌuin in nixnuban castigar owi nechomij pon ewiꞌ utzcꞌa kas lokꞌ nkanaꞌ kiꞌ in pa quiꞌil noktzijoni.