Salmos 83 - Bible in Tzeltal Bachajón

Sc'ambeyel sjinel te scontratac Israel

C'ayoj; ha salmo yu'un Asaf.

¹ ¡Dios cu'un, ma me ch'abaluc q'uinal awu'un! ¡Ma me xch'abat ta c'op, Dios cu'un, ma me ha'uc te ma xc'opojat!

² Como yac ta c'op te acontratac, shachoj sjolic te mach'atic ya sp'ajat.

³ Muquen schapoj sc'opic ta scontrahinel te pueblo awu'un; schapoj sc'opic ta scontrahinel te mach'atic canantaybilic awu'un.

⁴ Hich ya yalic: La, ya jimbetic te nación yu'unic, scuenta yu'un mayuquix ta na'beyel xan te sbihil Israel, xchihic.

⁵ Junax sc'op ya schapic; ya schap sbahic yu'un scontrahimbelat:

⁶ ha te snahilpaq'uic yu'un Edom soc Ismael, yu'un Moab soc Agar,

⁷ Gebal, Amón soc Amalec, Filistea, soc te swinquilel Tiro.

⁸ Ha nix te Asiria junax yac'oj sba soc; ha yip sc'abic te sts'umbal Lot. Selah

⁹ Hich me xapasbe te bin ut'il la apasbe te Madián, hich te bin ut'il la apasbe te Sísara soc te Jabín ta muc'ul-ha' Cisón,

¹⁰ te lajic ta Endor, te c'atp'ujic ta c'a'em lum ta q'uinal.

¹¹ Te capitanetic yu'unic ac'a c'ohtuquic hich te bin ut'il Oreb soc Zeeb; hich te bin ut'il Zeba soc Zalmuna spisil te príncipaletic yu'unic,

¹² te hich yalojic: Ya me quich'betic te aquiltic yu'un Dios, xchihic.

¹³ Dios cu'un, hich xawac' baletel te bin ut'il taquin ch'ix, hich te bin ut'il suhlil spat trigo te ya xlich'ot bahel ta ic',

¹⁴ hich te bin ut'il ya xchic'ot ta c'ahc' te tohyem te'etic, hich te bin ut'il ya schic'ot ta yat c'ahc' te witsiltique.

¹⁵ Hich me xanuts soc te yic'al chahwuc awu'un, soc yac axiwtes soc te sutu-ic' awu'une.

¹⁶ Macbeya yelawic ta q'uexlal, scuenta yu'un ya slehbat abihil, Jehová.

¹⁷ Ac'a yich'ic q'uexlaltesel soc xiwel spisil ora; ma ba ich'bilic ta cuenta a ac'a lajuquic.

¹⁸ Ac'a sna'ic te ha Jehová te abihile, te ha'at atuquel te Mach'a toyol ayat ta stojol spahmal te q'uinale.