Sofonías 3 - Bible in Tzeltal Bachajón

Smul Jerusalén soc te colel yu'une

¹ ¡Obol sba te toyba pueblo, te bohloben sc'oblal soc te ha j'uts'inwanej!

² Ma ba la ya'iy c'op soc ma ba la yich' tojobtesel; ma ba la smuc'ulin yo'tan te Jehová, ma ba nohpoj ta stojol te Dios yu'une.

³ Te príncipaletic te ayic ta yohlil ha xhihet chojetic; te jchahpanwanejetic yu'unic ha ha'mal ts'i'etic te ya xbehenic ta ahc'abal te ma ba ya yihquitayic hilel jch'ixuc bac yu'un sacubel q'uinal.

⁴ Te jalwanejetic yu'un xyal xmo yo'tanic, ha winiquetic te ya x'ac'awanic ta c'abal; te sacerdotehetic yu'un la sbohlobtesic te ch'ul awilal, soc la sjimbe sc'oblal te Ley.

⁵ Ha toj stuquel te Jehová te ay ta yohlil, mayuc bin chopol ya spas; ta jujun sab ya yac' chicnajuc te stojil ya'tel, ma ba ya spas falta; yan te mach'a chopol, ma sna'be sba te q'uexlale.

⁶ La jcac' jihnuc nacionetic, jimbilic te toyol bahlal ts'ahquetic yu'unique; jochol hil cu'un te callehetic yu'unic, mayuquix mach'atic ya xc'axic tey a, jimbiliquix te pueblohetic yu'unic, mayuquix jtuhluc te ya xnahin tey a.

⁷ Hich la jcal: Ya me xi'on, ya me yich' tojobtesel, xchihon, hich ma ba ya yich' jinel te banti nahinem te bin ora ya xtalon ta stojol. Pero la suj sbahic ta sjinel spisil te ya'telique.

⁸ Ha yu'un mahliyawonic, xchi te Jehová, te bin c'ahc'alil ya xhahch jchahpanex, como jnopoj te ya jtsob te nacionetic, te ya jtsobticlan ban c'alal cuentahimbilic yu'un ya jmal cohel ta stojolic te quilimba, spisil te sc'ahc'al te quilimbahe; te sc'ahc'al te xut'et co'tan ya slajin spisil te q'uinale.

⁹ Ta hich ora ya cac' te ya xlecub te sc'op te pueblohetic, scuenta yu'un spisilic ya sc'opombeyic te sbihil te Jehová, yu'un pajal ya yac' sbahic ta a'batinel ta stojol.

¹⁰ Ta q'uinal ta jehch muc'ul-ha'etic yu'un Etiopía, te mach'atic ya yalbonic wocol, te mach'atic cu'un te puhquemic bahel, ya me yich'bonic tal te mahtaniletic cu'une.

¹¹ Ta hich ora ma ba ya xq'uexawatix yu'un jchahpuc te a'teliletic te la atoy aba ta jtojol yu'une, como ya jloq'ues ta awohlil te mach'atic tse'el yo'tanic yu'un te stoybahilic, mayuquix bin ora yac atoy aba ta ch'ul wits cu'un.

¹² Ya quihquitaybat hilel ta awohlil jun pueblo te peq'uel yo'tan soc pobre, te ya smuc'ulin yo'tan te sbihil Jehová.

¹³ Te mach'atic cuxul hilic yu'un Israel ma ba ya spasic te bin ma stojiluc ta pasel soc ma ba ya ya'iyic lot, ma ba ya xloc' ta yehic lo'loywanej, como ya xwe'ic soc ya scux yo'tanic, mayuc mach'a ya x'a'bot xiwel yu'un.

¹⁴ ¡C'ayojinan, yantsil-nich'anat Sión! ¡awonan yu'un yutsil q'uinal, Israel! ¡Tse'eluc awo'tan, spisil awo'tan ayuc yutsil q'uinal yac awa'iy, yantsil-nich'anat Jerusalén!

¹⁵ Te Jehová la sloq'ues te castigo awu'un, la sten loq'uel te acontratac. Te Jehová, te Ajwalil yu'un Israel, ay ta awohlil; ma ba yac axi'ix te bin wocol.

¹⁶ Ta hich ora hich ya xhalbot te Jerusalén: ¡Ma xiwat, Sión, ma me xlaj yip ac'ab! xchi.

¹⁷ Te Jehová te Dios awu'un, ay ta awohlil; ¡ay yu'el, ya scoltayat! Bayel yutsil yo'tan ta atojol; ta scuenta sc'uxul yo'tan ya yach'ubtesbat acuxlejal, soc stse'elil yo'tan ya xc'ayojin ta atojol.

¹⁸ Hich te bin ut'il ta sc'ahc'alel q'uin ya jloq'uesbat ta atojol te mel-o'tan; ya cac'at ta libre yu'un te uts'inel te al ta cuchel yac awa'iy.

¹⁹ Ta hich ora ya ca'be stoj spisil te mach'atic ya stenat ta uts'inel; ya jcoltay te coxo' tuminchij, soc ya quic' tal te howiyemic. Ya jc'atp'un ta halbeyel yutsil sc'oblal te q'uexlal yu'unic, soc ya xpuhc sc'oblalic ta spisil q'uinal.

²⁰ Ta hich ora ya quiq'uex talel, ya jtsobex tal ta hich ora; ya cac' te ya xpuhc ac'oblalic soc ya x'ich'otex ta muc' ta stojol spisil te pueblohetic ta bahlumilal, te c'alal ya jcha'a'beyex ac'ulejalic ta atojol te yac awilique, xchi te Jehová.