Salmos 89 - Bible in Tzeltal Bachajón

Dios la schap sc'op soc David

Ha masquil yu'un Etán te ezra-winic.

¹ Spisil ora ya me jc'ayojtaybe sc'uxul yo'tan te Jehová; ta cajalcaj ts'umbalil ya calbe sc'oblal te stalel jun awo'tan.

² Como la jcal: Stalel yich'oj yip te sc'uxul awo'tan; tey nix ta ch'ulchan yac awa'be yich' yip te stalel jun awo'tan, xchihon.

³ La awal: La jchahp c'op soc mach'a tsahbil cu'un, hich jamal la jcalbe te David te a'bat cu'un:

⁴ Ya cac' te ay ats'umbal spisil ora soc ya ca'be yip te ahuctajib ta cajalcaj ts'umbalil, xchihat. Selah

⁵ Te ch'ulchan ya yalbe yutsil sc'oblal te jchahp a'tel awu'un, Jehová cu'un, ta tsoblej yu'un te mach'atic ch'uhltesbilic ya yalbeyic sc'oblal te stalel jun awo'tane.

⁶ Como ¿mach'a ay ta ch'ulchan te pajal soc Jehová? ¿Mach'a a te pajal soc Jehová ta yohlil te mach'atic ay yipic?

⁷ Ay ta xi'el te Dios ta muc'ul tsoblej yu'un mach'atic ch'uhltesbilic; c'ax hich smuc'ul yu'el a te bin ut'il spisil te mach'atic ayic ta sjoyobal.

⁸ Jehová, Diosat te acuentahinej spisil, ¿mach'a c'an spajat? Ay awu'el, Jehová, soc sjoytayejat te stalel jun awo'tan.

⁹ Ha'at yac acuentahin te yip te mar; c'alal ya xhahch ta bahq'uel, yac alahmajtes.

¹⁰ La anet' te Rahab hich te bin ut'il mach'a lajem; la apucticlan bahel te acontratac ta scuenta yip ac'ab.

¹¹ Ha'at awu'un te ch'ulchan soc ha nix hich te bahlumilal; ha'at la apas te bahlumilal soc spisil bintic ay tey a.

¹² Ha'at la apas te norte soc te sur; te Tabor soc te Hermón tse'el yo'tanic ya sc'ayojtaybat abihil.

¹³ Ay yu'el te ac'ab; ay yip te ac'ab, toyol sc'oblal te awa'el-c'ab.

¹⁴ Ha yich'o-ip te amuc'ul-huctajib te bin toj ta pasel soc te stojil chahpanel; te c'uxul-o'tanil soc te bin smelelil ya xnahilijic bahel ta atojol.

¹⁵ Bayel yutsil te mach'atic ya sna'ic yalel yutsil ac'oblal, te ya xbehenic ta sacal q'uinal yu'un te sit awelaw, Jehová.

¹⁶ Sjunal c'ahc'al tse'el yo'tanic ta scuenta abihil, tse'el yo'tanic yu'un te toj-o'tanil awu'un,

¹⁷ como ha'at yutsilalat te yipique, ta scuenta te yutsil awo'tan ya xtohy te quipcotique.

¹⁸ Como ha mahquilal cu'untic te Jehová, te ajwalil cu'untic ha te Ch'ul Dios yu'un Israel.

¹⁹ Ta namey c'opojat ta nahalsitil, hich la awalbe te a'batetic awu'un te jun yo'tanic ta atojol: La jcoltay te mach'a ay yip; la jtoybe sc'oblal te mach'a tsahbil ta pueblo cu'un.

²⁰ La jta te ca'bat David; la jmal ta ch'ul aceite cu'un.

²¹ Spisil ora ya xcoltayot yu'un te jc'ab, ya x'a'bot yip yu'un te jc'abe.

²² Ma ba ya xtsalot yu'un te scontra, soc ma ba ya x'uts'inot yu'un te mach'a chopol.

²³ Ya me jlajimbe te scontratac ta stojol soc ya quehchentes te mach'atic ya xp'ajotic yu'une.

²⁴ Stalel jun co'tan ta stojol soc c'ux ya ca'iy ta co'tan, soc ta scuenta jbihil ya xtohy te yipe.

²⁵ Ya ca'be scuentahin te mar, ya ca'be swa'el-c'ab ta stojol te muc'ul-ha'etique.

²⁶ Ya me yawtayon: Ha'at jtatat, ha'at Diosat cu'un, soc muc'ul tonat yu'un te jcolele, xchi.

²⁷ Soc ya cac' te ha ba-nich'anil cu'un ya xc'oht, ha toyol xan ay yu'un te ajwaliletic ta bahlumilal.

²⁸ Spisil ora ay sc'uxul co'tan ta stojol, soc stalel ya xhil te chapbil-c'op cu'un ta stojol.

²⁹ Ya cac' te spisil ora ay sts'umbal, soc te hich ya xhalaj te shuctajib te bin ut'il ya xhalaj te ch'ulchane.

³⁰ Te snich'nab teme ya yihquitaybonic te Ley cu'un soc teme ma ba ya st'unic te bintic caloj,

³¹ teme ya sjimbe sc'oblal te chahpambil mandariletic cu'un soc teme ma ba ya scanantaybon te mandariletic cu'une,

³² ya ca'be castigo ta xul te c'axun-mandar yu'unic, ya ca'be majel yu'un te smulique;

³³ pero ma ba ya jloq'ues te sc'uxul co'tan ta stojol, soc ma ba ya jyanijtes te stalel jun co'tan ta stojol.

³⁴ Ma ba ya jlajimbe sc'oblal te chahpambil c'op cu'un, ma ba ya jyanijtes te bin caloje.

³⁵ Junax buelta caloj ta jamal ta scuenta bin ut'il Ch'ul Dioson jtuquel, ma ba ya jlotiy te David.

³⁶ Stalel ya xhil te sts'umbal soc hich ya xhalaj te shuctajib ta jtojol te bin ut'il ya xhalaj te c'ahc'ale;

³⁷ stalel ya xhil hich te bin ut'il te u, hich te bin ut'il testigo ta ch'ulchan te jun yo'tan ay, xchihon. Selah

³⁸ Pero ha'at la ach'ayix, la awihlayix te mach'a tsahbil awu'un, ilinemat ta stojol.

³⁹ La ajinix te chapbil-c'op ta stojol te a'bat awu'un, la ajimbe sc'oblal te scorona, la ach'ojbe ta lum.

⁴⁰ La ajinticlambe spisil te sts'ahcul, la alajimbe te toyol ts'ahquetic yu'une.

⁴¹ Spisil te mach'atic ya xc'axic tey a ya spojbeyic sbiluc; ya xlabanot yu'un te spat-xuhque.

⁴² La atoybe swa'el-c'ab te scontratac; la awac' tse'eluc yo'tanic spisil mach'atic ya scontrahinic.

⁴³ La alajimbe ye te espada yu'un, ma ba la acoltay ta guerra.

⁴⁴ La alajimbe te yutsilal soc la ach'ojbe ta lum te shuctajib.

⁴⁵ La acomubtesbe te yorahil squeremil; ¡bayel la awac' ta q'uexlal! Selah

⁴⁶ ¿Jayeb xan ora, Jehová? ¿Spisil bal ora yac anac' aba? ¿Ya bal xtihl awilimba hich te bin ut'il c'ahc'?

⁴⁷ ¡Na'a me te com te jcuxlejal! ¿Bin yu'un te mayuc scuentahil te la apas spisil te ants-winiquetique?

⁴⁸ ¿Mach'a winiquil te ya xcuxaj te ma ba ya xcham? ¿Ya bal xhu' ya scoltay sba ta yip te yawil mach'atic chamenic? Selah

⁴⁹ Cajwal, ¿banti ay te sc'uxul awo'tan te ay ta namey, te hich la awalbe ta jamal te David ta scuenta te stalel jun awo'tan?

⁵⁰ Cajwal, na'a me te labanel la ya'iyic te a'batetic awu'un, te labanel yu'un tsobol pueblohetic te ay ta co'tan,

⁵¹ como te acontratac, Jehová, la slabanic, la slabanic te jujujihm yoc te mach'a tsahbil awu'une.

⁵² ¡Bayeluc me yutsil sc'oblal sbahtel q'uinal te Jehová! ¡Hichuc!