Salmos 77 - Bible in Tzeltal Bachajón

Sna'ulanel te bin spasoj Dios ta scuenta yu'el

Yu'un jach-c'ayoj; yu'un Jedutún. Salmo yu'un Asaf.

¹ La jcawtay te Diose, la jcawtay te Dios yu'un ya ya'iyon.

² Te bin ora ayon ta mel-o'tan, la jle te Jehová, sjunal ahc'abal la jtoy jc'ab, ma ba la jca'be scux yo'tan; ma ba la sc'an ya xmuc'ub q'uinal ya'iy te jch'uhlele.

³ La jna' te Diose, oc'on yu'un; la jna'ulan ta co'tan, pehc'aj co'tan yu'un. Selah

⁴ Ma ba la awac' smuts' sba te jsite; xch'ayet co'tan, ma hu' c'opojon yu'un.

⁵ Tal ta co'tan te c'ahc'aletic ta nahil, te ha'biletic ta namey.

⁶ La jna' te c'ayojetic cu'un ta ahc'abal; la jna'ulan ta co'tan, hich la joc'oy:

⁷ ¿Spisil bal ora ya xp'ajawan te Jehová? ¿Ma bal yacuc yac' quiltic xan te slequil yo'tan?

⁸ ¿Jc'axel bal lajem te sc'uxul yo'tan? ¿Jc'axel bal lajemix sc'oblal te bin yaloje?

⁹ ¿Ch'ay bal ta yo'tan Dios te c'uxultaywanej yu'une? ¿Smacoj bal ta yilimba te sna'el yo'bolil jbahtic? xchihon. Selah

¹⁰ Hich la jcal: Te bin c'ux ya ca'iy, ha ini: ha te ya xtal ta co'tan te ha'biletic te la scoltayotic te swa'el-c'ab te Mach'a Toyol ay.

¹¹ Ya me jna' te bintic spasoj te Jehová; ya me jna' te jchahp a'teliletic awu'un ta namey.

¹² Ya jna'ulan spisil te bintic apasoj, ya jna'ulan te awa'tele.

¹³ Dios cu'un, ha ch'ultesbil te be awu'un; ¿bin diosil te hich smuc'ul te bin ut'il te Dios cu'untique?

¹⁴ Ha'at Diosat te yac apas jchahp a'teliletic; la awa'be yil awu'el te nacionetique.

¹⁵ Ta scuenta ac'ab la acoltay ta libre te pueblo awu'un, ha te sts'umbal Jacob soc José. Selah

¹⁶ Dios cu'un, la yilat te ha'etic, la yilat te ha'etic, xiwic yu'un; hahch ta nihquel te sc'ubulile.

¹⁷ Te tocaletic la yac' cohel bayel ya'lel, t'ohm chahwuquetic ta ch'ulchan, loc' tsantsehwaletic ta bayuc.

¹⁸ Chicnaj sc'op st'ohmel chahwuc awu'un ta sutu-ic', te tsantsehwaletic awu'un la sacubtesic te bahlumilal, nihc te lumq'uinal, yuq'uilanot yu'un.

¹⁹ C'ax ta mar te be awu'un, te behetic awu'un c'axic ta yohlil te ha'etic; aunque ma ba chicnaj te awoque.

²⁰ La atojobtes bahel te pueblo awu'un hich te bin ut'il jchahp tuminchijetic, ta scuenta te Moisés soc Aarón.