Salmos 96 - Bible in Tzeltal Bachajón

C'ayoj yu'un yalbeyel yutsil sc'oblal Jehová

¹ C'ayojtaybeyahic yach'il c'ayoj te Jehová; c'ayojtayahic Jehová, swohlol bahlumilal.

² C'ayojtayahic Jehová, halbeyahic lec sc'oblal te sbihile; jujun c'ahc'al puca ta halel te colel yu'une.

³ Halbeyahic sc'oblal yutsilal ta stojol te nacionetic, ta stojol te pueblohetic hableya sc'oblal spisil ta chahp a'teliletic yu'un,

⁴ como muc' te Jehová soc ha nix yu'un te halbeyel yutsil sc'oblale; c'ax hich ay ta xi'el a te bin ut'il spisil yantic diosetic.

⁵ Ha loc'ombahetic spisil te diosetic yu'un te pueblohetic, yan te Jehová ha la spas te ch'ulchane.

⁶ Te ts'anabul soc smuc'ul utsilal ayic ta stojol; ay yu'el soc t'ujbil yutsilal ta ch'ul awilal yu'un.

⁷ Halbeyahic yutsilal te Jehová, ha'ex chahpalchahpex ta nacionetic, halbeyahic sc'oblal yutsilal soc yu'el.

⁸ Halbeyahic yutsil sbihil te Jehová hich te bin ut'il ya sc'an pasele; ich'ahic tal mahtanil, ochanic tal ta amaq'uetic yu'un.

⁹ Ch'uhuntayahic te Jehová ta scuenta ch'ultesel te c'ax t'ujbil; xiwanic me ta stojol, swohlol bahlumilal.

¹⁰ Halahic ta yohlil te nacionetic: ¡Ha ajwalil te Jehová! xchihanic me. La ya'be yich' yip te bahlumilal, ma ba ya stij sba; ha ya schahpan ta stojil te pueblohetique.

¹¹ Tse'eluc me yo'tan te ch'ulchan soc ayuc me yutsil yo'tan te bahlumilal; ac'a awonuc te mar soc spisil bintic ay tey a.

¹² Tse'eluc me yo'tan te lumq'uinal soc spisil te bintic ay tey a; hich spisil te te'etic ta tohyem te'etic ya me xc'ayojinic soc yutsil yo'tanic

¹³ ta stojol Jehová, como ya xtal, ya xtal ta schahpanel te bahlumilale. Stojil me ya schahpan te bahlumilal soc te pueblohetic ta scuenta smelelil.