Salmos 97 - Bible in Tzeltal Bachajón

Ha muc'ul ajwalil soc ay yu'el te Jehová

¹ ¡Ha ajwalil te Jehová! ¡Tse'eluc me yo'tan te lumq'uinal! ¡Ayuc me yutsil yo'tanic te ti'ti' mar!

² Ha joytaybil yu'un tocaletic soc yihc'al q'uinal; te bin toj ta pasel soc te stojil chahpanel ha yich'o-ip te smuc'ul-huctajibe.

³ Ya xnahilij bahel c'ahc' ta stojol te ya schic' te scontratac te ayic ta sjoyobal.

⁴ Te tsantsehwaletic yu'un ya sacubtes te bahlumilal; te bahlumilal ya yil soc ya xnihc yu'un.

⁵ Te witsiltic hich ya x'uhlic te bin ut'il chabec' ta stojol Jehová, ta stojol te Ajwalil yu'un swohlol bahlumilal.

⁶ Te ch'ulchan ya yalbe sc'oblal te bin toj ya spas, spisil te pueblohetic ya yilbeyic te yutsilale.

⁷ Ya xq'uexawic spisil mach'atic ya sch'uhuntayic loc'ombahetic, ha te mach'atic stoyoj sbahic yu'un te loc'ombahetique. Spisil te diosetic ya squejan sbahic ta stojol.

⁸ La ya'iy te Sión, tse'el yo'tan yu'un, soc te yantsil-nich'nab Judá tse'el yo'tanic yu'un te chahpanel awu'un, Jehová.

⁹ Como ha'at, Jehová, ha te Diosat te mero toyol ta stojol spisil te bahlumilal; c'ax hich ich'bilat ta muc' a te bin ut'il te yantic diosetique.

¹⁰ Ha'ex te c'ux ta awo'tanic te Jehová, ihlayahic te bin chopol; ha ya scanantaybe scuxlejalic te mach'atic yu'un te ch'uhltesbilic; ha ya yac' ta libre ta sc'ab te mach'atic chopolique.

¹¹ Ya xtihl sacal q'uinal ta stojol te mach'a toj yo'tan, soc ay tse'el-o'tanil ta stojol te mach'atic lec yo'tanic.

¹² ¡Tse'eluc me awo'tanic ta scuenta Jehová, ha'ex te toj awo'tanic, halbeyahic yutsil sc'oblal te sch'ul bihile!