1 Corintios 1 - Tz'utujil (Ja Cꞌacꞌa Chominem)

¹ Anin ja rin Pablo in apóstol rxin ja Jesucristo jariꞌ samaj Dios yoyon chwe. Anin wachbil ja kachꞌalal Sóstenes nkatzꞌibaj jawaꞌ carta riꞌ

² in nkatakel ewqꞌuin wachꞌalal ja rix iglesia ja rixcꞌo chipan ja tinamit Corinto. Ja Dios arjaꞌ ixrpartiꞌin chi neban ja rsamaj pro xa rmal ja xa jun ebanon ruqꞌuin ja Cristo Jesús ja tok rbanon queriꞌ chewe. Arjaꞌ ixrchaꞌon chi ixocnak ix tinamit rxin in ma eyon ta ixix ja rbanon queriꞌ chewe, queriꞌ rbanon chique chakajaꞌ canojel ja winak ja nquinataj rubiꞌ ja kajaw Jesucristo xa nak ta chi tinamital ecꞌo wiꞌ. Ja Jesucristo arjaꞌ cajaw ejeꞌeꞌ in kajaw ajoj chakajaꞌ.

³ Ja rutzil ja nsipaj ja Dios chake rachbil ja quicotemal xin Dios ja tariꞌ xtecochij más tre ja katataꞌ Dios in tre ja kajaw Jesucristo.

* * * * * * * * * *

⁴ Anin ni nmaltioxij wiꞌ tre ja katataꞌ Dios rmal ja rutzil ja recochin tre jariꞌ yatajnak chewe pro xa rmal ja xa jun ebanon ruqꞌuin ja Cristo Jesús tok yatajnak chewe.

⁵ Caniꞌ tre ja rtzobal Dios janila yatajnak chewe chi neyaꞌ rbixic in janila chꞌobtajnak emwal chakajaꞌ jariꞌ caniꞌ jun nimlaj mebaꞌil yatajnak chewe pro xa rmal ja xa jun ebanon ruqꞌuin ja Jesucristo tok yatajnak chewe.

⁶ Ja Dios arjaꞌ samajnak pa tak ecꞌaslemal jariꞌ xyabej eseguro chi ni katzij wiꞌ nojel ja kabij ajoj chewe tre nak rbanic ja Cristo.

⁷ Queriꞌ ebanon, mta falta chewe tre ja nkacochij jeꞌe tre ja rEspíritu Santo in kas nixquicoti chi raybexic ja kajaw Jesucristo ja tok xtipi chic jutij.

⁸ Ja Dios arjaꞌ ni mta wiꞌ ja maquita xtiqꞌuejeꞌ ewqꞌuin maquita xtuyaꞌ chewe chi cow nixpeꞌi. Queriꞌ nuban chewe utzcꞌa chi majun nak ta xquixchapbexi ja tok xtipi chic jutij ja kajaw Jesucristo.

⁹ Como ja Dios arjaꞌ ni mta wiꞌ ja maquita xtuban cumplir ja rtzujun chewe, arjaꞌ xixsiqꞌuini in xbij chewe chi ix rachbil chic ja Ralcꞌwal jariꞌ ja kajaw Jesucristo.

* * * * * * * * * *

¹⁰ Pro camic wachꞌalal anin congana nban recomendar chewe chi xta jun neban. Pa rubiꞌ ja kajaw Jesucristo nbij chewe ewanojelal chi xta jun neban, maxta caꞌiꞌ oxiꞌ grupo teban. Pro ja kas nwajoꞌ chewe chi xta jun nechꞌob in xta jun nel wiꞌ ja nechomij jeꞌe.

¹¹ Queriꞌ nbij chewe wachꞌalal como anin xurkaj rbixic wqꞌuin chi cꞌo chꞌaꞌoj neban chibil tak ewiꞌ. Ja recꞌo pa rochoch ja kachꞌalal Cloé ejeꞌeꞌ xeꞌurbin chwe.

¹² Bix chwe chi xa división neban como jun nbij: —Anin in xin Pablo, neꞌe, in jun chic nbij: —Mni, anin in xin Apolos, neꞌe, in npi chic jun nbij: —Mni, anin in xin Cefas, neꞌe, in npi chic jun nbij: —Mni, anin in xin Cristo, neꞌe.

¹³ Queriꞌ takaꞌan ja rbixic xurkaj wqꞌuin pro ¿la e oxiꞌ quijiꞌ laꞌan ja Cristo nechꞌob ixix? ¿La anin on xinri̱p chwach cruz pan ecuenta chewiꞌ? ¿La pa nubiꞌ laꞌan anin ixbanon bautizar chewiꞌ? Jariꞌ ma queriꞌ ta wachꞌalal.

¹⁴ Maltiox chi Dios chi ma anin ta xinbano bautizar ewxin, xa e caꞌiꞌ chewe ja xenuban bautizar, jun, ja kachꞌalal Crispo in jun chic ja kachꞌalal Gayo.

¹⁵ Maltiox chi Dios ja ma xixnuban ta bautizar como anin ni majun ngana cꞌo ta jun xtibin ta chwe chi pa nubiꞌ anin ja tok xixban bautizar.

¹⁶ In chakajaꞌ xenuban bautizar ja recꞌo pa rochoch ja kachꞌalal Estéfanas xarwariꞌ maturkaj chwe ja wi cꞌa ecꞌo na más chewe ja xenuban bautizar.

¹⁷ Maltiox chi Dios como ja Cristo arjaꞌ xinrutakel cuqꞌuin winak pro ma rmal ta chi nenuban bautizar pro jariꞌ xinrutakel cuqꞌuin utzcꞌa chi nenyaꞌaꞌ rbixic chique ja utzlaj tzij xin Jesucristo ja nucꞌut chikawach nak rbanic ja totajem xin Dios. In chakajaꞌ ma nimak tak tzij ta ncojon ta chi rbixic ja utzlaj tzij. Ja wixta xa juleꞌ nimak tak tzij ncoj chi rbixic maquita nchꞌobtaj ariꞌ cumal ja winak ja nbij chique, maquita nchꞌobtaj ariꞌ cumal chi ja rcamic ja Cristo chwach cruz congana jun nimlaj poder rcꞌamonto chake ja rok winak.

* * * * * * * * * *

¹⁸ Ecꞌo cꞌa winak masqui bien nkachꞌob chiquewach nak rbanic ja rcamic ja Cristo chwach cruz pro ejeꞌeꞌ xa pa tzꞌanem nquecoj wiꞌ. Ejeꞌeꞌ riꞌ winak ja cucꞌan ja bey ja xa nerucꞌamel chipan ja nimlaj rpokonal. Pro ja chake ajoj ja kucꞌan ja bey ja nokrucꞌamel chipan ja totajem xin Dios bien chꞌobtajnak kumal chi ja rcamic ja Cristo chwach cruz jariꞌ cꞌamyonto ja nimlaj poder xin Dios chi katoꞌic.

¹⁹ Caniꞌ tzꞌibtal can chipan ja rtzobal Dios quewaꞌ nbij ja Dios riꞌ: —Ja winak ja congana cotak, anin can nsach na ja nimak tak naꞌoj ja nquiyabej quekꞌij in nyoj na quinaꞌoj chakajaꞌ ja congana jakal quewiꞌ. Queriꞌ ja tzꞌibtal can.

²⁰ Camic ¿bar cꞌa ecꞌo wariꞌ ja winak ja congana cotak? ¿Bar cꞌa ecꞌo wariꞌ ja maestro ja congana kajnak pa quewiꞌ ja ley xin Dios? ¿Bar cꞌa ecꞌo wariꞌ ja chꞌaꞌonelaꞌ ja re rxin awaꞌ tiempo riꞌ? Jariꞌ ni ma ecꞌo ta chwach ja Dios. Pro ja rbanon ja Dios arjaꞌ xa pa tzꞌanem xucoj wiꞌ ja nimak tak naꞌoj quixin winak ja xa xin rwachꞌulew.

²¹ Queriꞌ xuban ja Dios, congana xucoj ja rnaꞌoj como arjaꞌ ni rchominto wiꞌ chi mta moda xtawotakij ta nak rbanic ja Dios ja xta anaꞌoj atat ayon xtacoj chi rotakixic. Rmalcꞌariꞌ tok xuyaꞌ ajoj chake chi nkayaꞌ rbixic ja Jesucristo chique ja winak in tok nkayaꞌ rbixic chique jariꞌ nertobej ja nyukeꞌ quecꞌuꞌx ruqꞌuin pro ja cꞌa winak ja matiyukeꞌ quecꞌuꞌx ruqꞌuin ejeꞌeꞌ xa pa tzꞌanem nquecoj wiꞌ.

²² Como ja raj Israel ja tok nayaꞌ rbixic ja Jesucristo chique, ejeꞌeꞌ ni nquicꞌutuj wiꞌ jun milagro chawe ja nacꞌutbej chiquewach ja wi katzij ja nabij chique. In chakajaꞌ ja raj Grecia xa jaꞌ nqueyaꞌ quixquin tre ja nimak tak naꞌoj quixin winak ja xa xin rwachꞌulew.

²³ Pro ja cꞌa rajoj nkayaꞌ rbixic ja Cristo pro jun Cristo ja camsax chwach cruz. Pro ja tok nkabij chi camsax chwach cruz ja Cristo jariꞌ xa ofensa rcꞌamonto chique ja raj Israel in chakajaꞌ ja ma e aj Israel ta xa pa tzꞌanem nquecoj wiꞌ.

²⁴ Pro ja chake ajoj ja rokchaꞌon rmal ja Dios wi ok aj Israel owi ma ok aj Israel ta bien kotak chi ja Cristo ja camsax chwach cruz ruqꞌuin arjaꞌ nkawil wiꞌ ja poder xin Dios in ruqꞌuin arjaꞌ nkawil wiꞌ chakajaꞌ ja naꞌoj xin Dios.

²⁵ Queriꞌ nbij chewe como ja tok nkayaꞌ rbixic ja Cristo chi camsax chwach cruz masqui xa pa tzꞌanem nco̱j wiꞌ cumal ja winak pro ja rcamic chwach cruz jariꞌ nucoj ja Dios ja nokrtobej chipan ja kil kamac. Pro ja quinaꞌoj winak jariꞌ ni maticowin wiꞌ xkorutoꞌ ta chipan ja kil kamac. Ja rcamic ja Cristo chwach cruz masqui nbix tre chi mta poder rcꞌamonto pro majun winak xtikꞌiꞌo ta ja rpoder.

²⁶ Queriꞌ nbij chewe wachꞌalal como bien turkaj chewe chi ixix xewil ja totajem xin Dios masqui xa ix tak sencillo. Xa ma e jaruꞌ ta chewe ja kas ta e preparado netzꞌa̱t cumal winak in xa ma e jaruꞌ ta chewe chakajaꞌ ja kas ta nimak quekꞌij in chakajaꞌ xa ma e jaruꞌ ta chewe ja re calcꞌwal nimak tak winak.

²⁷ Pro quewaꞌ xuban ja Dios riꞌ, ja winak ja nbix chique chi xa e nacnak tak winak waweꞌ chwachꞌulew ejeꞌeꞌ riꞌ ja xeruchaꞌ chi xeꞌoc rtinamit. Queriꞌ xuban jariꞌ xyabej queqꞌuix ja winak ja congana cotak. Arjaꞌ xeruchaꞌ ja ma nimak ta quekꞌij rxin ja rwachꞌulew jariꞌ xyabej queqꞌuix ja congana nimak quekꞌij.

²⁸ Arjaꞌ xeruchaꞌ ja winak ja ma e calcꞌwal ta nimak tak winak, juleꞌ winak ja ni ma e vale ta chiquewach cach tak winak, banon na chique ni ma ecꞌo ta. Queriꞌ xuban ja Dios jariꞌ xerkajsbej ja winak ja congana nimak quekꞌij, xuban chique ni ma ecꞌo ta.

²⁹ Queriꞌ xuban chique utzcꞌa chi majun winak cꞌo ta nak ta ja xtiyabej kaj ta rukꞌij ruyon chwach ja Dios.

³⁰ Dios cꞌa yoyon chewe nojelal. Arjaꞌ yoyon chewe jun cꞌacꞌa cꞌaslemal pro xa rmal ja Cristo Jesús chewiꞌ tok ryaꞌon chewe. Arjaꞌ takoto rxin ja Cristo chi katoꞌic in xa rmal ja Cristo ja tok yatajnak chake ja naꞌoj xin Dios in xa rmal ja Cristo chakajaꞌ tok Dios nokrucꞌul in nuban chake caniꞌ mta kil kamac in xa rmal ja Cristo chakajaꞌ tok kꞌij kꞌij noc más chꞌajchꞌoj ja kanma in xa rmal ja Cristo chakajaꞌ tok ma ok preso chi ta pa rukꞌaꞌ ja il mac in noketotaj na chijutij.

³¹ Como Dios yoyon chake nojelal chewiꞌ tok nbij chewe, maxta cꞌo jun tuyaꞌ kaj rukꞌij ruyon, mejor rukꞌij ja kajaw Dios tiyaꞌaꞌ como queriꞌ tzꞌibtal can chipan ja rtzobal Dios.