Salmos 90 - Bible in Tzeltal Bachajón

LIBRO 4 ( Salmos 90—106 ) Sbahtel q'uinal ay te Dios, c'axel nax ay te ants-winiquetic

Te bin la yal ta sc'oponel Dios te Moisés, te swinquilel Dios.

¹ Cajwal, ha'at ahnibalat cu'uncotic ta cajalcaj ts'umbalil.

² Te c'alal ma to ayuc a te witsiltic, te c'alal ma to ba pasbilic awu'un a te lumq'uinal soc te bahlumilal, stalel sbahtel q'uinal ha'at Diosat atuquel.

³ Yac awac' suhtuc ta ts'ubil lum te ants-winiquetic, hich yac awal: Sutp'ijanic ta ts'ubil lum, yal-snich'nabex ants-winiquetic, xchihat.

⁴ Como te jmil ha'bil hich c'ohem ta atojol te bin ut'il jun c'ahc'al te c'ax wojey, hich te bin ut'il cheb oxeb nax ora ta ahc'abal.

⁵ Yac ames bahel te ants-winiquetic hich te bin ut'il soc tulan yoc ha', hich ayic te bin ut'il wayichil. Hich te bin ut'il ha'mal te ya xcol ta sahb:

⁶ ta sab ya xcol soc ya snichin, ta tibiltic ya yich' bojel soc ya xtaquij.

⁷ Lajemotcotic yu'un te sc'ahc'al awo'tan, soc ya jxi'cotic te awilimba.

⁸ La awac' ta atojol te jmulcotic, te muquen jmulcotic la awac' ta sacal q'uinal te ay ta atojol.

⁹ Spisil sc'ahc'alel te jcuxlejalcotic ya xlajic bahel ta scaj awilimba; ya xlaj te ca'bilalcotic hich te bin ut'il jahc' nax ta o'tanil.

¹⁰ Lajuneb schanwinic (70) ha'bil te ca'bilalcotic; teme ay yip, ya sta chanwinic (80) ha'bil; pero ta spisil ha nax ay wocol soc a'tel, como ora ya xc'axic, hich ya xwihlotcotic bahel.

¹¹ ¿Mach'a ya sna'be sba te yip te awilimba? Hich smuc'ul awilimba te bin ut'il ya sc'an yac awich' xi'ele.

¹² Nohptesawotcotic ta yahtayel te jujun c'ahc'al ya xc'ax cu'uncotic, scuenta yu'un ya sta sp'ijil a te co'tancotic a.

¹³ ¡Suhtan tal, Cajwal! ¿Jayeb xan ora? ¡Na'beya yo'bolil sbahic te a'batetic awu'une!

¹⁴ Nojesawotcotic ta sc'uxul awo'tan ta sab, scuenta yu'un tse'el co'tancotic ya xc'ayojinotcotic te jayeb c'ahc'al cuxulotcotique.

¹⁵ Hich me xawa'botic stse'elil co'tantic te bin ut'il jayeb c'ahc'al la awa'botcotic jwocolcotic, te jayeb ha'bil la jquilcotic te bin chopole.

¹⁶ A'beya yilic awa'tel te a'batetic awu'un, te awutsilal ta stojol te snich'nabe.

¹⁷ Ac'a c'ohtuc ta jtojolcotic te yutsil yo'tan Jehová, te Dios cu'untique. Ac'a yich' yip te ya'tel te jc'abcotic; hich, ac'a yich' yip te ya'tel te jc'abcotique.