Salmos 9 - Bible in Tzeltal Bachajón

Yalbeyel wocol yu'un stojil ya'tel Dios

Yu'un jach-c'ayoj; ta scuenta Mut-labén. Ha salmo yu'un David.

¹ Jehová, ya calbat awutsilal ta spisil co'tan; ya jc'ayojtay spisil te yutsil awa'tele.

² Tse'el co'tan soc ay yutsil co'tan ta atojol; ya jc'ayojtaybat abihil, ha'at te Toyolate.

³ Te jcontratac suhtic bahel ta spatic; yahlic soc lajic ta atojol.

⁴ Ha'at toj bin la apasbon ta jtojol, huhcajat ta amuc'ul-huctajib ta chahpanwanej ta stojil.

⁵ Tulan la atsits te nacionetic, la ajin te mach'a chopole; ¡la atup'be sbihilic ta sbahtel q'uinal!

⁶ Jc'axel lajemic te jcontrahinwanejetic, jimbil hilic ta sbahtel q'uinal; soc te pueblohetic te la ajinticlan pajal ch'ay bahel te sna'ojibal yu'unique.

⁷ Pero te Jehová stalel sbahtel q'uinal; chapalix smuc'ul-huctajib yu'un chahpanwanej.

⁸ Ta stojil ya schahpan te bahlumilal, toj ya schahpan te pueblohetique.

⁹ Te Jehová ha ahnibal yu'un te pobre, ha ahnibal ta yorahil wocol.

¹⁰ Ha ya smuc'ulinat yo'tanic te mach'atic ya sna'bat abihil, como ha'at, Jehová, ma ba la awihquitay te mach'atic ya slehate.

¹¹ C'ayojtaya te Jehová te nahinem ta Sión; pucahic ta halel ta pueblohetic te a'teliletic yu'une.

¹² Te Mach'a ya sc'ambe stojol malbil ch'ich' ya sna'ticlan; ma ba ya xch'ay ta yo'tan te yaw te mach'atic pich'il yo'tanique.

¹³ C'uxultayawon, Jehová; ilbon te jwocol yu'un te mach'atic ya sp'ajonic, ha'at, te yac aloq'ueson ta puertahetic yu'un lajel

¹⁴ scuenta yu'un ya cal spisil te yutsil ac'oblal ta puertahetic yu'un Sión, soc te tse'el co'tan yu'un te colel awu'une.

¹⁵ Te nacionetic ch'ayic cohel ta ch'en te ha nix spasojic; te yaquil te snac'ojic, tsacbot yoquic yu'un.

¹⁶ Te Jehová la yac' sba ta na'el ta scuenta te stojil chahpanwanej te la spas; te mach'a chopol ha nix chucot yu'un te ya'tel sc'ab. Higaión. Selah

¹⁷ Te mach'atic chopolic ya x'ic'otic bahel ta muquenal, spisil te nacionetic te ya sch'ay ta yo'tanic te Diose.

¹⁸ Ma spisiluc ora ya xch'ayot ta o'tanil te mach'a mayuc bin ay yu'un, soc ma jc'axeluc ya sch'ay te bin yacalic ta smahliyel te pobrehetique.

¹⁹ Hahchan, Jehová, ma me xawac' te ya ya'iy tsalaw te ants-winic; ac'a yich'ic chahpanel te nacionetic ta atojol.

²⁰ Jehová, a'beya xiwel ta yo'tanic; a'beya sna'ic te nacionetic te ch'ich'-baq'uet nax ayic. Selah