Salmos 74 - Bible in Tzeltal Bachajón

Sc'oponel Dios yu'un scontra

Ha masquil yu'un Asaf.

¹ Dios cu'un, ¿bin yu'un te jc'axel apihtesejotcotic? ¿bin yu'un te tihlem sc'ahc'al awo'tan ta stojol te tuminchijetic awu'un ta aq'uinal?

² Na'a me te pueblo awu'un, te mambil awu'un ta namey, ha te la acoltay loq'uel tal yu'un ha schahpal ya xc'oht awu'un; na'a me te wits Sión te banti nahinemat.

³ Hacha bahel awoc ta stojol te bintic stalel jihnemic, spisil bintic la slajinlan ta ch'ul awilal te contrahe.

⁴ Te acontratac xjuyetic ta aw ta yohlil te tsoblej awu'une; la yaq'uic banderahetic yu'unic scuenta señahetic.

⁵ Hich yilelic te bin ut'il mach'atic ya x'a'tejic soc echej ta tohyem te'etic.

⁶ La stop'ic ta echej soc la smajic ta martillo spisil bintic ch'albil te pasbilic ta te'.

⁷ La ya'beyic sc'ahc'al te ch'ul awilal awu'un; la sbohlobtesbeyic sc'oblal banti nahinem abihil, la sjinic cohel c'alal ta lum.

⁸ La yal ta yo'tanic: Ya jintic ta jc'axel, xchihic. La schiq'uic spisil te ch'ul awilaletic yu'un Dios te ayic ta q'uinal.

⁹ Ma ba chicanix te señahiletic cu'untic; mayuquix jalwanej, mayuc mach'a ay ta cohliltic te ya sna' jayeb xan c'ahc'al ya xhalaj ini.

¹⁰ Dios cu'un, ¿jayeb xan c'ahc'al ya xtse'lawan te contrahe? ¿Stalel bal ya sbohlc'optaybat abihil te contrahe?

¹¹ ¿Bin yu'un te yac acom ac'ab? ¿Bin yu'un te anac'oj ta petel awa'el-c'ab?

¹² Pero ha ajwalil cu'un te Dios c'alal ta namey; ha te ya yac' colel ta bahlumilal.

¹³ Ha'at la ajam te mar ta scuenta awu'el; la atop'ticlambe sjolic te muc'ul chambahlametic te ayic ta ha'etic.

¹⁴ La atenticlambe sjolic te Leviatán, la awa'be swe'elin ti'awal chambahlametic te ayic ta jochol taquin q'uinal.

¹⁵ La ajam sloq'uib-ha' soc muc'ul-ha'etic, la awac' taquijuc te muc'ul-ha'etic te stalel ya x'oquinic.

¹⁶ Ha'at awu'un te c'ahc'alel, soc ha'at awu'un te ahc'abal; ha'at la awac' ayinuc ta yawil te u soc te c'ahc'ale.

¹⁷ Ha'at la achahpan te ban c'alal ya xc'oht ta jujusehp te q'uinale; ha'at la apas te snahtil c'ahc'al soc te scomil c'ahc'ale.

¹⁸ Na'a me, Jehová, te la slabanat te contra, te pueblo te ma sna' q'uinal la slabambat abihil.

¹⁹ ¡Ma me xawac' lajuc ta ti'awal chambahlametic te xpuliwoc awu'un! ¡Ma me jc'axeluc ya xch'ay ta awo'tan te mach'atic awu'un te pich'il yo'tanique!

²⁰ Na'a me te chapbil-c'op awu'un, como te ihc'al q'uinaletic ta bahlumilal nojelic ta uts'inel tey a.

²¹ Ma xawac' te ya yich'ic pehc'anel te mach'atic ayic ta uts'inele; ac'a yalbat yutsil ac'oblal te pobrehetic soc te mach'atic peq'uelique.

²² ¡Dios cu'un, hahchan, c'opojan atuquel! ¡Na'a me bin ut'il ya slabanat jujun c'ahc'al te mach'atic ma sna'ic q'uinal!

²³ Ma me xch'ay ta awo'tan te yawic te acontratac, te xjuyetic yu'un te mach'atic scontrahinejat te spisil ora ya xmo ta atojol.