Salmos 91 - Bible in Tzeltal Bachajón

Nahinel ta yaxinal te Mach'a spisil ya xhu' yu'un

¹ Te mach'a ya xnahin ta banti canantaybil yu'un te Mach'a toyol ay, ya me xnahin ta yaxinal te Mach'a spisil ya xhu' yu'une.

² Hich me ya calbe te Jehová: Ha'at ahnibalat cu'un soc toyol ts'ahcat cu'un, Diosat cu'un te smuc'ulinejat co'tan, xchi me ta stojol.

³ Ya me scoltayat loq'uel ta syac te jyaquiwej soc ta tulan chamel te ya xlajinwan.

⁴ Ya me sluts'at ta ye'tal sc'uc'umal, ta ye'tal xic' yac ata canantayel; te bin ut'il stalel jun yo'tan ha amahquil soc ats'ahcul.

⁵ Ma ba yac axi' te bintic ya xiwteswan ta ahc'abal, o te ya'tejibalul t'ihmalte' te ya xbehen ta c'ahc'alel,

⁶ o te tulan chamel te ya xbehen ta ahc'abal, o te bin ya xmilawan ta ohlil c'ahc'al.

⁷ Ya xlajic jmil ta jtuhl ta ats'ehl, lajunmil ta swa'el ac'ab, pero ma ba ya stahat te ha'ate.

⁸ Yac awil ta asit, yac awil ya x'a'bot stojic te mach'atic chopolic.

⁹ Te bin ut'il ha ahnibal c'oht awu'un te Jehová, te ha ana c'oht te Dios mero toyol ay,

¹⁰ hich mayuc bin chopol ya xtal ta atojol, ma x'och chamel ta ana,

¹¹ yu'un ya me yalbe mandar te ch'ul a'batetic yu'un te ya scanantayat bayuc ya xbahat.

¹² Ya me slat'at ta sc'abic scuenta yu'un ma ba yac alajin awoc ta ton.

¹³ Ya me ats'o ta teq'uel te choj soc te ti'awal chan; ya me ats'o' ta teq'uel te yal choj soc te muc'ul chane.

¹⁴ Ya yal te Diose: Te bin ut'il c'uxon ta yo'tan, ya me cac' ta libre; ya cac' ta toyol ta scaj te ya sna'bon te jbihile.

¹⁵ Ya sc'oponon, ya me jac'be sc'op; ya joquin c'alal ay ta wocol, ya cac' ta libre soc ya cac' ta ich'el ta muc'.

¹⁶ Ya ca'be smulan naht scuxlejal soc ya ca'be yil te colel cu'un, xchi te Jehová.