Salmos 86 - Bible in Tzeltal Bachajón

Sc'anel te ya xchicnaj xan c'uxultayel yu'un Dios

Te bin la yal ta sc'oponel Dios te David.

¹ A'iybon me jc'op, Jehová, jac'bon jc'op, como ayon ta wocol soc mayuc bin ay cu'un.

² Canantaybon jcuxlejal, como jun co'tan ta atojol; ha'at Diosat cu'un, ¡coltaya te a'bat awu'un te smuc'ulinejat yo'tan!

³ Na'bon yo'bolil jba, Jehová, como ya cawtayat spisil ora.

⁴ A'beya yutsil yo'tan te a'bat awu'un, como ya jach jch'uhlel ta atojol, Cajwal.

⁵ Como ha'at, Cajwal, lec awo'tan soc jpas-perdonat, c'ax bayel sc'uxul awo'tan ta stojol spisil te mach'atic ya yalbat wocol.

⁶ A'iybon me jc'op, Jehová, ich'bon ta cuenta te jc'op te ya calbate.

⁷ Ta sc'ahc'alel jwocol ya jc'oponat, como ha'at yac ajac'bon jc'op.

⁸ Cajwal, mayuc yan dios hich te bin ut'il ha'at, mayuc yan a'teliletic hich te bin ut'il te awu'une.

⁹ Spisil te nacionetic te apasoj ya me xtalic ta atojol soc ya me sch'uhuntayat, Cajwal, soc ya me yalbat yutsil sc'oblal te abihile,

¹⁰ como ha'at muc' Diosat soc yac apas jchahp a'teliletic; ¡ha'at Diosat atuquel!

¹¹ A'bon quil, Jehová, te be awu'un, hich ya xbehenon a tey ta smelelil c'op awu'une; a'bon yich' yip te co'tan yu'un hich ya quich' ta muc' te abihile.

¹² Ya calbat yutsil ac'oblal ta spisil co'tan, Jehová, Dios cu'un; ya jtoybat yutsil sc'oblal abihil ta spisil ora,

¹³ como muc' te sc'uxul awo'tan ta jtojol, la awac'on ta libre ta sc'ubulil te yawil mach'atic chamenic.

¹⁴ Dios cu'un, la scontrahinonic te jtoybahetic; la slehbonic jcuxlejal jchahp j'uts'inwanejetic, ma ba la yich'at ta cuenta.

¹⁵ Pero ha'at Cajwal, ha Diosat te ay sc'uxul awo'tan soc lec awo'tan; ma orahuc ya x'ilinat, soc muc' te sc'uxul awo'tan soc te smelelil ac'ope,

¹⁶ ilawon soc c'uxultayawon; a'beya awip te a'bat awu'un, soc canantaybeya te yal te awa'bate.

¹⁷ A'bon quil seña te lec awo'tan ta jtojol, scuenta yu'un te mach'atic ya sp'ajonic ya me yilic soc ya xq'uexawic yu'un, como ha'at, Jehová, la acoltayon soc la awa'bon smuc'ul co'tan.