1 Corintios 11 - Tz'utujil (Ja Cꞌacꞌa Chominem)

¹ Ja caniꞌ nbanon anin chique winak wachꞌalal queriꞌ ta cꞌa neban ixix chique chakajaꞌ, tecꞌamaꞌ ja rejemplo wxin como anin chakajaꞌ ncꞌamon ja rejemplo rxin ja Cristo.

* * * * * * * * * *

² Ja cꞌa camic wachꞌalal, anin congana ninquicot chewij ja ni ninurkaj wiꞌ chewe ja tok cꞌoli xa nak ta ja neban, ninquicot chewij rmal ja remajon rnimaxic ja tijonem ja nyaꞌon can chewe.

³ Pro cꞌoli nwajoꞌ nchꞌob chewach riꞌ, ja cajaw canojel ja rachiꞌiꞌ jariꞌ ja Cristo, ja rajaw ja rixok jariꞌ ja rachi in ja rajaw ja Cristo jariꞌ ja Dios.

⁴ Jun achi tok arjaꞌ rmajon banoj oración owi rmajon ryaꞌic rbixic ja kꞌalasan chwach rmal ja Dios in wi cꞌoli ja rbotzben rwiꞌ jariꞌ xa ruqꞌuix ja rajaw nuyaꞌ.

⁵ Ja cꞌa tre jun ixok tok arjaꞌ rmajon banoj oración owi rmajon ryaꞌic rbixic ja kꞌalasan chwach rmal ja Dios in wi mta rbotzben rwiꞌ jariꞌ xa ruqꞌuix ja rajaw nuyaꞌ. Ja wi queriꞌ nuban ja rixok jariꞌ junan ruqꞌuin ja caniꞌ nsocaxel ja rsamal rwiꞌ pro ni nojelal.

⁶ Queriꞌ nbij chewe como ja rixok wi mta rgana nubotz rwiꞌ mejor tikupijel cꞌa ja rsamal rwiꞌ. Nowi xa qꞌuixbal tre jun ixok wi nkupixel ja rsamal rwiꞌ owi nsocaxel chi nojelal mejor ja nuban tibotzoꞌ cꞌa rwiꞌ.

⁷ Ja cꞌa rachi ma rubey ta ja wi nubotz rwiꞌ como arjaꞌ imagen rxin Dios in ruqꞌuin arjaꞌ natzꞌat wiꞌ chi congana nim rukꞌij ja Dios. Pro ja rixok ruqꞌuin arjaꞌ natzꞌat wiꞌ chi congana nim rukꞌij ja rachi.

⁸ Queriꞌ nbij chewe como ja tok kas tzꞌucarsaxi ja nabey achi ma ruqꞌuin ta ixok pi wiꞌ pro ja tok kas tzꞌucarsaxi ja rixok ruqꞌuin achi pi wiꞌ.

⁹ In jun chic, ja rachi ma rmal ta ja rixok tok tzꞌucarsaxi, ja tok tzꞌucarsaxi ja rixok jariꞌ rmal ja rachi tok tzꞌucarsaxi.

¹⁰ Rmalcꞌariꞌ tok nbij chewe chi jun ixok arjaꞌ yatal trij chi nubotz rwiꞌ como jariꞌ retal chi cꞌo rajaw paꞌl trij. Ja tok nubotz rwiꞌ jariꞌ utz nquetzꞌat ja ángel.

¹¹ Pro ja kaniman ja kajaw Jesucristo xa ok junan chi achi chi ixok chake. Ja rachi ncꞌatzin ixok tre in ja rixok ncꞌatzin achi tre.

¹² Queriꞌ nbij chewe como ja tok tzꞌucarsaxi ja nabey ixok ruqꞌuin achi pi wiꞌ in ja cꞌa camic tok nokalaxi ja rok achiꞌiꞌ ruqꞌuin ixok nokpi wiꞌ. Xarwariꞌ ni majun ja maquita ruqꞌuin Dios npi wiꞌ.

¹³ Techꞌoboꞌ kaj chi utz eyon, jun ixok ¿la yatal trij nechꞌob ixix chi nuban oración ruqꞌuin ja Dios ja wi ma rbotzon ta rwiꞌ?

¹⁴ Ixix bien ewotak chi jun achi ni rxin wiꞌ chi ma nimak ta ja rsamal rwiꞌ nowi nuyaꞌ lugar tre chi nimak neli caniꞌ jun ixok jariꞌ xa qꞌuixbal tre.

¹⁵ Pro jun ixok ni rxin wiꞌ chi nimak ja rsamal rwiꞌ jariꞌ caniꞌ jun adorno rwekben riꞌ. Como arjaꞌ yatajnak tre chi nimak ja rsamal rwiꞌ ocnak botzbal rwiꞌ.

¹⁶ Ja cꞌa wi cꞌo jun chewe ja ma conforme ta ruqꞌuin ja cꞌa xinbij kaj chewe riꞌ, wi solo nuchꞌaꞌ, tirotakij cꞌa chi ja wachbil xa junan nkachꞌob cuqꞌuin trewaꞌ wariꞌ in queriꞌ nkachꞌob cuqꞌuin ja juleꞌ chic iglesia chakajaꞌ xa bar ta triꞌ nquemol wiꞌ quiꞌ pa rubiꞌ ja Dios.

* * * * * * * * * *

¹⁷ Pro anin maquinquicot chewij ja xtinbij chic chewe riꞌ wachꞌalal como ja tok nemol ewiꞌ mta qꞌuiyem rcꞌamonto tre ja yukulbal ecꞌuꞌx ruqꞌuin ja Jesucristo pro ja moloj riꞌil neban, na xa más na lawuloꞌ nixel rmal.

¹⁸ Como ecꞌoli nebin chwe chi ma jun ta neban ja tok nemol ewiꞌ chi rnataxic ja Jesucristo, jariꞌ xa división ja nixtajini neban. Jariꞌ ja nchꞌaꞌ chewe nabey. Anin matinnimaj nojel ja rewil nbixi pro can nnimaj ja bin chwe chi ma jun ta ebanon.

¹⁹ Nnimaj como cꞌo jeꞌe división nbantaj na checojol utzcꞌa chi nixcꞌambajaxi utzcꞌa chi bien nkꞌalajin na echinatak chewe ja kas katzij chi ncajoꞌ ja Dios.

²⁰ Ja cꞌa tok nixekaj chipan ja lugar ja bar nemol wiꞌ ewiꞌ chi rbanic ja cena rxin ja kajaw Jesucristo ¿la katzij cꞌa chi rxin arjaꞌ ja cena neban nechꞌob ixix? Jariꞌ ma rxin ta ja neban.

²¹ Queriꞌ nbij chewe como ja tok nerilaꞌ ja hora xin waꞌim nemajlaꞌ rtijic eyon ja rewxin chejujunal, matewaybej na ewiꞌ in tok nqꞌuiswani ecꞌoli tak mebaꞌiꞌ chewe mta quixin neyaꞌ, ni nkꞌakꞌan wiꞌ quepan in ecꞌoli chewe xa nekꞌabari.

²² Ja cꞌa wi xa queriꞌ neban ¿nak tre tok ma pa tak ewochoch ta nixwaꞌ wiꞌ? ¿La mta laꞌan ewochoch chewiꞌ? Owi maxla xa itzel chic neꞌetzꞌat ja kachꞌalal ja re tinamit xin Dios tok neban queriꞌ, maxla xa egana neban chique ja tak mebaꞌiꞌ caniꞌ ma ecꞌo ta. Ja camic ¿nak nbij chewe nechꞌob ixix, la ninquicot chewij ja neban queriꞌ? Jariꞌ ma can ta.

²³ Queriꞌ nbij chewe wachꞌalal como ma queriꞌ ta neban tre ja caniꞌ xincꞌut chewach. Como ja kꞌalasax chinwach anin rmal ja kajaw Jesús jariꞌ ja xincꞌut chic chewach ixix in quewaꞌ rbanic riꞌ. Ja kajaw Jesús jariꞌ akꞌaꞌ tok xajalal majaꞌn tijach pa quekꞌaꞌ ja winak ja xetzelan rxin, arjaꞌ xucꞌam ja caxlanway in xmaltioxij tre ja Dios.

²⁴ Cꞌacꞌariꞌ xuwechꞌ ja caxlanway in quewaꞌ xbij chique ja rapóstol riꞌ: —Jawaꞌ caxlanway ja xinwechꞌ riꞌ jawaꞌ ncuerpo anin como ja xtiban tre ja ncuerpo caniꞌ nwechꞌi, nincamsax na pan ecuenta. Camic tecꞌamaꞌ in tetijaꞌ in nijawawaꞌ xtenatbej wxin, neꞌe.

²⁵ Queriꞌ xuban chic tre ja jun vaso vino chakajaꞌ, ja tok colbetaji waꞌim rmal xucꞌam in quewaꞌ xbij chic chique riꞌ: —Ja vino ja cꞌo chipan ja vaso riꞌ jawaꞌ nquiqꞌuel ocnak rseguro ja cꞌacꞌa chominem ja rchomin ja Dios. Ja tok xtetij xa nak ta chi tiempoꞌal xtetij wiꞌ jeꞌe nijawawaꞌ xtenatbej wxin chakajaꞌ, neꞌe.

²⁶ Queriꞌ cꞌa ja kas mero rbanic, jawaꞌ caxlanway riꞌ rachbil ja riyaꞌl uva tok xtetij xa nak ta chi tiempoꞌal xtetij wiꞌ jeꞌe jariꞌ caniꞌ neyaꞌ rbixic ja rcamic ja kajaw Jesucristo in cꞌa tokoriꞌ netanbaꞌ rtijic ja tok xtipi chic jutij.

²⁷ Rmalcꞌariꞌ nbij chewe, xa nak ta xtitijowi ja caxlanway, xa nak ta xtitijowi ja vino ja nkanatbej rcamic ja kajaw Jesucristo in wi xa ma chꞌobol ta nuban tre rtijic jariꞌ xajan ja nuban, xa itzel nuban tre rcuerpo ja kajaw Jesucristo rachbil rquiqꞌuel.

²⁸ Pro mejor ja neban, tecꞌambajaj kaj ja rewanma eyon janiꞌ ebanon chejujunal, cꞌa tokocꞌariꞌ utz netij ja caxlanway rachbil ja vino.

²⁹ Queriꞌ nbij chewe como xa nak ta xtitijowi jawaꞌ caxlanway riꞌ rachbil ja vino in wi xa ma chꞌobol ta nuban tre rtijic jariꞌ xa castigo xin Dios nsiqꞌuij trij, xa matichꞌobtaj rmal nak ja kas mero rbanic ja cuerpo rxin ja kajaw Jesucristo.

³⁰ Como xa ma chꞌobol ta neban tre rtijic ja cena rxin ja kajaw Jesucristo xa chewiꞌ tok e qꞌuiy chewe ja ma kas ta cꞌo quichokꞌakꞌ, xa e yawaꞌiꞌ in xa chewiꞌ chakajaꞌ tok e qꞌuiy chewe ja xecami.

³¹ Pro ja cꞌa wi ajoj mismo nkacꞌambajaj kaj ja kanma kayon in wi nkachomij ja ma utz ta kabanon jariꞌ mta ja castigo xin Dios xtipi ta chakij.

³² Pro ja tok cꞌoli ja castigo xin Dios npi chakij jariꞌ katijoxic nbani utzcꞌa chi makotakel chijutij chipan ja nimlaj rpokonal ja bar xquetakel wiꞌ ja winak ja xa ruqꞌuin rwachꞌulew yukul wiꞌ quecꞌuꞌx.

³³ Queriꞌ cꞌa rbanic wachꞌalal in rmalariꞌ tok nbij chewe, ja tok nemol ewiꞌ chi rbanic ja waꞌim tewaybej na ewiꞌ, junan ta nixoqui pa waꞌim.

³⁴ Ja cꞌa wi cꞌo jun chewe congana nkꞌakꞌan rupan in matucochꞌ mejor tiwaꞌel pa rochoch. Quirtariꞌ neban jutzꞌit utzcꞌa chi mta castigo xin Dios nesiqꞌuij chewij ja tok nemol ewiꞌ. Ja cꞌa tre ja juleꞌ chic razón ja xecꞌwaxaj chwe cꞌa tokoriꞌ xtinchomij ja tok xquinekaj ewqꞌuin.