1 Corintios 16 - Tz'utujil (Ja Cꞌacꞌa Chominem)

¹ Camic noktzijon jurata ewqꞌuin tre ja rayuda ja kamajon rmolic quixin ja kachꞌalal ja cꞌo rjawaxic chique. Ja caniꞌ xinbij chique ja kachꞌalal ja recꞌo pa tak iglesia ja recꞌo pa rcuenta Galacia queriꞌ ta cꞌa neban ixix chakajaꞌ, quewaꞌ rbanic riꞌ.

² Ja pa tak domingo tepartiꞌij jun ayuda chejujunal janiꞌ nixcowini neyaꞌ in tecꞌoloꞌ. Queriꞌ ta cꞌa neban utzcꞌa chi tok xquinekaj ewqꞌuin cꞌo chic ja rayuda, ma cꞌa rmolic ta nbani.

³ Ja cꞌa tok xquinekaj ewqꞌuin quewaꞌ nkaban riꞌ. Ja rixix neꞌechaꞌ juleꞌ ewachbil. Ja cꞌa ranin nenutakel pa Jerusalén chi nequijachaꞌ ja rewayuda in ixix neyaꞌel juleꞌ carta chique ja necojo quixin ja tok xqueꞌekaji.

⁴ Ja cꞌa wi rjawaxic chi ninbe anin chakajaꞌ nenwachbilajel cꞌariꞌ.

⁵ Anin nixenkꞌijlaꞌ na pro ninkꞌax na chipan ja departamento Macedonia nabey como ja nchꞌobon camic chi triꞌ ninkꞌax wiꞌ.

⁶ Pro ja rixix maxla ninqꞌuejeꞌ na jun tiempo ewqꞌuin, maxla xtocꞌo na rtiempo tew nabey in cꞌa tokoriꞌ xquinel chic jutij ewqꞌuin. Ja cꞌa tok xquinel ewqꞌuin nixcowini ninetoꞌel tre ja nviaje xa bar ta triꞌ xquinbe chi wiꞌ.

⁷ Ja camic ma ja ta nwajoꞌ ja xta pan alnak nixenkꞌijlaꞌ can pro ja kas ngana anin nineqꞌuejeꞌ na jun tiempo ewqꞌuin ja wi queriꞌ rvoluntad ja kajaw Jesucristo.

⁸ Pro ja camic ninqꞌuejeꞌ na más pa Efeso in cꞌa tokoriꞌ xtinmajel ja nviaje ja tok xtocꞌowi ja nmakꞌij Pentecostés.

⁹ Pro maquineli camic como ja Dios cꞌo jun nimlaj samaj rjakon chinwach waweꞌ pro jun samaj ja congana qꞌuiy rcꞌamonto. In jun chic, como jawaꞌ samaj riꞌ e qꞌuiy ja rcꞌulel chewiꞌ tok maquinel waweꞌ camic.

¹⁰ Ja cꞌa wi xtekaji ja Timoteo ewqꞌuin kas quiꞌil rcꞌulic tebanaꞌ, maxta tunaꞌ riꞌ emwal. Quirtariꞌ neban jutzꞌit tre como samaj rxin ja kajaw Jesucristo ja nuban, xa junan ja kasamaj chi ok caꞌiꞌ ruqꞌuin.

¹¹ Rmalcꞌariꞌ nbij chewe, maxta cꞌo jun chewe tuban tre ja ni mta. Pro ja neban, kas quiꞌil rjachic tebanaꞌto in tetoꞌoꞌto tre ja rviaje como anin wayben waweꞌ e rachbil ja juleꞌ chic kachꞌalal.

¹² Ja kachꞌalal Apolos congana xinban animar chi nbe ewqꞌuin nixerkꞌijlaꞌ: —Queꞌawachbilajel ja juleꞌ kachꞌalal ja nebe pa Corinto, xincheꞌ tre, pro arjaꞌ xbij chwe: —Ni maquincowin wiꞌ xquinbe ta cuqꞌuin camic xarwariꞌ nak kꞌij xtitzur mwal can ninbe cuqꞌuin. Queriꞌ xbij chwe.

* * * * * * * * * *

¹³ Ja cꞌa rixix ni ta xquixcꞌascꞌot wiꞌ, ni ta xtitiqueꞌ wiꞌ chi utz ja yukulbal ecꞌuꞌx ruqꞌuin ja Jesucristo, ni ta cow wiꞌ xquixpeꞌe chwach ja ritzelal, ni ta xtecoj wiꞌ rchokꞌakꞌ ja Dios pa tak ecꞌaslemal.

¹⁴ Ni ta necoj wiꞌ ja rajoben riꞌil xin Dios chi rbanic xa nak ta ja neban jeꞌe.

¹⁵ Anin kas nban recomendar chewe wachꞌalal chi congana ta neban respetar ja kachꞌalal Estéfanas. Bien ewotak chi arjaꞌ e rachbil ja rfamilia kas quinimaj ja Jesucristo nabey chewach ewanojel ja rixcꞌo chipan ja departamento Acaya. Bien ewotak chi ejeꞌeꞌ xajutij quimajon quitoꞌic ja kachꞌalal ja tok cꞌo rjawaxic chique.

¹⁶ In ixix chakajaꞌ kas nban recomendar chewe chi congana ta neꞌenimaj ja kachꞌalal ja re quitakariꞌ. In queriꞌ ta cꞌa neban chique canojel ja netoꞌo quixin ja kachꞌalal in nquetij quekꞌij chi rbanic ja samaj xin Dios.

¹⁷ Anin congana ninquicoti ja xeꞌurkaji ja rEstéfanas wqꞌuin e rachbil ja Fortunato in Acaico. Ninquicoti como ejeꞌeꞌ tok xeꞌurkaji jariꞌ caniꞌ ixix jun ixcꞌo wqꞌuin nnaꞌ kaj.

¹⁸ Como anin congana nxucꞌuxuꞌi ja wanma cumal in wotak chi nxucꞌuxuꞌi ja rewanma ixix cumal chakajaꞌ. Lokꞌ queꞌenaꞌaꞌ ja kachꞌalal ja re quitakariꞌ.

¹⁹ Ja kachꞌalal ja recꞌo pa tak iglesia chipan ja departamento Asia ejeꞌeꞌ nquetakel rutzil ewach. Ja rAquila rachbil Priscila ejeꞌeꞌ pa rubiꞌ ja kajaw Jesucristo congana nquetakel rutzil ewach in queriꞌ nqueban chakajaꞌ ja riglesia ja nquemol quiꞌ pa cochoch.

²⁰ Canojel ja kachꞌalal nquetakel rutzil ewach. Ja cꞌa rixix teyaꞌaꞌ rutzil ewach chakajaꞌ chibil tak ewiꞌ pro ruqꞌuin ta ja rajoben riꞌil xin Dios.

²¹ Ja cꞌa camic anin ja rin Pablo ntakel rutzil ewach pro jariꞌ anin nintzꞌibanel ruqꞌuin nukꞌaꞌ.

²² Ja wi cꞌo jun ma lokꞌ ta xtunaꞌ ja kajaw Jesucristo jariꞌ yatal tre chi xa itzel ntzꞌa̱t rmal ja Dios. Ja cꞌa kajaw Jesucristo arjaꞌ npi chi na jutij.

²³ Ja rutzil ja nkacochij tre ja kajaw Jesucristo xtiqꞌuejeꞌ ta ewqꞌuin.

²⁴ Anin nixwajoꞌ ewanojelal pro rumac ja xa jun kabanon ewqꞌuin ruqꞌuin ja Jesucristo tok nixwajoꞌ. Amén.