Zacarías 3 - Bible in Tzeltal Bachajón

Nahalsitil sc'oblal muc'ul sacerdote Josué

¹ Patil la ya'bon quil te muc'ul sacerdote Josué teq'uel ta stojol te ch'ul a'bat yu'un Jehová, soc te Satanás teq'uel ta swa'el-c'ab yu'un ya slehbe smul.

² Te Jehová hich la yalbe te Satanás: ¡Jehová ya stijat ta c'op, Satanás! ¡Te Jehová te stsahoj Jerusalén, ya stijat ta c'op! Te winic ini ¿ma bal ha'uc jun xutumte' yac ta tihlel te la yich' loq'uesel ta c'ahc'? xchi.

³ Te Josué teq'uel ta stojol te ch'ul a'bat yu'un Jehová, slapoj c'u'ul te bayel yabacul.

⁴ Te ch'ul a'bat hich la yalbe ta mandar te mach'atic ayic ta stojol: Cholbeyahic loq'uel te sc'u' te ay yabacul, xchi. Soc hich la yalbe te Josué: Ilawil, la jloq'uesbat amul, ya ca'batix alap buen t'ujbil c'u'ul, xchi.

⁵ Patil hich la yal: A'beyahic spohtsil sjol te mayuc yabacul, xchi. Hich la ya'beyic spohtsil sjol te mayuc yabacul soc la ya'beyic slap buen t'ujbil c'u'ul; tey teq'uel a te ch'ul a'bat.

⁶ Te ch'ul a'bat yu'un Jehová la stsits te Josué, hich la yalbe:

⁷ Hich yaloj te Jehová te scuentahinej spisil: Teme yac at'umbon te behetic cu'un, soc teme yac ach'uhumbon spasel te halbil mandariletic cu'une, ya me acuentahimbon te jna soc ya me acanantaybon te amaq'uetic cu'un, soc ya ca'bat awawil ta yohlil te mach'atic teq'uelic li'i.

⁸ Muc'ul sacerdote Josué, ha'at soc te amohloltac te ya xhuhcajic ta atojol, te ha señahex yu'un te bin ya xc'oht ta pasel ta patil, a'iya me awa'iy: Ya quic' tal te ca'bat, ha te Spuhl.

⁹ Ilawil te ton te la jcac' ta stojol Josué, junax ay soc ay huqueb sit. Ho'on nix ay bin ya jts'ihbay ochel tey a, xchi te Jehová te scuentahinej spisil, soc ta junax c'ahc'al ya jloq'uesbe smul te q'uinal ini.

¹⁰ Ta hich ora, xchi te Jehová te scuentahinej spisil, talel c'axel yac awic' abahic ta huclej ta ye'tal ats'usubilic soc ta ye'tal higuerahetic awu'unic, xchi.