Salmos 7 - Bible in Tzeltal Bachajón

Sc'anel chahpanel

Sigaión yu'un David te la sc'ayojtay te Jehová yu'un te bin la yal te Cus, snich'an Benjamín.

¹ Jehová, Dios cu'un, jnac'oj jba ta atojol; coltayawon ta stojol spisil mach'atic ya snutsonic,

² te manchuc ya sjot'onic hich te bin ut'il choj, soc te ya sbutsticlanonic, mayuc mach'a ya scoltayon.

³ Jehová, Dios cu'un, teme ay bin jpasoj, teme ay mulil ta jc'ab,

⁴ teme ay bin chopol la jpasbe te mach'a lamal q'uinal ya ca'iy soc, o teme tojol nax la jpojbe sbiluc te jcontrahe,

⁵ ac'a snutson te jcontra soc ac'a stahon; ac'a ts'o'ts'o'tec'bon ta lum te jcuxlejal, ac'a ya'bon ta ts'u'lum te quich'el ta muc'. Selah

⁶ ¡Hahchan, Jehová, soc awilimba! ¡Hahchan ta scontrahinel te yilimba te jcontratac, cuxa awo'tan, Dios cu'un, pasa te bin stojil!

⁷ Ac'a sjoytayat te pueblohetic te stsoboj sbahic, soc huhcana aba ta toyol ta stojolic.

⁸ Jehová ya schahpan te pueblohetique. Chahpanawon, Jehová, ha chican te stojil ca'tel soc chican te jun ay te co'tane.

⁹ Lajimbeya schopolil te mach'atic chopol yo'tanic, pero a'beya yich' yip te mach'a toj yo'tan, como toj yo'tan stuquel te Diose, ya stsahtay pensaril soc o'tanil.

¹⁰ Ha jmahquil te Dios te ya scoltay te mach'atic toj yo'tanique.

¹¹ Ha tojil juez te Diose, ha Dios te spisil ora ilinem ta stojol te mach'a chopol ya'tel.

¹² Teme ma suhtes yo'tan, ha ya shuxbe ye te espada yu'une; snitojix te st'ihmalte', chapalix yu'un.

¹³ Ha nix hich chapalix yu'un a'tejibaletic yu'un lajel, soc chapalix yu'un ya'tejibalul t'ihmalte' te yac ta tihlele.

¹⁴ Te mach'a chopol yo'tan la yac' hahchel te bin chopol, swoloj te bin ma lecuc, la yayintes lo'loyel.

¹⁵ La shot ch'en, c'ubul c'oht yu'un, pero tey nix ya xch'ay cohel a ta ch'en te spasoje.

¹⁶ ¡Te bin chopol spasoj ya me suht tal ta stojol, te uts'inel yu'un ya suht tal ta sjol!

¹⁷ Ya calbe yutsil sc'oblal te Jehová yu'un toj te yo'tane, ya jc'ayojtaybe sbihil te Jehová te mero toyol ay.