1 Corintios 2 - Tz'utujil (Ja Cꞌacꞌa Chominem)

¹ Ja cꞌa ranin wachꞌalal tok xinekaj ewqꞌuin xinyaꞌ rbixic chewe ja utzlaj tzij xin Dios ja ncꞌutu chikawach nak rbanic ja Jesucristo pro ma nimak tak tzij ta xincoj chi rbixic in ma nimak tak naꞌoj ta quixin winak xincoj ta chakajaꞌ.

² Como anin tok majaꞌn quinbe ewqꞌuin bien xinchꞌob kaj pa wanma chi tok xquinekaj ewqꞌuin solo Jesucristo ja nenyaꞌaꞌ rbixic chewe pro jun Cristo ja camsax chwach cruz.

³ Ja cꞌa tok xinqꞌuejeꞌ checojol bien xurkaj chwe chi anin xin way xin yaꞌ, congana nxben wiꞌ como ja samaj congana al xinnaꞌ.

⁴ Bien turkaj chewe janiꞌ ja ntzobal ja tok xinyaꞌ rbixic ja rtzobal Dios chewe. Ma xinbij ta juleꞌ nimak tak tzij chewe ja xixnbochibej ta, ma xincoj ta nimak tak naꞌoj quixin winak. Pro ja tok xintzijon ewqꞌuin bien xetzꞌat chi congana samaji ja rEspíritu Santo, congana samaji ja poder xin Dios in triꞌ xetzꞌat wiꞌ chi ni katzij wiꞌ ja xinbij chewe.

⁵ Queriꞌ nrajoꞌ ja Dios utzcꞌa chi bien ntiqueꞌe ja yukulbal ecꞌuꞌx ruqꞌuin ja Jesucristo pro ma rmal ta nimak tak naꞌoj quixin winak tok ntiqueꞌe, rumac ja poder xin Dios ja xetzꞌat.

* * * * * * * * * *

⁶ Cꞌo nacꞌa ja nimak tak naꞌoj ja nkachꞌob chiquewach ja kachꞌalal ja bien tiquili ja yukulbal quecꞌuꞌx ruqꞌuin ja Jesucristo pro jariꞌ ma nimak tak naꞌoj ta ja xa xin rwachꞌulew in nixtacꞌa nimak tak naꞌoj ta chakajaꞌ quixin nimak tak winak ja nebano mandar waweꞌ chwachꞌulew, juleꞌ winak ja xa nekajsax na rmal ja Dios.

⁷ Pro ja nimak tak naꞌoj ja nkachꞌob chiquewach ja kachꞌalal jariꞌ naꞌoj xin Dios, juleꞌ naꞌoj ja ma kꞌalasan ta nabey, awatal chiquewach winak. Jawaꞌ nimak tak naꞌoj riꞌ ni rchꞌobonto chi wiꞌ ja Dios ja tok majaꞌn titzꞌucarsaj ja rwachꞌulew, ni rchominto chi wiꞌ chi nuyaꞌ na chake chi nkucꞌaj na jun cꞌaslemal ja congana nim rukꞌij ja caniꞌ rcꞌaslemal arjaꞌ.

⁸ Pro jawaꞌ nimak tak naꞌoj xin Dios riꞌ ma xchꞌobtaj ta cumal ja kꞌetol tak tzij ja nebano mandar waweꞌ chwachꞌulew, ni majun chique chꞌobtaj ta rmal. Ja cꞌa wixta chꞌobtaj cumal maquita cꞌa querip ariꞌ chwach cruz ja kajaw Jesucristo ja ni rxin wiꞌ chi cꞌaslemal xin Dios rcꞌan.

⁹ Pro ja cꞌa queban, queriꞌ ja caniꞌ tzꞌibtal can chipan ja rtzobal Dios, quewaꞌ nbij riꞌ: —Ja Dios cꞌoli ja rchominto ja nuyaꞌ na chique ja winak ja neꞌajoꞌn rxin pro jariꞌ ni majun winak rtzꞌaton ta ruqꞌuin ta rwach in nixtacꞌa rcꞌaxan ta ruqꞌuin ta rxquin in nixtacꞌa chꞌobtajnak ta rmal pa ranma chakajaꞌ, neꞌe.

¹⁰ Pro jariꞌ rkꞌalasan chic chikawach ajoj ja Dios, tokoriꞌ xkꞌalasaj ja tok xutakto ja rEspíritu Santo kuqꞌuin chi jaꞌ Espíritu Santo nchꞌobo chikawach. Queriꞌ nbij chewe como ja rEspíritu Santo arjaꞌ ni majun ja maquita nekaj wiꞌ ja rpensar, bien rotak nojel ja nuchꞌob kaj ja Dios ja rawatal chiquewach winak.

¹¹ Mchita jun nak chi ta otakyon ja nuchꞌob kaj ja Dios, xa ruyon ja rEspíritu Santo otakyon. In caniꞌ chake ajoj chakajaꞌ ja rok winak, mta jun kach winak otakyon ta ja nkachꞌob kaj pa tak kanma pro xa kayon kaj ajoj kotak.

¹² Ja cꞌa rajoj yatajnak chake ja rEspíritu Santo ja takto rmal ja Dios pro jariꞌ Espíritu xin Dios, ma xin rwachꞌulew ta. Jariꞌ Espíritu Santo arjaꞌ takto kuqꞌuin rmal ja Dios utzcꞌa chi arjaꞌ nurchꞌoboꞌ chikawach nak rbanic nojel ja kacochin tre ja Dios ja ni rchominto wiꞌ ojer chi nuyaꞌ chake.

¹³ Ja nchꞌo̱b chikawach rmal ja rEspíritu Santo jariꞌ nkachꞌob chic ajoj chiquewach juleꞌ chic xarwariꞌ ja tzij ja nkacoj chi rchꞌobic chiquewach ma ja ta juleꞌ nimak tak tzij ja cꞌutun ta chikawach cumal winak pro ja tzij nkacoj jariꞌ ja cꞌutun chikawach rmal ja rEspíritu Santo. Queriꞌ cꞌa nkaban, ja tijonem ja nya̱ꞌ chake rmal ja rEspíritu Santo jariꞌ nkachꞌob chiquewach juleꞌ chic winak pro juleꞌ winak ja neyoꞌ lugar tre ja rEspíritu Santo chi arjaꞌ nbano mandar pa tak canma.

¹⁴ Pro ja winak ja matiqueyaꞌ lugar tre ja rEspíritu Santo chi arjaꞌ nbano mandar pa tak canma ejeꞌeꞌ xa nquechꞌaꞌ ja ncꞌu̱t jeꞌe chiquewach rmal ja Espíritu Santo. Nquechꞌaꞌ como xa pa tzꞌanem nquecoj wiꞌ. In ni mta wiꞌ moda ja xtichꞌobtaj ta cumal nak rbanic como jariꞌ macatcowini nachꞌob ja maquita cꞌoli ja rEspíritu Santo nucꞌan awxin chi rchꞌobic.

¹⁵ Pro ja tok nkayaꞌ lugar tre ja rEspíritu Santo chi arjaꞌ nbano mandar pa tak kanma jariꞌ bien nchꞌobtaj kumal nojel ja ncꞌu̱t jeꞌe chikawach rmal pro ja winak ja matiqueyaꞌ lugar tre ejeꞌeꞌ ni majun chique xticowin ta xtuchꞌob ta janiꞌ ja kanaꞌoj ajoj.

¹⁶ Queriꞌ rbanic caniꞌ tzꞌibtal can chipan ja rtzobal Dios, quewaꞌ nbij riꞌ: —Ni majun winak xticowin ta xtirotakij ta janiꞌ rnaꞌoj ja Dios ja xta ruyon kaj, ni majun winak xticowin ta xtuyaꞌ ta jun paxbanem tre ja Dios. Queriꞌ ja tzꞌibtal can. Pro ja rajoj ocnak rnaꞌoj ja Cristo chake chewiꞌ tok matichꞌobtaj cumal ja juleꞌ chic winak janiꞌ ja kanaꞌoj.