Salmos 92 - Bible in Tzeltal BachajónC'ayoj ta yalbeyel yutsilal Dios Salmo. Ha c'ayoj yu'un sc'ahc'alel cux-o'tan. 1 Lec te ya xhalbotat awutsilal, Jehová, te ya yich' c'ayojtayel abihil, Ha'at te mero toyol ayat; 2 lec te ta sab ya yich' halbeyel sc'oblal te sc'uxul awo'tan soc ta ahc'abal ya yich' halbeyel sc'oblal te stalel jun awo'tan, 3 ta scuenta sc'ayojil te decacordio soc te arpa, soc ta t'ujbil sc'op te lira. 4 Como la awa'bon tse'el co'tan ta scuenta te a'teliletic awu'un, Jehová; soc yutsil co'tan ya xc'ayojinon yu'un te ya'tel ac'ab. 5 ¡Mero muq'uic te a'teliletic awu'un, Jehová! ¡Mero c'ubul te bintic ay ta awo'tan! 6 Te mach'a ma sna' q'uinal ma sna'be scuentahil, te sonso ma xc'oht ta yo'tan ini: 7 ha te c'alal ya xch'ihyic te mach'atic chopolic hich te bin ut'il ha'mal, soc te ya xnichinic spisil mach'atic ya spasic bin chopol, ya me xlajic sbahtel q'uinal. 8 Yan te ha'at, Jehová, sbahtel q'uinal ayat ta mero toyol. 9 Li' ay te acontratac, Jehová, ya me xlajic te acontrataque; spisil te mach'atic chopol ya'telic ya me yich'ic puhquel bahel. 10 Pero ha'at hich yac atohytesbon quip te bin ut'il te yip ha'mal toro; ya quich' malel ta lequil aceite. 11 Ya me quil ta jsit te ya xyahlic te jcontratac; ya me ca'iy ta jchiquin sc'oblal te mach'atic chopolic te hahch scontrahinonique. 12 Te mach'a toj yo'tan hich me ya xnichinic te bin ut'il xahn, hich ya xmuc'ubic te bin ut'il cedro ta Líbano; 13 ts'umbilic ta sna Jehová, ya me xnichinic ta amaq'uetic yu'un te Sna te Dios cu'untique. 14 Ya to sitin aunque mamalix, ay me yipic soc stalel yaxic, 15 ya yalic: Ha toj yo'tan te Jehová, te muc'ul ton cu'un, mayuc bin ma stojiluc ya spas, xchihic. |
Biblia Tzeltal Bachajon © Sociedad Bíblica de México, A.C., 2006.
Bible Society of Mexico