Salmos 73 - Bible in Tzeltal Bachajón

LIBRO 3 ( Salmos 73—89 ) Bin ut'il ya xc'ohtic ta loq'uel mach'atic chopolic

Ha salmo yu'un Asaf.

¹ Melel lec yo'tan Dios ta stojol Israel, ta stojol te mach'atic sac yo'tanic.

² Te ho'one jteb xanix ma jaxp'uj coc, jteb xanix ma ba bilts'uj te coque.

³ Como bic'taj co'tan yu'un te mach'atic stoyoj sbahic, te c'alal la jquil bayel bintic ay yu'un te mach'atic chopolique.

⁴ Ma ba ya xiw yo'tanic yu'un te ya xchamic, ay yip sbaq'uetalic.

⁵ Ma ba ya xc'ax swocolic hich te bin ut'il te yantique; ma ba ya x'a'bot swocolic hich te bin ut'il yantic ants-winiquetic.

⁶ Ha yu'un ha yuhanejic te toybahil; ha sc'u'inejic te uts'inwanej.

⁷ Siht'em sitic yu'un sjuhp'elic, bayel te bin chopol snopoj ta yo'tanic.

⁸ Ya xlabanwanic, soc chopol bin ya yalic ta spasel uts'inwanej; ya xc'opojic ta toyba c'op.

⁹ Ya scontrac'optayic ch'ulchan; soc stoybahilic ya xbehenic ta lumq'uinal.

¹⁰ Ha yu'un te pueblo yu'un Dios ya st'unic, soc ya sch'uhunic bintic ya xhalbotic yu'un.

¹¹ Hich ya yalic: ¿Bin ut'il c'an sna' te Diose? ¿Ay bal bin ya sna' te Mach'a Toyol ay? xchihic.

¹² Ila awilic te jchopol-o'tanetique; mayuc bin ya xmacotic yu'un ya yac' p'ohluc te c'ulejalil yu'unic.

¹³ ¡Melel tojol te pocbil co'tan soc te pocbil jc'ab yu'un ma ba ya jpas mulil!

¹⁴ Como spisil ora ya quich' majel, ya quich' castigo ta jujun sahb.

¹⁵ Te hichuc la jcal: Hich ya xc'opojon te bin ut'il ya xc'opojic, te xchihucon, la jlo'loy te al-nich'anetic awu'un te hichuque.

¹⁶ C'alal la jnopilan ini yu'un ya jna'be scuentahil, wocol la jca'iy.

¹⁷ Ha to c'alal ochon ta templo yu'un Dios, hich la jna' bin ut'il ya xc'ohtic ta loq'uel.

¹⁸ Melel yac awac'ticlan ta lugar banti ya xhu' ya xjaxp'uj yoquic, yac awac' ch'ayuquic cohel ta lajinel.

¹⁹ ¡Ora nax lajemic bahel, lajic bahel yu'un te xiwele!

²⁰ Hich te bin ut'il swayich te mach'a ya xhahch ta wayel, hich te c'alal ya xhahchat, Cajwal, yac ap'aj te bin scuyoj sbahic a.

²¹ Mero pich'il co'tan yu'un, soc lowbil co'tan la jca'iy.

²² Mayuc sp'ijil co'tan, ma ba la jna'be scuentahil; hichon ta atojol te bin ut'il chambahlam.

²³ Aunque hich ayon, pero spisil ora joquinejat; la atsacon ta awa'el-c'ab.

²⁴ La atojobteson ta scuenta bin yac awa'bon jna', ta patil yac awic'on ta utsilal.

²⁵ ¿Mach'a yan ay cu'un ta ch'ulchan? Ha'at nax atuquel. Mayuc bin yan ya jc'an ta bahlumilal, ha'at nax atuquel.

²⁶ Te jbaq'uetal soc te co'tan ya xlajic, pero ha yip co'tan te Diose, soc te bin ya quich' hilel sbahtel q'uinal.

²⁷ Te mach'atic ya xnamijic ta atojol, ya me xlajic; ha'at yac alajinlan spisil mach'atic ma junuc yo'tanic ta atojol.

²⁸ Pero te ho'one, lec te nopol ayon ta stojol Dios. La jcac' te ha smuc'ul co'tan te Cajwaltic Jehová, ya calbe sc'oblal spisil bintic apasoj.