Salmos 80 - Bible in Tzeltal Bachajón

Sc'anel te ya scha'lecubic

Yu'un jach-c'ayoj; ta sc'ayojil Lirios. Jun testimonio. Ha salmo yu'un Asaf.

¹ Jcananat yu'un Israel, a'iya me awa'iy; ha'at te yac awic' bahel te José hich te bin ut'il jchahp tuminchijetic; ha'at te huculat ta yohlil te querubinetic, sacubtesa q'uinal.

² ¡Ac'a hahchuc awu'el ta stojol Efraín, Benjamín soc Manasés; la', coltayawotcotic!

³ ¡Cha'lecubtesawotcotic, Dios cu'un; ac'a tihluc sts'anabul awelaw ta jtojolcotic, hich ya xcolotcotic a!

⁴ Jehová, Diosat te acuentahinej spisil, ¿jayeb xan ora te yac awilintay te bin ya yalbat te pueblo awu'une?

⁵ La awa'be swe'ic te ya'lel sitic; la awa'be yuch'ic bayel te ya'lel sitique.

⁶ La awac'otcotic ta labanel yu'un te jpat-xuhcotic, soc te jcontracotic ya stse'layotic.

⁷ ¡Cha'lecubtesawotcotic, Diosat te acuentahinej spisil! ¡Ac'a tihluc sts'anabul awelaw ta jtojolcotic, hich ya xcolotcotic a!

⁸ Ta Egipto la aloq'ues tal jun ts'usubil; la atenticlan loq'uel te nacionetic, la ats'un tey a te ts'usubile.

⁹ La awaq'uintaybe sq'uinal, c'ub slohp', noj yu'un te q'uinale.

¹⁰ Te witsetic mucot ta axinal yu'un, te muc'ul cedrohetic mucotic ta sc'abc'ab.

¹¹ La spuquic bahel te sc'abc'ab c'alal ta mar, c'ohtic c'alal ta Muc'ul Ha' te spuhle.

¹² ¿Bin yu'un la ajinticlan te sts'ahcul, te hich ya xhu' ya stulbeyic sit te mach'atic ya xbehenic bahel tey a?

¹³ Te ha'mal chitametic ya stuch'ticlanic, te ha'mal chambahlametic ya slajinic ta we'el.

¹⁴ Diosat te acuentahinej spisil, suhtan tal ta ora, ila tal c'alal ta ch'ulchan, na'beya yo'bolil sba te ts'usubile,

¹⁵ ha te ts'usubil te la ats'un ta swa'el ac'ab, ha te spuhl te la awac' ch'ihyuc yu'un ha awu'un ya xc'oht.

¹⁶ ¡Set'bilix te ts'usubil, la yich' chiq'uel ta c'ahc'! ¡Lajic ta utel awu'un te pueblo awu'une!

¹⁷ Ac'a ac'ab ta stojol te winic te ay ta swa'el ac'ab, te snich'an winic te la awac' ipajuc.

¹⁸ Hich ma ba ya jpit jbahcotiquix ta atojol; a'botic xan jcuxlejalcotic, hich me ya jc'oponatcotic ta abihile.

¹⁹ ¡Jehová, Diosat te acuentahinej spisil, ac'a tihluc sts'anabul awelaw ta jtojolcotic, hich ya xcolotcotic a!