Zacarías 5 - Bible in Tzeltal Bachajón

Balbil hun te wihl bahel

¹ Yan buelta la jquil mohel, la jquil balbil hun te yac ta wihlele.

² La sjoc'obon te ch'ul a'bat: ¿Bin yac awil? xchi. La jac'be: Ya quil balbil hun te yac ta wihlel, te ha jtahb xuhc'ubil snahtil soc lajuneb xuhc'ubil sjamalil, xchihon.

³ Hich la yalbon: Ha te schopol c'oblalil te ya xloc' bahel ta sba spisil te q'uinal; como spisil mach'atic ya x'elc'ajic ya me yich'ic jinel, hich te bin ut'il ya yal ta jehch te balbil hun, soc spisil mach'atic ay bin ya yalic ta jamal ta lot ya me yich'ic jinel, hich te bin ut'il ya yal ta yan jehch te balbil hune.

⁴ Ha la jticon bahel, xchi te Jehová te scuentahinej spisil, ha ya x'och ta sna te j'elec' soc ta sna te mach'a ay bin ya yal ta jamal ta lot ta scuenta jbihil; tey ya x'ayin ta sna soc pajal ya slajin soc te sts'amte'el soc te tonetic yu'une, xchi.

Te ants ay ta moch

⁵ Loc' tal te ch'ul a'bat te yac sc'opombelon, hich la yalbon: Hacha asit, ilawil te bin yac ta loq'uel tal, xchi.

⁶ La joc'obe: ¿Bin a ini? xchihon. Ha jun efa te ya xloc' talel, xchi. Soc la yal xan: Ha ini te schopolil spisil mach'atic ayic ta q'uinal, xchi.

⁷ La sjambeyic te smahquil sti'il pasbil ta plomo, tey hucul a jtuhl ants ta yutil te efa.

⁸ Hich la yal te ch'ul a'bat: Ha ini te bin chopole, xchi. La sten xan cohel ta efa soc la smacbe sti'il te pasbil ta plomo.

⁹ La jquil mohel, la jquil cheb antsetic, lichbil tal ta ic' ta xiq'uic te hich yilelic te bin ut'il xic' sigüeña-mut, la sliquic mohel te efa ta ohlil yu'un ch'ulchan bahlumilal.

¹⁰ Hich la joc'obe te ch'ul a'bat te yac sc'opombelon: ¿Banti ya yich'ic bahel te efa? xchihon.

¹¹ La sjac'bon: Ya xbaht spasbeyic sna ta sq'uinal Sinar. C'alal chapalix a, ya yaq'uic hilel te efa ta scajtajib, xchi.